Архангай аймгийн Өндөр-Улаан сумын Азарга багийн малчин Д-ийнд байсан 10 настай эрэгтэй хүүхэд бууны суманд өртөж, амиа алдсан харамсалтай хэрэг гарсан. Тодруулбал, энэ хэргийн тухай дуудлага өнгөрсөн аравдугаар сарын 13-ны 22.55 цагт цагдаагийн байгууллагад ирсэн байдаг. Дуудлагын дагуу  тус сумын хэсгийн төлөөлөгч хэргийн газарт ажиллаж, урьдчилсан байдлаар 10 настай эрэгтэй Х-г хүргэн ах болох 38 настай эрэгтэй Д гэгч нь сум алдаж амийг нь хохироосон байж болзошгүй нөхцөл байдал тогтоогдсон юм.

Тэгвэл сум алдаж, 10 настай хүүг буудаж, амийг нь хөнөөсөн этгээдэд гурван жилийн хорих ял оноожээ. Энэ талаар сум алдсан гэх Д-ийн аав В-аас тодрууллаа.

   Тэрбээр “Хүү минь санамсар болгоомжгүйгээр сум алдаж, 10 настай хүүгийн аминд хүрсэн нь тогтоогдсон. Ийм хэрэг гарсанд маш их харамсаж, одоо ч хүртэл итгэхгүй байна. Хүү минь тэр өдрийн болсон явдалд маш их гэмшиж, талийгаач дүүгийнхээ араас гашуудаж байгаа. Хүүд минь шүүхээс гурван жилийн тэнсэн харгалзах ял оноосон. Сар болгон очиж, цагдаагийн байгууллагад бүртгүүлэх юм билээ. Хүү минь хөдөө гэртээ эхнэр, хүүхэдтэйгээ хамт байгаа. Мөн талийгаач хүүгийн эмээ нь хүүгийнхтэй минь айл хамт байдаг юм” гэлээ.

Хэргийг эргэн сануулбал, бүтэн өнчин хүү эмээтэйгээ цуг хүргэн ахынхаа хажууд амьдардаг байсан юм. Тэрээр тавдугаар ангийн сурагч байсан бөгөөд хэрэг гардаг өдөр хичээлээсээ чөлөө аваад, хөдөө гэртээ ирчихсэн байсан билээ. Түүний хүргэн ах болох 38 настай Д нь хониндоо явж ирээд, буугаа байрлуулахдаа сум алдаж, хүүгийн тархинд нь буудаж, амийг нь хөнөөсөн гэх. Хэрэг гарах үед хүүгийн эгч, эмээ сумын төв яваад эзгүй байсан юм.

Мөн хэргийн дараа хүүг өмнө нь заазуурдуулж байсан гэх мэдээлэл цацагдсан билээ. Энэ талаар Д-ийн аав В хэлэхдээ “10 настай хүүг талийгаач ээж нь заазуурдаж байсан. Энэ талаар манай эмнэлэг, сумынхан мэднэ, гэрчилнэ. Миний хүү талийгаач дүүгээ заазуурдаж байгаагүй” гэлээ.