Өмнөговь аймгийн ИТХ-ын дарга Б.Бадраа, Ханбогд сумын Засаг дарга Х.Нэхийт нар хууль бусаар газар зарсан гэх мэдээлэл гарсан. Тодруулбал, тэд Ханбогд сумын Цагаан хад суурьшлын бүсэд хууль бусаар газар авч, БНХАУ-ын иргэдэд өндөр үнээр худалдсан байж болзошгүй хэргийг цагдаагийн байгууллага шалгаж байна.

        Хууль хяналтын байгууллагынхан шалгалтын ажиллагаа явуулж, Х.Нэхийт, Б.Бадраа нарын гэр болон албан өрөөнөөс их хэмжээний валют, 300 гаруй сая төгрөг, 10 гаруй килограмм алт хурааж авсан гэх мэдээлэл хэвлэл мэдээллийн хэрэгслээр цацагдаад байна.

Ханбогд сумын Засаг дарга Х.Нэхийт 10 гаруй килограмм алтны талаар хэлэхдээ “Энэ арай л хэтэрч байна. Ийм мэдээг хаанаас, хэн гаргаж олон нийтэд цацаж байгааг гайхаж байгаа. Болох, болохгүйг мэдэхгүй ч бодит эх сурвалжаас үнэнийг хүргэх нь зөв байх. Гэр болон албан өрөөнд нэгжлэг хийж, хууль хяналтын байгууллагаас шалгаж байгаа нь үнэн. Манайх дэлгүүр ажиллуулдаг.  Гэр, дэлгүүрээс 13 сая төгрөг хураан авч, эх үүсвэр тодорхойлохоор аваад явсан. Дэлгүүртээ зарахаар авчирсан найман ширхэг мөнгөн аяга, үйлдвэрийн мөнгө аяга, гар хийцийн гурван ширхэг аягыг эх сурвалжийг батлахаар хураан авсан нь үнэн. Мөн албан ширээний нүдэнд байсан 860 мянган төгрөгийг авч явсан” хэмээлээ.