УИХ-ЫН ГИШҮҮН Ц.АНАНДБАЗАРЫН НЭР ХОЛБОГДСОН “1000 ХОХИРОГЧТОЙ” ГЭХ ХҮЧИНГИЙН ХЭРГИЙГ ШАЛГАЖ, ТҮҮНД ЯЛЛАХ ДҮГНЭЛТ ҮЙЛДЖЭЭ

          УИХ-ын гишүүн Ц.Анандбазар хүчингийн хэрэгт нэр холбогдож, хууль хяналтын байгууллагад удаан хугацаанд шалгагдаж байгаа. Түүнд холбогдох хэргийн мөрдөн шалгах ажиллагаа дуусаж, хэргийг шүүхэд хүргүүлэх саналтайгаар прокурорт хүргүүлсэн бөгөөд прокурорын байгууллагаас хэргийг хянаад, УИХ-ын гишүүн Ц.Анандбазарын холбогдсон эрүүгийн хэрэгт яллагдагчаар татах тогтоол үйлджээ. Хавтаст хэрэгтэй нь танилцуулахаар УИХ-ын гишүүн Ц.Анандбазарыг прокурорын байгууллагаас удаа дараа дуудсан ч тэрбээр зугтааж, танилцахгүй байгаа талаар эх сурвалж мэдээллээ.  Өөрөөр хэлбэл, УИХ-ын гишүүн Ц.Анандбазарт яллах дүгнэлт үйлдэж, тогтоолтой танилцуулснаар хэргийг шүүхэд шилжүүлэх юм. Харамсалтай нь, эрхэм гишүүн эрх мэдэл, албан тушаалын байдлаа урвуулан ашиглаж, хууль хяналтын байгууллагынхныг уландаа гишгэсээр багагүй хугацаа өнгөрчээ.

         Хэргийг эргэн сануулбал, УИХ-ын гишүүн Ц.Анандбазарын үйлдсэн гэх хүчингийн хэргүүдийн дуулиан одоогоос яг жилийн өмнө дэгдэж байв. Иргэн Б.Сүндэръяа өөрийгөө УИХ-ын гишүүн Ц.Анандбазарт хүчирхийлүүлсэн гэх мэдээллийг 2021 оны дөрөвдүгээр сарын 11-нд олон нийтийн сүлжээнд цацсан. Улмаар гурав хоногийн дараа буюу дөрөвдүгээр сарын 14-нд УИХ-ын гишүүн Ц.Анандбазарт хүчирхийлүүлсэн хохирогчийн өргөдлөө  цагдаагийн байгууллагууд хүргүүлж, тэр даруйдаа хэвлэлийн хурал хийж байв. Энэ үеэрээ Б.Сүндэръяа “УИХ-ын гишүүн Ц.Анандбазартай 2019 онд танилцсан. Өдий хүртэл Ц.Анандбазар гишүүнд нандин нууцаараа барьцаалагдаж, үг хэлж чадахгүй явж ирлээ. Цаашид дарамт шахалттай амьдарч чадахгүй тул цагдаагийн байгууллагад хандаж байна. УИХ-ын гишүүн Ц.Анандбазартай холбоотойгоор надтай 1000 гаруй эмэгтэй холбогдсон. Ийм олон хүн холбогдоно гэж огт төсөөлөөгүй байсан” гэж мэдэгдэж, тухайн үедээ дуулиан тарьж байлаа. Улмаар УИХ-ын гишүүн Ц.Анандбазарын эзэмшдэг “Өргөө” кинотеатр болон “Бага тэнгэр” цогцолборт үйлчлэгч, зөөгчөөр ажиллаж байсан охид, бүсгүйчүүд түүний хүчирхийлэлд нэг биш удаа өртөж, айдас, дарамт дунд амьдарч ирснээ дэлгэж, “Бага тэнгэр” цогцолборт оройн ээлжинд ажиллаж байхдаа хүчиндүүлсэн гэх эмэгтэйн нэвтрүүлэгт хүртэл цацагдаж байлаа. Ингээд хүчирхийллийн хэргийнх хохирогчдын тоо болон үзэн ядагчдынх нь тоо хамт нэмэгдсээр “Ме too” хөдөлгөөн болон өргөжиж байв. Мөн дараахан нь 20 гаруй жилийн өмнө Ц.Анандбазарын гэрийн үйлчлэгч хийж байсан гэх эмэгтэй мөн л Ц.Анандбазарт хүчирхийлүүлж байсан тухайгаа дэлгэж, хэвлэлүүдэд ярилцлага өгч байсан билээ. Тэгвэл 1000 хохирогчтой гэх хэргийг хууль хяналтын байгууллагынхан шалгаад хэдийн дуусжээ.

УИХ-ын гишүүн Ц.Анандбазар хүчингийн хэргээс гадна Хөгжлийн банкны хэргээр мөн л хууль хяналтын байгууллагад шалгагдаж байсан билээ.