Зэвсэгт хүчний 336 дугаар ангийн хөгжимчин ахлагч өөрийгөө шатаасан хэрэг гарчээ. Тодруулбал, хоёрдугаар сарын 13-ны 00:50 цагт тус ангийн хөгжмийн салааны ахлагч О өөр дээрээ их хэмжээний шатахуун асгаж, амиа егүүтгэхийг завдсан байна.

            Цэргийн ангид дарамт шахалт байсан уу, ахлагч залуу ямар шалтгааны улмаас өөрийгөө шатаасан, биеийн байдал нь ямар байгаа талаар 336 дугаар ангийн захирагч А.Болдбаатараас тодрууллаа.

             Тэрбээр “Өөрийгөө шатаасан алба хаагчийн биеийн байдал дээрдэж байгаа. Хоол, ундаа идэж чадаж байгаа гэсэн. Аймгийн нэгдсэн эмнэлэгт хэвтэн эмчлүүлж байгаа. Эмчлэгч эмчтэй нь холбогдоход “Биеийн байдал нь сайжирч байгаа” гэх мэдээллийг өгсөн. Албан хаагч ямар шалтгааны улмаас ийм үйлдэл хийснийг цагдаагийн байгууллага тогтоох байх. Бид албан хаагчтайгаа уулзаж амжаагүй байна. Уулзах ч боломж байхгүй юм билээ. Албан хаагч Улаанбаатар хот руу шилжих хүсэлт гаргаж байгаагүй. Манай ангид ажилд ороод нэг жил гаруй хугацаа өнгөрч байсан. Гэр нь Зүүнбаянд байдаг. Бид жилийн өмнө нь хөгжмийн салаандаа ерөнхий боловсролын сургууль төгссөн залуучуудыг ажилд авсан юм. Тэр залуусын нэг нь ийм үйлдэл хийсэн. Хэрэг амралтын цагаар, ангийн бус байрлалд гарсан. Манай цэргийн ангид дарамт, шахалт байгаагүй. Өөрөөр мэдээлэл өгөх боломжгүй” гэлээ.

      Цагдаагийн байгууллагаас энэ талаар тодруулахад "Сайншанд сум Зүүнбаян суманд хүн өөрийгөө шатаасан байна” гэсэн мэдээллийг хоёрдугаар сарын 13-ны 00:50-д авч шалгасан. Хэргийн газарт очиход 19 настай О нь өөрийнхөө дээрээс шатахуун асган шатааж, амиа хорлохыг завдсан байсан. Энэ хэргийг  Дорноговь аймаг дахь цагдаагийн газар шалгаж байна. Хохирогчийн биеийн 90 хувийн түлэгдэлтэй эмчлэгдэж байна” гэлээ.