УИХ-ын гишүүн асан Б.Ундармаа 2014 онд Капитал банкны нэр дээр 59 тэрбум төгрөг, 2017 онд “Монгол мах экспо” ХХК-ийн нэр дээр 32 тэрбум төгрөг, 2018 онд “Монгол эм импекс концерн” ХХК-ийн нэр дээр долоон тэрбум төгрөг тус тус зээлсэн. Гэвч зээлээ эргэн төлөөгүйгээс одоо тус зээлүүдийнх нь нийт өр төлбөр нь 96 тэрбум төгрөг хүрч, найдваргүй зээлдэгчдийн эхний эгнээнд жагсаж байна. Энэхүү найдваргүй зээлтэй  нь холбогдуулж, Б.Ундармааг МАН-ын Хяналтын хорооны шийдвэрээр намаас "хөөсөн". Харин нөхөр А.Ариунболдыг нь "гэрчийг дарамталсан..." үндэслэлээр нэг сарын хугацаатай цагдан хориод буй. 

 

Тэгвэл УИХ-ын гишүүн асан Б.Ундармаа 2017 онд “Монгол мах экспо” ХХК-иар Хөгжлийн банкнаас зээл авахдаа барьцаалсан буюу 32 тэрбум төгрөгийн найдваргүй зээлийн барьцаанд ямар хөрөнгүүд байгааг баримтаар үзүүлж байна. 2020 оны зургадугаар сарын 2-нд Сонгинохайрхан дүүргийн Иргэний хэргийн анхан шатны шүүхээс "Хэрвээ “Монгол мах экспо” ХХК Хөгжлийн банканд 32.1 тэрбум төгрөгийн найдваргүй зээлээ төлөхгүй бол зээл авахдаа барьцаанд тавьсан хөрөнгүүдийг хурааж, худалдаалах замаар зээлийг нь төлүүлнэ" гэж шийдвэрлэсэн байдаг. Өөрөөр хэлбэл, "Монгол мах экспо" ХХК зээлээ төлөхгүй бол улсад хураагдахаар хүлээгдэж байгаа үл хөдлөх хөрөнгүүд юм.

         "Монгол мах экспо" ХХК нь УИХ-ын гишүүн асан Б.Ундармаагийн "Бишрэлт групп"-ийн охин компанийн статустай явж ирсэн. Тиймдээ ч тус компани Хөгжлийн банкнаас зээл авахдаа өөрийн компанийн агуулах, оффис, газраас гадна "Бишрэлт групп"-ийн өөр охин компаниуд болох "Бишрэлт пропертиз" ХХК, "Веллмарт" ХХК-ийн үл хөдлөх хөрөнгүүдийг барьцаалжээ. Тэгвэл тус бүрээр нь зурган тайлбартайгаар үзүүлж байна. 

 

1. "Монгол мах экспо" ХХК Хөгжлийн банкнаас зээл авахдаа Сонгинохайрхан дүүргийн XX хороо, Хүнсчдийн гудамжний 75-1 тоот хаягт байршилтай 428м2 талбайтай агуулах, тус бүр нь 356м2 талбайтай хоёр барилгыг 11.000м2 талбайтай газартай нь хамт барьцаалжээ. Энэхүү барьцаануудад дор харагдаж байгаачлан “Бишрэлт индастриал” ХХК-ийн оффис болон Веллмарт салбар дэлгүүр, “Монгол мах экспо” ХХК-ийн махны үйлдвэр, “Бишрэлт” группт харьяалагдах “Юнико” ХХК, “Долфин” ХХК-иудын оффис тус тус байрладаг юм. 

Урдаас

Дээрээс

Хажуугаас буюу зүүн урдаас

---

2. “Монгол мах экспо” ХХК-д Хөгжлийн банкнаас зээл олгуулахын тулд “Бишрэлт групп”-ийн охин компани болох “Бишрэлт пропертиз” ХХК өөрсдийн барьж байсан хотхоноо барьцаанд тавьсан аж. Тухайлбал, тус компани өөрийн эзэмшлийн Хан-Уул дүүргийн XI хороо, Зайсангийн тойруу гудамж, 19 тоот хаягт байршилтай 2870м2 талбайтай үл хөдлөх, 17 тоот хаят байршилтай 4018м2 үл хөдлөх, 15 тоот хаяг байршилтай 3444м2 үл хөдлөх, 9 тоот хаягт байршилтай 1722м2 үл хөдлөх зэргийг барьцаалжээ. Энэхүү үл хөдлөх хөрөнгүүд нь хуучнаар “Зайсан хилл каунти” хотхон буюу одоогийн нэршил нь “Гантиг вилла” хотхон. Өөрөөр хэлбэл, “Бишрэлт пропертиз” ХХК энэ хотхоныг анх “Зайсан хилл каунти” нэрээр барьж, зарахаар захиалга авч байсан. Харин Хөгжлийн банкны барьцаанд тавигдсанаар нэр нь “Гантиг вилла” болж өөрчлөгдсөн. Хэдхэн хоногийн өмнө АТГ-аас “Монгол мах экспо” ХХК-ийн 32 тэрбум төгрөгийн найдваргүй зээлтэй холбоотойгоор “Гантиг вилла” хотхоны есөн блок орон сууцыг битүүмжилсэн гэдгээ зарласан. Яагаад битүүмжилсэн учир нь энэ. 

---

3. “Монгол мах экспо” ХХК-ийн Хөгжлийн банкны зээлд “Бишрэлт групп”-ийн охин компани “Веллмарт” ХХК мөн өөрийн хөрөнгөө барьцаалсан. Тодруулбал, Баянзүрх дүүргийн XII хороо, Цагдаагийн академийн өргөн чөлөө, 63 тоот хаягт байршилтай 4558м2 талбайтай, үйлчилгээний зориулалттай үл хөдлөх хөрөнгө, 1000м2 талбайтай газрыг эзэмших эрхийн хамт барьцаалсан. Энэ барьцаанууд нь Ботаникийн цэцэрлэгт хүрээлэнгийн зүүн талд байрладаг “Велл март” худалдааны төвийн барилга болон газар юм.

Урдаас