“ДАВХАР ДЭЭЛ” I: Төсөвт шунаж, тендер “хамж”, танил талаа тушаал дэвших шат болгосон ТӨЛӨӨЛӨГЧИДТЭЙ ТАНИЛЦ

Б. Цогтбаяр:
Эрэн сурвалжлах

2021-12-20, 3819

-Хотын дарга Д.Сумъяабазараас 10 жил алхам холдоогүй Н.Баярчимэг, Хар машин хакердахыг санаархсан Г.Гангамөрөн, Хувийн компаниараа сүүлийн гурван жил 15 тэрбум төгрөгийн тендер авсан М.Говьсайхан нар цөм Нийслэлийн харьяа агентлагийн дарга, Нийслэлийн өмчит компанийн захирлууд болцгоожээ-

Д.Сумъяабазарын удирдаж буй нийслэлийн бүтэц Захирагчийн ажлын алба, Засаг даргын тамгын газар, хэрэгжүүлэгч агентлагууд, НӨҮГ-ууд, засвар үйлчилгээ, арчлалтын газрууд гээд нийт 100 гаруй газар багтдаг. Өнгөрсөн орон нутгийн сонгуулиар НИТХ-д МАН-аас 34 төлөөлөгч сонгогдсоноос 27 нь “давхар дээл” нөмөрсөн гэх мэдээлэл байна. Өөрөөр хэлбэл, төлөөлөгчийн албан тушаалаасаа гадна дээр дурдсан нийслэлийн харьяа байгууллагуудад дарга, захирлаар томилогдсон гэсэн үг. Тэгвэл Эргэлт.мн мэдээллийн сайт Нийслэлийн Засаг дарга Д.Сумъяабазарын ивээлд багтаж, “давхар дээл” нөмөрсөн төлөөлөгчид болон цүнх баригч, туслах, зөвлөхөөс төлөөлөгч, тэргүүлэгч, дарга, даамал болж мандсан нөхдийг цувралаар танилцуулж байна. Энэ удаагийн дугаарт НИТХ-ын төлөөлөгч М.Говьсайхан, Н.Баярчимэг, Г.Гангамөрөн нарын “давхар дээл”-ний томилгоо болон хувийн бизнесүүдийг нь танилцуулахаар бэлтгэлээ.

“ХҮРЭЛ ОРДОН” ГЭХ КОМПАНИАРАА СОНГИНОХАЙРХАН ДҮҮРГЭЭС 9.5 ТЭРБУМ ТӨГРӨГИЙН ТЕНДЕР АВСАН НИТХ-ЫН ТӨЛӨӨЛӨГЧ М.ГОВЬСАЙХАН “НОСК”-ИЙН ГҮЙЦЭТГЭХ ЗАХИРЛААР АЖИЛЛАЖ БАЙНА

НИТХ-ын төлөөлөгч М.Говьсайхан Нийслэлийн орон сууцны корпораци” ХК-ийн гүйцэтгэх захирлаар томилогдон ажиллаж буй. М.Говьсайхан 2002 онд ШУТИС-ийг ХБТС-ийг Хүнсний технологич мэргэжлээр, 2016 онд “Рояал академи” дээд сургуулийг Эрх зүйч мэргэжлээр төгссөн. “Хүнс тех” ХХК-д эрдэм шинжилгээний ажилтан, “Хүрэл ордон” ХХК-д дэд захирал, “Гальт” ХХК-д дэд захирал, 2016 онд СХД-ийн ИТХ-ын төлөөлөгч, 2019 онд УИХ-ын гишүүний зөвлөхөөр ажиллаж байсан намтартай. М.Говьсайхан 2008 оноос Англид гурван ажил суралцаж, тэр үедээ одоогийн УИХ-ын гишүүн Н.Учралтай танилцаж, найзууд болсон. Улмаар Монголд ирмэгцээ хамтдаа “JCI Улаанбаатар”, ХУД-ийн НАМЗХ-нд элсэж, 2016 онд хамтдаа Сонгинохайрхан дүүргээс нэг нь УИХ-д, нэг нь ИТХ-д нэр дэвшиж, ялалт байгуулснаар улс төрд орсон гэдэг юм билээ.

НИТХ-ын төлөөлөгч, “НОСК”-ийн гүйцэтгэх захирал М.Говьсайхан 2020 оны ХОМ-тээ жилд 100 сая төгрөгийн орлоготой, 2.2 тэрбум төгрөгөөр үнэлэгдэх гурван орон сууц, нэг үйлчилгээний барилгатай, 15 сая төгрөгийн газар, 50 сая төгрөгийн үнэт эдлэл, 38 сая төгрөгийн хадгаламжтай, 616 сая төгрөгийн зээлтэй гэж мэдүүлжээ. Мөн “Хүрэл роуд констракшн” ХХК, “Тресинг Монгол” ХХК-д хувьцаа эзэмшдэг гэсэн байна. Харин 2017 онд Сонгинохайрхан дүүргийн ИТХ-ын төлөөлөгч болохдоо жилд долоон сая төгрөгийн орлоготой, 102 сая төгрөгөөр үнэлэгдэх ганц орон сууцтай, “Хүрэл роуд” ХХК, “Хүрэл ордон” ХХК, “Хүрэл роуд констракшн” ХХК, “Тресинг Монгол” ХХК-тай байжээ. Өөрөөр хэлбэл, гурван жилийн дотор орон сууцных нь тоо 2.1 тэрбум төгрөгийн үнэлгээтэй хоёр орон сууц, үйлчилгээний нэг барилгаар нэмэгдэж, жилийн орлого нь 95 сая төгрөгөөр өсжээ. Тэгвэл яаж түүний орлого ингэж өссөний шалтгааныг хайж үзье.

НИТХ-ын төлөөлөгч, “НОСК”-ийн гүйцэтгэх захирал М.Говьсайханы ХОМ-тээ дурдаж ирсэн “Хүрэл ордон” ХХК нь улсын төсвийн хөрөнгө оруулалттай сургууль, цэцэрлэгүүдийн барилгын тендерт удаа дараа шалгарч иржээ. Ингэхдээ М.Говьсайханыг Сонгинохайрхан дүүргийн ИТХ-ын төлөөлөгчөөр ажиллаж байх хугацаанд “Хүрэл ордон” ХХК нь тус дүүрэгт хэд хэдэн тендерт шалгарчээ. Тухайлбал, 2019 онд Сонгинохайрхан дүүргийн XXIII хороонд улсын төсвийн 5.5 тэрбум төгрөгийн хөрөнгөөр 640 хүүхдийн хүчин чадалтай сургууль барих тендерт шалгарчээ. Мөн энэ онд Сонгинохайрхан дүүрэгт Тусгай хэрэгцээт хүүхдийн цэцэрлэгийн барилга барих 4.0 тэрбум төгрөгийн тендерт шалгарсан байна.

Түүнчлэн өнгөрсөн оны долдугаар сард Хэнтий аймгийн Батноров, Бэрх тосгонд 640 хүүхдийн сургууль барих 4.0 тэрбум төгрөгийн тендер, Батноров, Бэрх тосгоны Ерөнхий боловсролын сургуульд олон улсын стандарт нэвтрүүлэг бэлтгэл ажлыг хангах 1.0 төгрөгийн тендерт тус тус шалгарч байжээ.

Хэд хэдэн барилгын компанитай, зөвхөн нэг компаниараа сонгогдсон тойрог болон Хэнтий аймгаас сүүлийн гурван жилийн дотор 15 тэрбум төгрөгийн тендерт шалгарсан түүхтэй хүнийг “Нийслэлийн орон сууцны корпораци” гэх том байгууллагын захирлаар томилсон нь ашиг сонирхлын асар их зөрчил мөн биз дээ. НИТХ-ын төлөөлөгч М.Говьсайхан УИХ-ын гишүүн Н.Учралын найз, Сонгинохайрхан дүүрэгт ИТХ-ын төлөөлөгч байсан. Тэгвэл Хотын дарга Д.Сумъяабазар, УИХ-ын гишүүн Н.Учрал нар нэг тойргийнх. Нэмээд Сонгинохайрхан дүүрэг бол Д.Сумъяабазарын “эзэнт гүрэн”. Ингээд харвал Н.Говьсайхан дураараа дургих нь аргагүй юм байна л даа.

ХОТЫН ДАРГА Д.СУМЪЯАБАЗАРЫН ХАЖУУГААС 10 ЖИЛ ХОЛДООГҮЙ НИТХ-ЫН ТӨЛӨӨЛӨГЧ Н.БАЯРЧИМЭГ “УЛААНБААТАР ХОТЫН ХӨГЖЛИЙН КОРПОРАЦИ” ХК-ИЙН ГҮЙЦЭТГЭХ ЗАХИРЛААР АЖИЛЛАЖ БАЙНА

Нийслэлийн Засаг дарга Д.Сумъяабазар ажлаа авмагцаа Хүний хөгжил, нийгмийн бодлогын асуудал хариуцсан орлогчоороо Н.Баярчимэгийн томилсон байдаг. Тэгвэл орлогчоос нь чөлөөлөх мөртөө энэ оны гуравдугаар сарын 13-нд нийслэлийн Өмчийн ашиглалт, удирдлагын газрын харьяа “Улаанбаатар хотын хөгжлийн корпораци” ХК-ийн гүйцэтгэх захирлаар томилсон. Н.Баярчимэгийн хувьд Д.Сумъяабазараас сүүлийн 10 жил салахгүй дагаж, түүний нөлөөгөөр албан тушаалд томилогдож яваа эмэгтэй. Тухайлбал, тэр анх 2011 онд Д.Сумъяабазарын багт орсон байдаг. Тодруулбал, “Мобиком”-ийн Зуудмод дахь салбарт мэргэжилтнээр ажиллаж байсан Н.Баярчимэг нь Д.Сумъяабазар, Д.Дагвадорж нарын эзэмшдэг “Үндэсний хөрөнгө оруулалтын банк”-нд 2011 онд хуульчаар ажилд орж, 2016 он хүртэл ахлах хуульч, хэлтсийн дарга болтлоо ажилласан. Улмаар 2016-2017 онд Үндэсний хөгжлийн газрын хуулийн хэлтсийн даргаар ажилласан байдаг. Үндэсний хөгжлийн газрын дарга Б.Баярсайхан нь Д.Сумъяабазарын “Үндэсний хөрөнгө оруулалтын банк”-ны 15.9 хувийн хувьцааг эзэмшдэг, Д.Сумъяабазарын эртний улс төр, бизнесийн итгэлт түнш. Ингэхээр Н.Баярчимэг Үндэсний хөгжлийн газарт ажиллахдаа ч Д.Сумъяабазараас холдоогүй гэсэн үг.

Н.Баярчимэг 2017 оны аравдугаар сард Д.Сумъяабазарыг Уул уурхай, хүнд үйлдвэрийн сайдаар томилогдоход тус яамны Хуулийн хэлтсийн даргаар нь томилогдож, мөн л дагаж явсан. УУХҮЯ-ны Хуулийн хэлтсийн даргаар ажиллаж байгаад хоёр жил орчмын дараа буюу 2018 онд “Эрдэнэс тавантолгой” ХК-ийн дэд захирал болсон. Ахиад жилийн дараа буюу 2019 оны долдугаар сард Засгийн Газраас тогтоол гарч “Эрдэнэс тавантолгой” ХК-ийн охин компани болох “Эрдэнэс тавантолгой майнинг” ХК-ийг байгуулахад мөн л дэд захирал нь болсон байдаг. Тухайн үед үед “Эрдэнэс тавантолгой” ХК-ийн ТУЗ-ийн даргаар Үндэсний хөгжлийн газрын дарга Б.Баярсайхан ажиллаж байлаа. Н.Баярчимэг “Эрдэнэс тавантолгой майнинг” ХК-ийн дэд захирлаар жил орчим ажиллаад Сонгинохайрхан дүүргийн Засаг дарга Ж.Сандагсүрэнгийн орлогч болсон. Сонгинохайрхан бол Д.Сумъяабазарын тойрог, Ж.Сандагсүрэн бол Д.Сумъяабазарын “туслах” байсан, цэвэр түүний хүн. Ингээд Ж.Сандагсүрэнгийн орлогчоор ажиллаж байгаад СХД-ээс НИТХ-ын төлөөлөгч болон дэвшиж, Д.Сумъяабазарын орлогч болж албан ёсоор дэргэд нь ирсэн. Харин одоо Н.Баярчимэг НИТХ-ын тэргүүлэгч, “Улаанбаатар хөгжлийн корпораци” ХК-ийн гүйцэтгэх захирлын албан тушаалтай явна. Ийнхүү өнгөрсөн 10 жилийн турш Д.Сумъяабазарыг салахгүй дагаж, албан тушаалд томилогдож “Мобиком”-ын салбарын мэргэжилтнээс НИТХ-ын тэргүүлэгч, “Улаанбаатар хөгжлийн корпораци” ХК-ийн захирал болж чадсан Н.Баярчимэгийн ХОМ-ийг сонирхъё.

Тэрбээр 2020 оны ХОМ-тээ жилд 230 сая төгрөгийн орлоготой, 205 сая төгрөгийн орон сууцтай, 200 сая төгрөгийн Ланд-200 маркийн автомашинтай, Д.Сумъяабазарын Үндэсний хөрөнгө оруулалтын банк болон Голомт, ХХБ-нд 359 сая төгрөгийн зээлтэй гэж мэдүүлжээ. Хотын даргын хувийн банкнаас 300 сая төгрөгийн зээл аваад, орлогчоор нь томилогдоод, тэгээд болоогүй "давхар дээл" нөмөрнө гэдэг Д.Сумъяабазар, Н.Баярчимэг хоёр хэр ойр болохыг илтгэх биз ээ.

Сонирхуулахад, Н.Баярчимэгийн нөхөр Г.Эрхэмбаяр нь Эрчим хүчний зохицуулах хорооны Ажлын албаны даргаар ажилладаг. Өмнө нь Төрийн өмчийн хороонд мэргэжилтэн, Түлш, эрчим хүчний яаманд мэргэжилтэн, “Улаанбаатар цахилгаан түгээх сүлжээ” ТӨХК-д хэлтсийн дарга, менежерээр ажиллаж байсан. Уг нь тэр эрчим хүчний биш хуулийн салбарын мэргэжилтэй юм билээ.

ХАР МАШИН ХАКЕРДАХЫГ САНААРХСАН ДУУЛИАНЫ ЭЗЭН, НИТХ-ЫН ТӨЛӨӨЛӨГЧ Г.ГАНГАМӨРӨН “НИЙСЛЭЛИЙН ЖИЖИГ ДУНД ҮЙЛДВЭРЛЭЛ, ҮЙЛЧИЛГЭЭГ ДЭМЖИХ ТӨВ” НӨҮГ-ЫН ДАРГААР АЖИЛЛАЖ БАЙНА

НИТХ-ын төлөөлөгч Г.Гангамөрөнг өнгөрсөн оны арванхоёрдугаар сард “Нийслэлийн Жижиг дунд үйлдвэрлэл, үйлчилгээг дэмжих төв” НӨҮГ-ын даргаар томилсон. Манай улсын нийт аж ахуйн нэгжүүдийн 60 орчим хувь нь нийслэлд үйл ажиллагаа явуулдаг гэхээр энэ бол чухал үүрэгтэй байгууллага. Гэхдээ Г.Гангамөрөнгийн хувьд шууд “давхар дээл” нөмрөх хэмжээний сайн нэртэй байгаагүй. Тухайлбал, НИТХ-ын төлөөлөгч, Нийслэлийн жижиг дунд үйлдвэрлэл, үйлчилгээг дэмжих төв” НӨҮГ-ын дарга Г.Гангамөрөн өнгөрсөн намар орон нутгийн сонгуульд өрсөлдөж байхдаа “Хамгийн мэдрэмжгүй сурталчилгаатай нэр дэвшигч” гэгдэж байв. Тодруулбал, түгжрэл дунд автомашин дотроо газан пилетка дээр хоол хийж байгаа зургаа авхуулж, төлөөлөгч болбол түгжрэлийг асуудлыг шийдэхийн төлөө ажиллана гэж ойлгуулахыг оролдсон ч энэ санаа нь эсрэгээрээ эргэж, доромж утга илэрхийлсэн, түгжрэлтэй эвлэрсэн гэгдэж шүүмжлүүлж байв. Мөн Г.Гангамөрөн орон нутгийн сонгуулийн үеэр хар машин хакерддаг гэх хоёр залуутай уулзаж, ярилцаж буй бичлэг нь цахим орчинд цацагдсан. Улмаар санал тоолох хар машиныг хакердуулахыг санаархсан гэж шүүмжлүүлсэн ч тэр төлөөлөгч болж, уг хэрэг нь тэгсхийгээд замхарсан байдаг. Энэ мэтээр хэвлэлээр чичлүүлж, сошиалаар сэвэгдэж байсан Г.Гангамөрөн “давхар дээл” нөмөрсний ар нь хэн бэ гэдэг асуулт гарч ирнэ. Намтраас нь харвал, Ж.Эрдэнэбат, Ж.Ганбаатарын нарыг нөлөөлсөн байж болзошгүй гэж хадаж болох ч “давхар дээл”-ний томилгооны хувьд Ж.Ганбаатар илүү ойр байж болзошгүй. Ж.Ганбаатар Г.Гангамөрөнг НИТХ-д нэр дэвшиж байхад нь сонгуулийн сурталчилгаанд нь зориулж “Манай Г.Ганмөрөн итгэлийг зүтгэлээр хариулдаг хүн” хэмээн магтаж ярилцлага өгч байв. Энэ утгаараа Ж.Ганбаатар Г.Гангамөрөн хоёр ойр, нөгөө талаас Д.Сумъяабазар, Ж.Ганбаатар нар хотын фракц зэргээрээ ойр холбоотой гэж үзвэл, зөвлөхөөрөө ажиллаж байсан хүнээ дарга болж дэвшихэд нь Ж.Ганбаатар Д.Сумъяабазарт түлхэц үзүүлсэн байж болох. Томилгоо жижигддэггүй гэдэг дээ.

Г.Гангамөрөн Радио, телевизийн дээд сургууль, Хэвлэлийн хүрээлэнг төгссөн, сэтгүүлч мэргэжилтэй нэгэн. Тэрбээр мэргэжлээрээ, “Улаанбаатар телевиз”, “Инфо” сонинд сэтгүүлч, “Эмнести интернейшнл” олон улсын байгууллагад зохицуулагч, “Ворлд телевиз”-д захирал, “Дэлхийн чимээ медиа групп” ХХК-д захирлаар ажиллаж байсан намтартай. Түүнийг улс төрийн хүрээлэлд Ж.Эрдэнэбатын хүн гэдэг. Тухайлбал, тэрбээр 2014 онд Ж.Эрдэнэбатыг Сангийн сайдаар ажиллаж байх үед нь зөвлөх нь байсан. Мөн 2016 онд Ерөнхий сайд болоход нь Олон нийт, нийгмийн бодлогын зөвлөхөөр нь ажиллаж байсан. Харин 2020 оноос УИХ-ын гишүүн Ж.Ганбаатарын зөвлөхөөр ажиллаж байгаад НИТХ-ын сонгуульд Баянгол дүүргээс ялалт байгуулж, НИТХ-ын төлөөлөгчөөр сонгогдсон. Тэрбээр өөрийгөө Дандар баатарын зээ охин гэдэг бөгөөд “Домогт Дандар баатар” ном гаргаж, номын нээлтэд нь Ерөнхий сайд асан Ж.Эрдэнэбат, БОАЖЯ-ны дэд сайд Б.Батбаяр, ТНБД Ц.Цэнгэл, Ц.Гарамжав тэргүүтнүүд уригдан оролцож байв.

Г.Гангамөрөнгийн хувийн бизнесийн тухайд “Би Эм Эн Би” ХХК, “Дэлхийн чимээ медиа групп” ХХК, “Алаг морьт дандар баатар” ТББ, “Эй Пи Эм Эй” ХХК-иудыг эзэмшдэг. 2020 оны ХОМ-тээ нэг орон сууцтай, Range Rover автомашинтай, 227 хонь, 120 ямаа, нийт 34 сая төгрөгийн малтай, 20 сая төгрөгийн газартай, 21 сая төгрөгийн хадгаламжтай, 35 сая төгрөгийн авлагатай гэж мэдүүлж байв.

Түүний компаниудаас “Би Эм Эн Би” ХХК, “Дэлхийн чимээ медиа групп” ХХК буюу “Ворлд телевиз” нь идэвхтэй үйл ажиллагаатай байдаг. Энэ компанийн захирлаар нь түүний нөхөр А.Хүрэлбаатар ажилладаг. Тухайлбал, "Би Эм Эн Би" ХХК нь Соёлын яамтай ихэд ойр ажилладаг гэх бөгөөд цайны газрын чиглэлээр үйл ажиллагаа явуулах зөвшөөрөлтэй хэдий ч видео реклам бүтээх чиглэлийн хэд хэдэн тендерт шалгарч байсан түүхтэй. Тухайлбал, БОАЖЯ-ны “Монгол адууны айраг”-ыг дэлхий дахинд сурталчлан таниулж, НҮБ-ын ЮНЕСКО-н соёлын өвд бүртгүүлэх зорилготой богино хэмжээний видео шторк бэлдэх есөн сая төгрөгийн гэрээ, Нийгмийн эрүүл мэндийн үндэсний төвийн видео шторк бэлдэх 60 сая төгрөгийн тендерт ялсан байсан түүхүүд нь байна.

“ДАВХАР ДЭЭЛ” I: Төсөвт шунаж, тендер “хамж”, танил талаа тушаал дэвших шат болгосон ТӨЛӨӨЛӨГЧИДТЭЙ ТАНИЛЦ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3

Сэтгэгдэл үлдээсэн: 2021-12-21 13:29:42

Ажлаа мэдэхгүй хүмүүс л дэвшээд явах юм даа: Энэ Баярчимэг гэж Сумъяабазрын дэвсгэр болсон хүүхэн энэ тэнд очоод самраад явах юмаа. Сумъяабазрынхаа орлогч байхдаа юу ч хийж чадаагүй, чадахгүй байсан болохоор нийслэлийн өмчид ХК-д очуулсан боловч тэндээ очоод бас юу ч хийхгүй, хамаг юмыг нь гацаагаад сайхан сууж байгаа жаатай хүүхэндээ. 2 сая байсан цалингаа 5 сая болгочихоод сайхан идээд хэвтэж байгаа авгайг зайлуулаасай!!!хайран төрийн мөнгө
Сэтгэгдэл үлдээсэн: 2021-12-21 06:59:51

Ти: Амараа авгай чинь Хүрэлбаатартай суучихсан уу
Сэтгэгдэл үлдээсэн: 2021-12-20 21:23:03

Zochin: Ene Gangamurun iim l uchirtai bj taaraa,uuriiguu bainga duviilgusun ********,ertuntsiin huurhun geed uuriiguu bodtson ajlaa bish uuriiguu l bainga gargaj tavina.Ajlaa sain hiigeerei dee,chsmaig ih ajij bgaa shyy Bayangolchyyd!!!

Шинэ мэдээ

Нийтлэлчид