БНХАУ-ын хоёр иргэний мөнгийг дээрэмдэж, хэргийн газраас зугтсан хэрэг гарсан талаар бид өмнө нь мэдээлсэн. Тодруулбал, өчигдөр Хан-Уул дүүргийн 11 дүгээр хороо “River garden” хотхонд амьдардаг хятад иргэдийн 1.2 тэрбум төгрөгийг монголчууд дээрэмдэж, танхайрсан хэрэг цагдаагийн байгууллагад бүртгэгдэж, шалгаж байна. Тус хэргийг 24-38 насны монгол залуус үйлдсэн болохыг тогтоож, баривчилсан юм.

Тус хэргийг үйлдсэн нэг эмэгтэй, дөрвөн эрэгтэйгийн гэмт буруутай нь тогтоогдвол Эрүүгийн хуулийн 17.2, 17.4 дэх заалтаар ял шийтгэл оноох ажээ. Тодруулбал, тэднийг хүний эд хөрөнгийг дээрэмдэж, завшсан, эл хэргийг үйлдэхдээ галт зэвсэг ашигласан учраас 5-12 жилийн хорих ял оноох юм байна.

Эрүүгийн хуулийн 17 дугаар зүйл

17.2 ДЭЭРЭМДЭХ

2. Бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон бол хоёр жилээс найман жил хүртэл хугацаагаар хорих ял шийтгэнэ.

3.Энэ гэмт хэргийг:

3.2.зэвсэг, тусгайлан бэлтгэсэн зэвсгийн чанартай зүйл хэрэглэж үйлдсэн;

3.3.зохион байгуулалттай гэмт бүлэг үйлдсэн бол таван жилээс арван хоёр жил хүртэл хугацаагаар хорих ял шийтгэнэ.

Иймд иргэн та амар хялбар аргаар мөнгөтэй болох, бусдын эд хөрөнгийг дээрэмдэх гэмт хэргийг үйлдэхгүй байхыг анхааруулж байна.