Хөгжлийн банкны найдваргүй зээлдэгчид өөрөө очиж тал засах биш, өрөө төлөхийг шаардах ёстой юм биш үү, З.Мэндсайхан сайд аа

Ц. АМУНДРА:
Эрэн сурвалжлах

2022-05-30, 1416

Засгийн газрын хоолойд тулаад буй хоёр том асуудал байгаа нь Евро бондын 1.5 их наяд, Самурай бондын 725 тэрбум төгрөгийн эргэн төлөлт. Сангийн сайд Б.Жавхлан мэдээлэл хийх бүрдээ “Хөгжлийн банкны найдваргүй зээлдэгчдийн өрийг нэн яаралтай эргэн төлүүлэхгүй бол ирэх онд Евро, Самурай бондын өрийг төлж чадахгүй хурцадмал нөхцөл байдал үүснэ” гэж түгшсэн, тэвдсэн янзтайгаар сануулсаар буй.

Тэгвэл Засгийн газар Хөгжлийн банкны найдваргүй зээлдэгчдийг өрөө нэн яаралтай төлөхийг сануулж, шавдуулж байх ёстой байтал ХХААХҮ-ийн сайд З.Мэндсайхан эсрэгээрээ шагшин магтаж явна.

Тодруулбал, Хүнс, хөдөө аж ахуй, хөнгөн үйлдвэрийн сайд З.Мэндсайхан өнгөрсөн амралтын өдрүүдэд Хэнтий аймгийн Хэрлэн, Мөрөн сумдад ажиллаж, тус сумдын тариаланчидтай уулзжээ. Ингэхдээ “Өлзийт Энсада” ХХК-ийн тариалангийн талбайгаар зочилсон байна. Улмаар тухайн компанийг “Канадын эрдэнэшүүлэггүй технологийг нэвтрүүлж, амжилттай туршиж байгаа. Энэ нь уламжлалт технологиос татгалзан, механик боловсруулалтыг нь цөөлөөд, дэвшилтэт техникийн хүчээр олон үйлдлийг нэг явалтаар хийх, нэг га-д тарьж байгаа үрийг нормыг багасгаад тариалалтыг хугацааг урагшуулах зэрэг олон давуу талтай харагдаж байна” хэмээн ихэд магтжээ.

Гэтэл “Өлзийт Энсада” ХХК нь Хөгжлийн банканд 35.5 тэрбум төгрөгийн өртэй, найдваргүй зээлдэгч “Энсада Истерн” ХХК-тай угшил нэгтэй, нэг эзэнтэй компани байх аж. Тухайлбал, З.Мэндсайханы зочилж, магтсан “Өлзийт Энсада” ХХК болон Хөгжлийн банкны найдваргүй зээлдэгч “Энсада Истерн” ХХК-ийн захирлаар Лувсанцэвээний Баттөгс ажиллаж ирсэн.

Гэхдээ өнгөрөгч хоёрдугаар сард буюу Хөгжлийн банкны найдваргүй зээлдэгчдийн асуудал ид дэгдэж байх үед “Өлзийт Энсада” ХХК-ийн гүйцэтгэх захирлыг нь Санжийн Ганзоригоор сольсон. Өдгөө “Өлзийт-Энсада” ХХК-ийн гүйцэтгэх захирлаар Санжийн Ганзориг, эцсийн өмчлөгчөөр нь Бямбаагийн Энхсүрэн, “Кастом тариалан менежмент” ХХК, "М Си Эс" группийн охин компаниуд болох “Мэт агро” ХХК, “М Си Эс Холдинг” ХХК-иуд бүртгэлтэй байна. Гэхдээ гүйцэтгэх захирал нь солигдлоо гээд “Энсада Истерн” ХХК, “Өлзийт Энсада” ХХК-иуд хоорондоо хамааралгүй болчихоогүй. Учир нь толгой компаниуд болох “Энсада холдинг” ХХК, “Энсада сервис”-иудыг “Өлзийт Энсада” ХХК-ийн эцсийн өмчлөгч Б.Энхсүрэн эзэмшдэг хэвээрээ байгаа юм.

ХХААХҮ-ийн сайд З.Мэндсайхан Хөгжлийн банканд 35.5 тэрбум төгрөгийн найдваргүй зээлтэй, зээлээ эргэн төлөөгүй “Энсада Истерн” ХХК-тай угшил нэгтэй “Өлзийт-Энсада” ХХК-ийн тариалангийн талбайгаар зориуд зочилж, тэгэх мөртөө “Канадаас шинэ технологи амжилттай нэвтрүүлж байгаа” хэмээн магтан сайшааж явах нь Засгийн газрын Хөгжлийн банкийг цэвэрлэх бодлоготойгоо авцалдахгүй байна. Эсвэл “М Си Эс групп”-ийн охин компани болохоор нь Хөгжлийн банкны зээлийг нь ор тас мартчихаад, онцгойлон тал засаж яваа хэрэг үү.

ТАЙЛБАР: ЛУВСАНЦЭВЭЭНИЙ БАТТӨГСИЙН ГҮЙЦЭТГЭХ ЗАХИРЛААР НЬ АЖИЛЛАЖ БАЙСАН БОЛОН ОДОО АЖИЛЛАЖ БАЙГАА КОМПАНИУДЫН БҮРТГЭЛ

ТАЙЛБАР: "ӨЛЗИЙТ ЭНСАДА" ХХК-ИЙН ЭЗЭМШИГЧДИЙН БҮРТГЭЛ

Товчхондоо, ХХААХҮ-ийн сайд З.Мэндсайхан Хөгжлийн банканд 35.5 тэрбум төгрөгийн найдваргүй зээлтэй, зээлээ эргэн төлөөгүй “Энсада Истерн” ХХК-тай угшил нэгтэй “Өлзийт-Энсада” ХХК-ийн тариалангийн талбайгаар зориуд зочилж, тэгэх мөртөө “Канадаас шинэ технологи амжилттай нэвтрүүлж байгаа” хэмээн магтан сайшааж явах нь Засгийн газрын Хөгжлийн банкийг цэвэрлэх бодлоготойгоо авцалдахгүй байна. Эсвэл “М Си Эс групп”-ийн охин компани болохоор нь Хөгжлийн банкны зээлийг нь ор тас мартчихаад, онцгойлон тал засаж яваа хэрэг үү.

Хөгжлийн банкны найдваргүй зээлдэгчид өөрөө очиж тал засах биш, өрөө төлөхийг шаардах ёстой юм биш үү, З.Мэндсайхан сайд аа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.