-ХУУЧИН БАРААГ НЬ ХУДАЛДАЖ АВААГҮЙ ФИЗИКИЙН БАГШ Х-Г ГЭРЭЭГ НЬ СУНГАЛГҮЙ, АЖЛААС НЬ ХАЛЖЭЭ-

Авлигын хэрэгт удаа дараа нэр холбогдсон ч хариуцлага хүлээдэггүй эрхэм бол “Монгол-Орос”-ын хамтарсан III сургуулийн захирал Ж.Соронзон. Түүнтэй холбоотой хар бараан мэдээллүүд сүүлийн арван жилийн турш хэвлэлээр хөвөрч, эцэст нь хэрэг хаана замхарсан нь мэдэгдэхгүй алга болдог. Тэгвэл түүнтэй холбоотой гомдол, мэдээлэл дахин гарах болжээ. Түүнийг авлигын хэргээр шалгуулахаар сургуулийнх нь нэр бүхий багш нар Авлигатай тэмцэх газар хандсан талаар эх сурвалж мэдээллээ.

            Тодруулбал, 28 жилийн түүхтэй Монгол-Орос”-ын хамтарсан III сургуулийн захирал Ж.Соронзон нь ОХУ-аас ирсэн багш нараа дарамталдаг, хясан богдуулдаг, хууль бусаар ажлаас нь халдаг, хуучин бараа, эд зүйлс сургуулийн багш нартаа зарж, шахдаг талаарх ноцтой баримт хууль хяналтын байгууллагад иржээ. Тэрбээр ажилтнуудынхаа цалинг буухаас өмнө багш нартаа хуучин бараа, эд зүйлс их хэмжээгээр шахдаг гэнэ. Мөнгийг нь цалингаас нь суутгаж, эсэргүүцэл үзүүлсэн тохиолдолд торгуулийн арга хэмжээ авч, бүр ажлаас нь хүртэл халж байсан гэнэ.

      Энэ талаар эх сурвалжийн өгсөн мэдээллээр “2020-2021 оны хичээлийн жилд ажиллаж байгаа орос багш нарын төлөөл АТГ-т өргөдөл гаргасан нь үнэн.  Ж.Соронзон нь зарж байгаа эд зүйлийг авахгүй тохиолдолд торгож, шийтгэл ногдуулдаг. Бүр цаашлаад эсэргүүцэл үзүүлсэн тохиолдолд орос багш нарын хөдөлмөрийн гэрээг сунгадаггүй. Тухайлбал, 2020-2021 онд хичээлийн жилд Ж.Соронзон захирлын хууль бус ажиллагааг эсэргүүцсэн физикийн орос багш Х-ийн хөдөлмөрийн гэрээг сунгаагүй, хавчин богдуулсан. Хөдөлмөрийн гэрээг нь сунгаагүй Х багш ажиллах боломжгүй болсон учраас ОХУ-аасаа ирээгүй. Тэр уг нь маш сайн багш байсан. Хууль бус үйлдлийг удаа дараа гаргаж, их хэмжээний мөнгө олж байгаа сургуулийн захирал Ж.Соронзонг хууль хяналтын байгууллагаар шалгуулахыг хүсэж, АТГ-т өргөдөл гаргасан.Орос багш нар бид эцсээ хүртэл тэмцэж, үнэн мөнийг тогтоолгох болно” гэлээ.

Ж.СОРОНЗОН: БИ БАГШ НАРТАА ХУУЧИН БАРАА ЗАРААГҮЙ, ХЭРЭВ ХУДАЛ МЭДЭЭЛЭЛ ЦАЦВАЛ ӨНДӨР ТҮВШИНД ЗАРГАЛДАНА

Тэгвэл бид мэдээллийг тэнцвэртэй хүргэх үүднээс “Монгол-Орос”-ын хамтарсан III сургуулийн захирал Ж.Соронзонтой холбогдож, энэ талаар тодруулсан юм.

-Таны багш нартаа хуучин бараа зардаг, хясан богдуулж, их хэмжээний мөнгө олж байна гэх мэдээлэл гарсан. Энэ талаар тодруулах гэсэн юм?

              -Орос багш нараас гомдол гаргаж, АТГ руу явсан бичиг байхгүй. Манай сургуульд ОХУ-ын 160 багш ажиллаж байгаа. Эдгээр багшаас гомдол гаргасан хүн байхгүй. Худлаа, үнэн мэдээлэл тарааж, хүний нэр төрд халдах хэрэггүй.

-Та багш нарынхаа цалинг буухаас өмнө хуучин бараа нийлүүлдэг гэсэн шүү дээ?

           -Би хаанаасаа ямар хуучин бараа авч, багш нартаа зарах юм бэ. Хэн намайг зарсан гээд байгаа юм бэ.

-Таны тушаалыг эсэргүүцэж, барааг чинь худалдаж аваагүй багш нараа ажлаас нь халдаг гэсэн. Энэ талаар та юу хэлэх вэ?

          -Тодорхой шалтгааны улмаас ажлаасаа халагдсан багш нар олон шүү дээ. Монголын эсрэг ажилласан М гэх багш ажлаасаа халагдсан. Оросын өмчийн асуудлаар сургуулийн эсрэг ажилласан багш байгаа. Тэр хүний охин гэж хүн бас манай сургуульд ажиллаж байгаад олон хүнээс мөнгө зээлсэн, эцэг, эхчүүдэд үнэгүй номыг үнэтэй зарсан хэргээр ажлаасаа халагдсан. Энэ хүмүүсийн явуулж байгаа явууллага, худлаа, үнэн нь мэдэгдэхгүй мэдээлэл явж байгаа нь тэр. АТГ-аас одоогийн байдлаар надтай холбоо тогтоож, дуудсан хүн байхгүй. Хэрэв худал мэдээллийг цацах юм бол би чамтай дараа нь өндөр түвшинд заргалдана шүү. Цагдаагаар заргалдана шүү.

-Та физикийн багш Х-г бараа худалдаж аваагүй гэх үндэслэлээр гэрээг нь сунгаагүй гэсэн. Энэ үнэн үү?

         -Тийм зүйл байхгүй. Физикийн багш Х гэх багш нь өөрөө гэрээгээ сунгаагүй, ажилдаа ирээгүй. Энэ хүнтэй хэл ам болж, маргалдсан зүйл байхгүй. Манай сургууль 200 багштай. Энэ дотор олон янзын багш нар бий. Зарим нь хоёр, гурван жил ажилладаг. Зарим нь нэг жил ажиллаад ар гэрийн асуудлаар ажлаасаа гардаг. Дээрээс нь муу ажилласан учраас сургууль гэрээгээ сунгах байх тохиолдол бий" гэх тайлбарыг өглөө.