Зам тээврийн ноцтой осол гарч, замын хажууд зогсож байсан гурван эмэгтэй хүнд бэртсэн билээ. Тодруулбал, гуравдугаар сарын 28-ны 22:59 цагийн орчимд Мерседес бенз маркийн автомашин замын хажууд такси барих гээд зогсож байсан гурван иргэнийг дайрч хүнд гэмтээсэн юм. Осолд орсон гурван эмэгтэйн биеийн байдал хүнд, хэд хэдэн удаа хагалгаанд орж, Гэмтэл согог судлалын үндэсний төвд хэвтэн эмчлүүлж байна. Мөн осол гаргасан жолоочийн биеийн байдал хүнд, эмчлүүлж байгаа юм.

       Энэ талаар Тээврийн цагдаагийн албанаас мэдээлэхдээ “2022 оны гуравдугаар сарын 28-наас 29-ны шилжих шөнө 23:00 цагийн орчим Сүхбаатар дүүргийн нутаг нэгдүгээр хороо UB mart худалдааны төвийн урд замд гарсан зам тээврийн ослын дуудлага мэдээллийн дагуу хэргийн газрын үзлэгийг хийж шалгалтын ажиллагааг явуулсан. Ослын нөхцөл байдлыг авч үзэхэд “Приус-20” маркийн автомашины жолооч нь үргэлжилсэн цагаан шугам давж эргэснээс Мерседес Бенз маркийн автомашинтай мөргөлдөж улмаар такси барихаар зогсож байсан гурван иргэнийг мөргөж гэмтээсэн нөхцөл байдал урьдчилсан байдлаар илэрсэн. Холбогдогч жолооч нарын согтууруулах ундааны зүйл хэрэглэсэн эсэх согтолтын зэргийг шалгахад архи согтууруулах ундааны зүйл хэрэглээгүй нь тогтоогдсон” гэсэн билээ.

Тэгвэл бид үргэлжилсэн цагаан зураас давж эргэсэн мөнгөлөг өнгийн “Приус-20” маркийн жолоочтой холбогдож, хэргийн талаар тодруулахад “Ослын талаар би юу ч мэдэхгүй. Одоохондоо шокын байдалтай байгаа учраас ямар ч мэдээлэл өгөх боломжгүй” хэмээлээ.