Өмнөговь аймгийн ИТХ-ын дарга Б.Бадраа, Ханбогд сумын Засаг дарга Х.Нэхийт нар хууль бусаар газар зарсан гэх мэдээлэл гарсан. Тодруулбал, тэд Ханбогд сумын Цагаан хад суурьшлын бүсэд хууль бусаар газар авч, БНХАУ-ын иргэдэд өндөр үнээр худалдсан байж болзошгүй хэргийг цагдаагийн байгууллага шалгаж байна.

                 Цагаан хад суурьшлын бүсэд амралтын газар, нүүрс тээврийн компанийн ажилтнуудын байр барих зориулалтаар их хэмжээний газрыг олгожээ. Ингэхдээ Ханбогд сумын Засаг дарга Х.Нэхийтийн хамаарал бүхий “Хан богд тээвэр ложистик” ХХК, “Говьгурван чулуу” ХХК, ИТХ-ын дарга Б.Бадраагийн хүү Б.Наранболд “Түвшиннаран” ХХК зэрэг аж ахуйн нэгжүүдэд давуу байдал үүсгэж, газар олгосон байж болзошгүй гэнэ. Эрх мэдэл, албан тушаалын байдлаа урвуулан ашиглаж авсан үйлчилгээний зориулалттай газраа тэд цааш нь дамлаж, БНХАУ-ын иргэдэд өндөр үнээр зарсан байж болзошгүй аж.  

Тэгвэл эдгээр этгээдэд газар олгох зөвшөөрөл олгож, хяналтын ажил хийж байх ёстой Ханбогд сумын Газрын даамал М.Оюун-Эрдэнэтэй холбогдож, мэдээлэл авлаа.

     Тэрбээр “Газрын наймааны асуудал яг одоо шалгагдаж байна. Ийм учраас би нарийн мэдээлэл өгөхгүй. Цагдаа, шүүх нь тогтоох байлгүй” гэлээ.