Б.ЭНХ-АМГАЛАН ДАРХАНЫ ЗАМЫН I БАГЦЫН ТЕНДЕРИЙГ “МАКС”-ИЙН Д.ГАНБААТАРТ ӨГСӨН ҮҮ

Ц. АМУНДРА:
Эрэн сурвалжлах

2022-07-29, 2134

-Б.ЭНХ-АМГАЛАНГ ЗАМ, ТЭЭВРИЙН ХӨГЖЛИЙН САЙД БАЙХ ҮЕД “МАКС”-ИЙН Д.ГАНБААТАРЫН “АРЖ КАПИТАЛ” ХХК НЬ ДАРХАН-УЛААНБААТАР ЧИГЛЭЛИЙН АВТОЗАМЫН I БАГЦЫН ГҮЙЦЭТГЭГЧ, УДАЛГҮЙ II БАГЦЫГ ДАВХАР ГҮЙЦЭТГЭГЧ БОЛЖЭЭ. ГЭТЭЛ Б.ЭНХ-АМГАЛАНГИЙН ТӨРСӨН ДҮҮ Б.ЭНХБОЛД НЬ Д.ГАНБААТАРТАЙ ХАМТ НЭГ САН УДИРДДАГ БУЮУ ТЭД ТУН ОЙР ХОЛБООТОЙ АЖЭЭ-

Улсын орны амьдрал ороо бусгаа, олон улсад биднийг орших, эс орших тухай хурцаар ярьж байхад УИХ-ын гишүүд улаан хивс дэвсүүлэн ууланд гарч, татвар төлөгчдийн мөнгөөр тавгийн идээ засаж, тэнгэрийг нь тайж, тэгээд болоогүй орой нь од тахисан нь олон нийтийн зэвүүцэл, дургүйцлийг зэрэг хүргэв. Тэр тусмаа, тэдний дундаас олон нийтийн эгдүүцлийг илүүтэйгээр хүргэсэн нь УИХ-ын гишүүн Б.Энх-Амгалан. Учир нь тэр Зам тээврийн хөгжлийн сайдаар ажиллаж байх хугацаандаа Дархан-Улаанбаатар чиглэлийн 204 км автозамын ажлыг “бантагнасан” балагтай. Түүний “гавьяа”-гаар Дарханы зам тав дахь жилдээ таг гацаад буй. Дарга, сайд сэтэртэй болгон нь долоо хоногт нэг удаа Дарханы зам дээр очоод ч олигтой ахиц гарахгүй байгаа. Хөөрхий иргэд л амь насаа алдаж, автомашинаа эвдсээр, ямар сайндаа “Дарханы замаар яваасай” гэдэг хараалын шинэ хэлцтэй болчхов. Ядахад, хэдхэн хоногийн өмнө шинээр хучсан асфальт нь 10 минутын борооны ая даахгүй урсаж, ахиад л бухимдал үүсгэсэн. Тиймдээ ч УИХ-ын гишүүн Б.Энх-Амгаланг Увс аймагт оччихсон уулын тэнгэр тайж, орой нь од тахисан шиг “зүүрмэглэж” суугааг нь зүгээр хараад өнгөрч чадахгүй байгаа хэрэг л дээ.

Саяхнаас Дархан-Улаанбаатар чиглэлийн хатуу хучилттай автозамын ажлыг албаар гацаасан, гүйцэтгэгч компаниудаас авлига авсан байж болзошгүй хэрэгт холбогдуулан Зам, тээврийн хөгжлийн яамны хэд хэдэн дарга, сайд нарыг шалгах эхлэхээр болсон “шуум” гарах боллоо. Тэгвэл УИХ-ын гишүүн Б.Энх-Амгалан Зам, тээврийн хөгжлийн сайдаар ажиллах хугацаандаа бусдад давуу тал бий болгож, хувьдаа асар их хэмжээний ашиг олсон байж болзошгүй ноцтой сэжүүрийг дэлгэж байна. Тодруулбал, олноо “Макс”-ийн гэж танигдсан Д.Ганбаатар “Арж капитал” ХХК-иараа Дархан-Улаанбаатар чиглэлийн 204 км хатуу хучилттай автозамын ажлын I болон II багцын гүйцэтгэгчээр ажиллаж эхэлсэн нь Зам, тээврийн хөгжлийн сайд асан, УИХ-ын гишүүн Б.Энх-Амгалантай холбоотой байж болзошгүй байгаа юм.

ЗАМ, ТЭЭВРИЙН ХӨГЖЛИЙН САЙД АСАН Б.ЭНХ-АМГАЛАНГИЙН ТӨРСӨН ДҮҮ Б.ЭНХБОЛД НЬ ДАРХАНЫ ЗАМЫГ БАРЬЖ БУЙ “МАКС”-ИЙН Д.ГАНБААТАРТАЙ НЭГ САН УДИРДДАГ

“Мишээл”-ийн гэх Б.Энх-Амгалан хүүхэд ахуйдаа аавынхаа машины кабинд сууж явдаг байсан “мэдлэг”, “туршлага”-аараа Зам, тээврийн хөгжлийн сайд болж “автор”-оо ахиулсан нь 2019 оны хоёрдугаар сар. Тухайн үед Дархан-Улаанбаатар чиглэлийн 204 км автозамыг дөрвөн эгнээтэй болгож шинэчлэх ажил ид эхэлж байлаа. Б.Энх-Амгалан ч “Ондоо багтааж ашиглалтад оруулна” хэмээн ам гарч байв. Гэвч Дарханы замын тендерүүдэд БНХАУ-ын туршлагагүй компаниуд шалгарсан, Зам, тээврийн яамны албан тушаалтнуудад тор тороор нь мөнгө өгч авлигадсан гэх хэл ам гарах болж, нэмээд “Бороо тасралтгүй орж ажил зогсоосон” шалтаг нэмэгдэж, төдөлгүй цар тахал дэгдэж, өнөөх хятад ажилчид нь хилийн цаана гацсанаар өнөөдрийн бүх асуудал эхэлсэн. Ингээд зарим хятад компаниуд нь ажлаа үргэлжлүүлэх боломжгүй болж, нэмэлт тендер шалгаруулахад нэг монгол компани орж ирсэн нь “Арж капитал” ХХК. Энэ компанид “Макс групп”-ийн захирал Д.Ганбаатар хөрөнгө оруулалт хийж, “Макс рөүд” ХХК-даа нэгдэж, өөрийн болгосон буюу түүний компани.

Тэгвэл Д.Ганбаатарын “Арж капитал” ХХК нь Дарханы замын тендерт шалгарсан нь Зам, тээврийн хөгжлийн сайд асан Б.Энх-Амгалантай хэрхэн холбогдох вэ. Европын сэргээн босголт хөгжлийн банкны албан ёсны цахим хуудаснаас хайж үзвэл, Дархан-Улаанбаатар чиглэлийн 204 км хатуу хучилттай автозамын I-V багцын тендерт шалгарсан аж ахуйн нэгжүүдтэй 2020 оны зургадугаар сарын 22-ны өдөр 24 сарын хугацаатай гэрээ байгуулсан тухайгаа нийтэлж байжээ. Тухайн тайланд бичсэнээр Дарханы замын I багцад “Арж капитал” ХХК шалгарсан учир 20.5 сая ам.доллар буюу өнөөдрийн ханшаар 65 тэрбум төгрөгийн гэрээ байгуулсан гэж дурдсан байна.

Тэгвэл “Арж капитал” ХХК нь 2020 оны зургадугаар сарын 22-нд Дарханы замын ажил гүйцэтгэх гэрээ байгуулсан гэхээр энэ үед Зам, тээврийн хөгжлийн сайдаар Б.Энх-Амгалан ажиллаж байсан. Харин дээрх гэрээ зурагдсанаас 16 хоногийн дараа У.Хүрэлсүхийн Засгийн шинээр байгуулагдаж, Зам, тээврийн хөгжлийн сайдаар Л.Халтар томилогдсон.

Эндээс УИХ-ын гишүүн Б.Энх-Амгалан Зам, тээврийн хөгжлийн сайдын сэнтийгээс буухаасаа өмнө “Арж капитал” ХХК-ийг Дархан-Улаанбаатар чиглэлийн автозамын ажлын гүйцэтгэгчээр шалгарахад нь нөлөөлж, давуу тал бий болгосон байж болзошгүй хардлага төрнө. Энэ хардлагаас цааш нь хөвөрдвөл, “Арж капитал” ХХК болон Зам, тээврийн хөгжлийн сайд асан Б.Энх-Амгалантай тун ойроор холбогддог ажээ.

Тодруулбал, Зам, тээврийн хөгжлийн сайд асан, УИХ-ын гишүүн Б.Энх-Амгалангийн төрсөн дүү Б.Энхболд нь Дотоод хэргийн их сургуулийн Захиргааны удирдлагын газрын Хүний нөөцийн албаны даргаар ажиллаж байсан бөгөөд цагдаагийн хурандаа цолтой нэгэн бий. Ингээд болоогүй, Б.Энхболд нь өөрийнхөө төрсөн ах буюу УИХ-ын гишүүн Б.Энх-Амгалангийн “Их Монгол Алтай групп” ХХК-ийн гүйцэтгэх захирлаар нь ажилладаг ажээ. Илүү сонирхолтой нь, Б.Энхболд нь “Макс групп”-ийн эзэн Д.Ганбаатар, түүний төрсөн ах Д.Цэрэнжигмэд нартай хамт “Баянбогд хөгжил сан”-г удирддаг ажээ. 60 тэрбум төгрөгийн тендер яригдаж байгаа нөхцөлд энэ бол ашиг сонирхлын ноцтой зөрчил үүсгэх сэжүүр биш гэж үү.

ТАЙЛБАР: ЗҮҮН ГАР ТАЛААС Б.ЭНХБОЛД, Б.ЭНХ-АМГАЛАН, БАРУУН ГАР ТАЛААС Д.ГАНБААТАР

Дээрээс нь “Макс”-ийн Д.Ганбаатар, Б.Энх-Амгалан нар хоёулаа Говь-Алтай аймгийн уугуул. Тэр байтугай Д.Ганбаатар Говь-Алтай аймгийн нутгийн зөвлөлийн даргаар ажилладаг бол Б.Энх-Амгалан Удирдах зөвлөлийн тэргүүлэгчдийнх нь хуралд оролцдог юм билээ. Цухас дурдахад, УИХ-ын гишүүн Б.Энх-Амгалан эцэг эхээс долуулаа. Гэхдээ Энх-Амгалангийн овог Бямбасүрэн, бусдынх нь Бямбацэрэн учраас аливаа бүртгэл, албан бичгээс шүүхэд ах дүүс биш мэт харагддаг юм билээ.

ТАЙЛБАР: ГОВЬ-АЛТАЙ АЙМГИЙН НУТГИЙН ЗӨВЛӨЛИЙН УДИРДАХ ЗӨВЛӨЛИЙН ТЭРГҮҮЛЭГЧДИЙН ХУРАЛ- М.ЭНХ-АМГАЛАН, Д.ГАНБААТАР НАР

Цаашлаад, Д.Ганбаатар “Арж капитал” ХХК нь Дарханы замын зөвхөн I багцад шалгараад ч зогсохгүй, 2021 оны есдүгээр сарын 3-нд II багцын ажлыг гүйцэтгэхээр гэрээ байгуулсан байдаг ажээ.

Түүнчлэн, Д.Ганбаатар, Б.Энх-Амгалан нарын бас нэг хоршил Баянхонгор-Алтай чиглэлийн автозам дээр явагдсан байж болзошгүй харагддаг юм байна. Тодруулбал, УИХ-ын гишүүн Б.Энх-Амгалан 2019 оны хоёрдугаар сарын 2-нд Зам, тээврийн хөгжлийн сайдаар томилогдсон. Үүнээс хоёр сарын дараа буюу 2019 оны дөрөвдүгээр сарын 10-ны өдөр Засгийн газар хуралдаж, Баянхонгор-Алтай чиглэлийн 126.7 км хатуу хучилттай автозамын концессын гэрээг Д.Ганбаатарын “Макс рөүд” ХХК-д шилжүүлэх шийдвэр гаргаж байв. Улмаар сарын дараа буюу тавдугаар сард нь төр “Макс рөүд” ХХК-тай гэрээлж, тус замын ажлыг эхлүүлсэн. 2015 оноос хойш гацаад байсан Баянхонгор-Алтай чиглэлийн автозамын концессын гэрээ Б.Энх-Амгаланг сайд болсноос хоёрхон сарын дараа амь орж, тэр даруйдаа хэрэгжиж эхэлсэн гэхээр санаандгүй давхцал байж болох уу.

ТАЙЛБАР: БАЯНХОНГОР-АЛТАЙ ЧИГЛЭЛИЙН АВТОЗАМЫН НЭЭЛТ

Гол учир нь энэ төсөл маш өндөр санхүүжилттэй байсан. Тухайлбал, санхүүжилтийн хувьд, зөвхөн 2021 онд л гэхэд Баянхонгор-Алтай чиглэлийн автозамын төслийг хэрэгжүүлэхэд зориулж “Макс рөүд” ХХК-д 131 тэрбум төгрөг гаргаж өгөхөөр гэрээ хийгдэж байв. Түүнчлэн, “Макс рөүд” ХХК нь энэ төсөлд зориулж Хөгжлийн банкнаас 71.8 тэрбум төгрөгийн зээл авсан ба өнгөрөгч хоёрдугаар сард Хөгжлийн банкны найдваргүй зээлдэгчдийг зарлахад “Макс рөүд” ХХК Хөгжлийн банканд 18.4 тэрбум төгрөгийн өртэй хэмээн зарлагдаж байсан билээ.

ТАЙЛБАР: БАЯНХОНГОР-АЛТАЙ ЧИГЛЭЛИЙН АВТОЗАМЫН ГҮЙЦЭТГЭГЧ "МАКС РӨҮД" ХХК-ИЙН ТӨЛБӨРИЙН НЭХЭМЖЛЭХ ХУУДАС

УИХ-ЫН ГИШҮҮН Б.ЭНХ-АМГАЛАНГИЙН БИЗНЕСИЙН ХАМТРАГЧДЫН ТУХАЙ ЦУХАС

УИХ-ын гишүүн Б.Энх-амгалангийн ХОМ-гийг сонирхвол анхаарал татах зүйлс олон байдаг ажээ. Тодруулбал, Б.Энх-Амгалан нь “Их Монгол Алтай групп” ХХК, “Мишээл экспо” ХХК, “Алтан-Уул интернейшнл” ХХК, “Говь-Алтайн мааньт” ХХК, “Мандал хүдэр” ХХК-иудад хувь эзэмшдэг гэжээ.

Эдгээр компаниудын хамтран эзэмшигчид нь илүү сонирхол татна. Тухайлбал, “Мишээл экспо” ХХК-ийн хамтран эзэмшигч нь алдарт “Чоно групп”. Харин “Алтан-Уул интернейшнл” ХХК-ийг БНХАУ-ын иргэн Xin Liu гэгчтэй хамтран эзэмшдэг юм байна. “Говь-Алтайн мааньт” ХХК-ийг С.Балдандоржтой хамтран эзэмшдэг. С.Балдандорж нь автозамын хоёр ч компанитай, Алтай хотыг дулаанаар хангадаг станц болон нүүрсний уурхайтай, мөн уяач нэгэн аж. Илүү сонирхолтой нь, “Мандал хүдэр” ХХК нь Их британид бүртгэлтэй “Гранд майнинг групп” ХХК-тай хамтран “Мандал есөн эрдэнэ” ХХК-ийг эзэмшдэг ажээ.

Энэ мэтээр Дарханы замын цаана авлига, албан тушаалын томоохон хэргүүд үйлдэгдсэн байж болзошгүй ноцтой сэжүүрүүд гарч ирж байна. Тус замын ажил таван багцтай, багц тус бүр нь 50-60 тэрбум төгрөгийн санхүүжилттэй гэж тооцвол асар ашигтай буюу танилтай, нөлөөтэй нөхдийн хошуу дүрэх төсөл мөн үү мөн. Ерөнхий гүйцэтгэгчдээс гадна гол туслан гүйцэтгэгчид нь хүртэл Говь-алтай аймгийн Халиун сумынхан уугуул хүмүүс байгааг ч дурдах нь зүйтэй байх. Ямартай ч, хууль хяналтын байгууллагынхан Дархан-Улаанбаатар чиглэлийн 200-хан км автозамын ажил юунаас болж таван жил ашиглалтад орохгүй гацаад байгааг тогтоох биз. Харин хамгийн түрүүнд дуудагдах, хамгийн гол үүрэг гүйцэтгэсэн хүн нь Б.Энх-Амгалан гэдэг нь илэрхий болсоор байна. Бид дараагийн дугаартаа түүний өөр бусад тендертэй холбоотой ноцтой сэжүүрүүдийг дэлгэх болно.

ҮРГЭЛЖЛЭЛ БИЙ...

Б.ЭНХ-АМГАЛАН ДАРХАНЫ ЗАМЫН I БАГЦЫН ТЕНДЕРИЙГ “МАКС”-ИЙН Д.ГАНБААТАРТ ӨГСӨН ҮҮ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2022-07-30 17:09:25

яана даа: АВЛИГАЧИД байна. Төр авлигачидтай тэмцэх сонирхол алга. САЯхан NUUTS.mn ээс орос монголын 3-р сургуулийн захирал соронзонгийн хүү, нөхөр хоёрыг эрүүгийн гэмт хэргээс МОНГОЛ улсын ерөнхий прокурор Энхамгалан, хэсэг хурандаа нартай хамтран цэвэрхэн мулталж гаргасан материал гарсан. ОДООГийн ерөнхий прокурор жаргалсайхан ч, төрийн гурван өндөрлөг ч ТАГ дуугүй. АВЛИГАЧИД ИЛ байна. Шийдвэр гаргагч нарт тэмцэх сонирхол алга.