Өнгөрсөн долдугаар сард Сэлэнгэ аймгийн Ерөө суманд самар түүхээр явсан дөрвөн иргэн төөрч, сураггүй алга болоод байсан билээ. Төөрсөн иргэдийг эрэн хайх ажиллагааг холбогдох албаныхан зохион байгуулж, эсэн мэнд олж, ар гэрийнхэнд нь хүлээлгэн өгсөн байдаг.

Иргэд зарын дагуу Сэлэнгэ аймгийн Мандал сумын харьяат Ц.Болдоо, Ч.Мөнхсайхан нартай холбогдож, самарт явсан гэдэг. Тэд самарт явсан төлбөрөө аваагүй, дээрээс нь сэтгэл санааны болон бие махбодын хохиролтой байгаа талаараа мэдэгдээд байгаа билээ.

Бид иргэдийг самарт авч явсан гэх Ч.Мөнхсайхантай холбогдож, дараах тодруулгыг авлаа.

Тэрбээр “Намайг болон хүргэн ах Ц.Болдоог цагдаагийн байгууллагаас шалгаагүй. Бид иргэдийг самарт авч явсан ч төөрүүлж орхиогүй. Энэ асуудал тухайн цаг үедээ болоод дууссан. Би ууланд хүмүүсээ ахалж байсан ч хамт явсан хүний бие муудахаар нь хэл дуулгахаар түрүүлж ирсэн. Зүүнхараагаас хоол, ундаа зохицуулаад очих хооронд дөрвөн иргэн хамт явсан хүмүүсээ төөрч, алга болсон байна лээ. Өөрсдөө замаа мэдэх юм шиг түрүүлж явсан байгаа юм. Тэр хүмүүст мөнгө өгч чадахгүй. Бид цайруулсан зургаан тонн самар, хоёр машинаа хээр хаяад ирсэн. Үүнээс гадна төөрсөн иргэдийг эрэн хайх ажиллагааг хувийн нисдэг компанитай хамтарч, гурван удаа зохион байгуулсан. Үүний төлбөрийг хүргэн ах Болдоо гаргасан. Болдоо ах харвачихсан учраас биеийн байдал нь муу байна. Бид анх явахдаа хүмүүстээ ойд төөрвөл яах вэ гэх заавар зөвлөгөөг өгч, шаардлагатай арга хэмжээг авч, гарын үсэг зуруулсан байгаа. Мөн иргэдийг олсныхоо дараа “Мөнгө авна” гэж үзвэл шүүхэд хандаарай гэж хэлсэн. Тэд өөрсдөө “Амьд ирсэн нь болсон” гэж хэлж байсан шүү дээ” гэх тайлбарыг өглөө.