Баянгол дүүргийн 12 дугаар хороо, “Бичил” хорооллын .. дугаар байрны дээврээс хоёр хүн унасан талаар бид өмнө нь мэдээлсэн. Тодруулбал, 13 настай охин, 21 настай залуу нар дээврээс унаж, Гэмтэл согог судлалын үндэсний төвд хүргэгджээ. Харамсалтай нь, өндрөөс унасан 13 настай охин гэмтлээ даалгүй нас баржээ.

           Энэ талаар ЦЕГ-ын Хэвлэл мэдээллийн төвийн дарга Б.Баатархүү сэтгүүлчдэд мэдээлэл өглөө. Тэрбээр “13 настай охин сэхээн амьдруулах тасагт эмчлүүлж байгаад 20:08 цагт амиа алдлаа. Түүнтэй хамт хөл алдаж унасан 21 настай залуугийн биеийн байдал хэвийн байна. Шаардлагатай нарийн шинжилгээг авч байна. Нас барсан 13 настай охин өмнө нь гэрээсээ алга болж, түүний ээж цагдаагийн байгууллагад мэдэгдэж байсан. Охиныг олж тогтоон, шалгалтын ажиллагаа явуулахад талийгаач хойд аавдаа хүчирхийлүүлж байсан байж болзошгүй нөхцөл байдал тогтоогдсон. Хойд аав гэх хүнийг цагдан хорьж, мөрдөн шалгах ажиллагаа явуулж, хэргийг шүүхэд шилжүүлэх саналтай прокурорт арванхоёрдугаар сарын 16-нд хүргүүлээд байсан. Талийгаач охиныг хамгаалалтын байранд авах санал гаргасан ч ээж нь татгалзсан. 21 настай залуугийн хувьд талийгаач охины найзтай хайр сэтгэлийн холбоотой байсан” гэжээ.