Цагдаагийн газарт гэрчийн мэдүүлэг өгөхөөр очсон иргэний биед цагдаагийн албан хаагч халдаж, ёс бус харьцаж байгаа бичлэг цахим орчинд цацагдаад байна. Бид энэ талаар хохирогч бүсгүй А-тай холбогдож, тодрууллаа.

-Юу болсон талаар та тодорхой мэдээлэл өгөхгүй юу?

           -Өнөөдөр Сүхбаатар дүүргийн цагдаагийн нэгдүгээр хэлтэст гэрчийн мэдүүлэг өгөхөөр Н гэх байцаагчийн өрөөнд очсон. Бага насны хүүхдүүд олон нийтийн газарт танхайрсан хэрэгт гэрчийн мэдүүлэг өгөх байсан юм. Намайг очиход байцаагч Н “Принтерийн хороо цэнэглээд ирье. Хүлээж байгаарай” гээд мэдүүлэг өгөх өрөөнөөс гарсан. Өрөөнд би, хоёр цагдаа, нэг мэдүүлэг өгч байсан үлдсэн юм. Би байцаагчийг гарахад нь ариун цэврийн өрөө орохоор суудлаасаа боссон. Гэтэл цагдаа Б гэх хүн намайг түлхэж, өрөөнөөс гаргахгүй гэж уурласан. Дээрэнгүй харьцаж, миний гар руу хэд хэдэн удаа цохиж, биед минь халдсан. Би бичлэг хийвэл зүгээр болчих байх гэж бодоод утсаа гаргаж ирээд камераа нээсэн. Гэтэл миний утсыг булааж, аваад элдвээр харааж, загнасан.

-Өрөөнөөс яаж гарсан юм бэ?

         -Арай гэж зугтааж, хаалгаа түлхээд гарсан. Цагдаа миний утсыг хураагаад авчихсан болохоор яаж ч магадгүй гэж үнэндээ айсан. Ар гэрийнхэн маань надтай хамт явж байсан бөгөөд намайг нэгдүгээр давхарт хүлээж байсан. Би өрөөнөөс гараад цахилгаан шатанд суух гэтэл гурван цагдааг араас минь явуулж, “Наадхаа бариад ав” гээд хашхираад байсан. Тэгэхээр нь би “Таны цагдаагийн ажилтны .. дүрмийг зөрчсөн” гэж дотоод хяналт, шалгалтад чинь хэлнэ” гэсэн юм. Тэгээд тэр цагдаа дуугүй болчихсон. Би хуулийн ангид сурдаг учраас цагдаагийн дотоод журмыг мэддэг. Хэрэв өөр хүн байсан бол тэр цагдаа хүчирхийллээ үйлдсээр л байсан байх. Шатаар арай гэж гүйгээд ар гэрийнхэндээ очиж хэл дуулгаж, утсаа авсан.

-Байцаалт өгөхөөр ороход чинь “Утсаа унтраа” гэж хэлсэн үү?  

          -Үгүй ээ. Байцаалт эхлээгүй байсан болохоор хэлээгүй байх. Гэрчийн мэдүүлгийг олон хүний нүдэн дээр авах гэж байсныг, “Намайг өрөөнөөс гарлаа” гэх шалтгаанаар зодож, танхайрч, айлган сүрдүүлснийг би ерөөсөө ойлгохгүй байна. Би дөнгөж 22 настай учраас жаахан харагдсан байж магад. Тийм болохоор дээрэлхсэн юм болов уу гэж бодож байна. Гэхдээ тэр цагдаад миний гарч, орох ямар ч хамаагүй шүү дээ.

-Та нэрийг нь асуусан уу?

       -“Чи яваад асуугаарай” гээд нэрээ хэлээд, хашхираад байсан.

-Энэ бүх үйл явдлыг өрөөнд байсан хоёр хүн гэрчлэх юм байна, тийм үү?

         -Тийм ээ, хоёр гэрч байгаа. Бичлэг дээр “Хоёр, гурван гэрчтэй шүү. Би чамайг зодоогүй” гээд худлаа яриад байна лээ. Тэр цагдаа миний утсан дээр бичлэг байгаа гэдгийг мэдээгүй юм шиг байна. Тэгээд л утсыг маань буцааж өгсөн байх.

-Таны бие зүгээр үү?

           -Биед маань гэмтэл учраагүй. Гэмтэл учрахаар зодоогүй. Гэхдээ маш их айдастай байна. Гэрчийн мэдүүлэг өгөхөөр очоод л цагдаад элдвээр хэлүүлж, зодууллаа шүү дээ. Цахим орчинд бичлэг цацсанаас хойш миний утас руу танихгүй олон дугаар залгаж байна.