Увс аймгийн Өлгий сумын ерөнхий боловсролын сургуулийн захирал, орос хэлний багш нар дөрөвдүгээр ангийн хүүг зодож, шүдийг нь хугалсан гэх мэдээлэл цацагдаад байгаа билээ. Тодруулбал, тус сургуулийн захирал М нь эхнэр болох орос хэлний багш М-тэй нийлж, бага ангийн хүүхдийг хяналтын камергүй газар оруулж, зодсон гэх. Мөн орос хэлний багш нь сурагчийн ар гэрийнхнийг хэл амаар доромжилж, гутаасан хэмээн хүүгийн ээж мэдэгдээд байгаа. Одоогийн байдлаар хүү сургуульдаа явахгүй байгаа бөгөөд шүд хугарсан, аймгийн төв орж хиймэл шүд хийлгэх шаардлагатай байгаа гэнэ.

Бид энэ талаар Өлгийн сумын ерөнхий боловсролын сургуулийн орос хэлний багш М-тэй холбогдож, тодрууллаа. Тэрбээр “Би сурагчаа зодоогүй. Тэр хүүхдийн шүдийг нь хугалах битгий хэл биед нь гар хүрсэн удаагүй. Манай нөхөр сургуулийн захирлаар ажилладаг учраас бидний нэр төрийг гутаан доромжлох, муухай харагдуулахыг хүсэж байгаа хэсэг хүний зохион байгуулалттайгаар хийж байгаа ажил. Би нэр төрөө сэргээлгэхээр цагдаагийн байгууллагад хандсан байгаа. Мөрдөн шалгалтаар бүх зүйл тодорхой болно.Тэр үед тодорхой мэдээлэл өгье” гэлээ.