Цахим орчинд “Нэг сартай хүүхэд өргүүлнэ. Авах нэг нь аваарай” гэх зар нийтлэгдэж, олон нийтийн бухимдал төрүүлээд байна. Энэ зар үнэн эсэхийг Цагдаагийн байгууллагаас шалгаж эхлээд байгаа. Хэрвээ ээж нь өөрөө хүүхдээ өргүүлнэ гэх зар тавьсан нь үнэн бол Гэр бүл, хүүхэд залуучуудын хөгжлийн газраас тусгай байцаагч томилж ажиллуулахаа мэдэгдсэн. 

 

Тэгвэл бид тухайн зарыг цахим орчинд нийтэлсэн фейсбүүк хаягийн эзэн, зураг дээрх хүүгийн ээж Б.С-тай холбогдож тодрууллаа. 

---

 

- Өөрийн чинь фейсбүүк хаягнаас өглөө 08:00 цагийн орчимд “Нэг сартай хүү өргүүлнэ” гэх зар зарын групп хуудсуудад нийтлэгдсэн байсан. Энэ зар цахим орчинд маш их бухимдал үүсгэж байна?

 

-   Би тэр зарыг тавиагүй. Би өнөө өглөө Монелийн дэлгүүрт явж байгаад гар утсаа хулгайд алдсан. Утсаа алдангуутаа Сансарын тунелд байдаг Мобикомын салбар орж симээ сэргээлгэсэн. Гэртээ ирээд хуучин утсандаа симээ хийгээд асаатал таньж мэддэг хүмүүс залгаад “Юу болоод байгаа юм бэ” гэж утасдаад байна. Миний утас кодгүй, бас хүүгийн минь зураг зөндөө байсан учраас утсыг минь хулгайлсан хэн нэгэн тэр зарыг тавьсан бололтой. Ядаж би фейсбүүкийнхээ кодыг мэдэхгүй, бас одоо барьж байгаа утас маань нокиа учраас тэр зарыг устгаж чадахгүй байна. Ямар зорилготой ийм зар тавьсныг нь үнэхээр мэдэхгүй байна. 

 

- Тэгвэл бас өчигдөр орой 22:00 цагийн орчимд өөрийн чинь фейсбүүк хаягнаас “Хүүхдийн комбинзон зарна” гэх зар нийтлэгдсэн байсан? 

 

-  Би одоо 22 настай, нөхөр хүү, охинтойгоо дөрвүүлээ амьдардаг. Том охин маань гурван настай, хүү маань хоёр хоногийн дараа сар хүрнэ. Хүүхдийн хувцас зарах зарыг би өчигдөр орой өөрөө тавьсан. Охины маань 3-4 сартай байхдаа өмсөж байсан хувцаснууд байгаа юм. Багадчихсан хувцсыг нь хий дэмий хадгалж байхаар зарж мөнгө болгоё гэж бодсон. Тэгээд ч бага маань хүү учраас эгчийнх нь ягаан хувцас өмсүүлээд байлтай биш дээ. 

 

- Цагдаагийн байгууллагаас энэ зарыг шалгаж байгаа?

 

-  Тийм ээ, холбогдсон. Бас утас руу минь янз бүрийн хүмүүс л залгаж байна. Би үүнээс цааш өөр юм хэлмээргүй байна.