Баянхонгор аймгийн Бууцагаан сумаас есөн настай алга болжээ. Тодруулбал, тус сумын Буянт багийн дугаар тоотод оршин суух эрэгтэй хүүхэд зургадугаар сарын 5-ны 19:00 цагийн орчимд алга болсон байна. Энэ тухай дуудлага тус аймгийн Онцгой байдлын газар зургадугаар сарын 6-ны 00:38 цагт ирсэн байна. Дуудлагын дагуу тус аймгийн Онцгой байдлын газрын тус сум дахь Гал түймэр унтраах, аврах 72 дугаар анги, тус сум дахь Цагдаагийн тасгийн алба хаагчид, ар гэрийнхэн тус сумын харьяат иргэн Б-гийн хүү Д-г эрэн хайх ажиллагааг эхлүүлжээ. Харин эрлийн багийнхан хүүг эсэн мэнд олж, ар гэрийнхэнд нь хүлээлгэн өгсөн байна.

Энэ талаар Бууцагаан сумын Засаг дарга Д.Лхагвадоржоос тодруулахад “Хүүг эрлийн багийнхан өчигдөр эсэн мэнд олж, ар гэрийнхэнд нь хүлээлгэн өгсөн. Алга болсон хүү хамар хашааныхаа айлд ороод унтчихсан байна лээ. Тухайн өдөр аав, ээж нь хөдөө яваад, хүү эмээтэйгээ хамт үлдсэн гэсэн. Тэгээд оройтчихоор нь тоглож байсан айлдаа унтаад өгсөн юм билээ” гэв.