Багын найздаа зодуулж, амьсгал хураасан улсын өсөх идэр начин Э.Энхбатын хэргийг шалгаж байна. Одоогийн байдлаар олимпын аварга Н.Түвшинбаярыг цагдан хориод байгаа. Мөн Булган аймгийн ИТХ-ын төлөөлөгч С.Гал-Эрдэнийг яллагдагчаар татах хүсэлтийг прокурорт гаргаад байгаа юм. Учир нь түүнийг “Иргэний үүргээ биелүүлж, зодооныг салгаж, цагдаагийн байгууллагад хандаагүй. Өрөөнийхөө хаалгыг албаар түгжсэн байж болзошгүй” хэмээн буруутгаж байгаа гэх.

Тэгвэл талийгаач Э.Энхбат, Н.Түвшинбаяр нарын зодооныг эхлүүлсэн гэх Булган аймгийн ИТХ-ын дарга Д.Эрдэнэбатыг мөн яллагдагчаар татаж болзошгүй байгаа гэнэ. Талийгаач Э.Энхбат начны ар гэрийнхэн мэдээлэхдээ ““Тэд хамт сууж байгаад Э.Энхбат ариун цэврийн өрөө орсон юм шиг байна лээ. Тэр хойгуур нь Булган аймгийн ИТХ-ын дарга Д.Эрдэнэбат “Энэ Э.Энхбат их томорчихсон байна” гэх мэт турхирсан, өдөөн хатгасан зүйлс хэлсэн шиг байгаа юм. Тэгээд л зодоон эхэлсэн гэсэн” гэж байлаа.

Харин бид тухайн үед ИТХ-ын дарга Д.Эрдэнэбаттай холбогдож, тодруулахад “Би Н.Түвшинбаярт “Энэ Энхбат томорчихсон байна” гэж хэлээгүй. Н.Түвшинбаяр, Э.Энхбат нар намайг явсны дараа зодолдсон байна лээ. Би зодоон болж байхад нь хамт байгаагүй гэсэн үг. Юунаас болж зодолсон талаар нь ч мэдэхгүй. Надаас болж зодоон болоогүй” гэж байсан юм.