Тагнуулын ерөнхий газраас мөрдөн шалгах ажиллагаа явуулж, Ч.Мөнхбаярыг гадаад улсын тагнуулын албатай хамтран ажиллахаар тохиролцсон, хамтран ажилласан гэх үндэслэлээр гудамжнаас баривчилж, гэрт нь нэгжлэг хийсэн байдаг. Гэрээс нь бэлэн мөнгө, бичиг, баримт хураан авсан билээ. Тэгвэл түүнд холбогдох шүүх хурал өчигдөр болж, Ч.Мөнхбаярыг гэм буруутайд тооцож, 10 жилийн хорих ял оноолоо.

       Бид шүүгдэгч Ч.Мөнхбаярын өмгөөлөгч Г.Баасантай холбогдож, тодрууллаа. Тэрбээр “Өмгөөлөгчдийн зүгээс шүүхийн шийдвэрийг хатуу эсэргүүцэж байгаа. Мөн манай үйлчлүүлэгч Ч.Мөнхбаяр болон ар гэрийнхэн нь шүүхийн шийдвэрийг хүлээн зөвшөөрөхгүй байгаа. Ч.Мөнхбаярыг ямар ч нотлох баримтгүйгээр гадаадын тагнуул гээд яллачихлаа. Тэр хүн гадаадын тагнуул болсон зүйл байхгүй. Нэг ширхэг ч нотлох баримт байхгүй. Түүнийг Монгол бичгээ хамгаалахаар дугарч байгаа ганц хүн учраас яллаж байна. Ч.Мөнхбаяр хэлэхдээ “Би хилсээр ял авч байна. Өөрийнхөө байр суурин дээр хатуу зогсоно. Надад тагнуул болсон нэг ч зүйл байхгүй” гэж хэлсэн. Шүүгчид нотлох баримт гаргаж ирэхгүйгээр, 10 жилийн хорих ял оноолоо гэж хэлээд гараад явна лээ. Ч.Мөнхбаярын биеийн байдал сайнгүй, хорих ангийн эмнэлэгт эмчлүүлж байгаа. Тэрбээр ар гэрийнхэндээ маш их санаа зовж байгаа. Өндөр настай ээжийнх нь бие муудаж, эмээр л амьдарч байгаа” гэлээ.