Говь-Алтай аймгийн Алтай сумын Хилийн цэргийн 0214 дүгээр ангийн Баянтоорой заставын хугацаат цэргийн алба хаагчид өнгөрсөн дөрөвдүгээр сарын 8-ны 18:00 цагийн үед харуулын даргаа хөнөөгөөд зугтсан хэрэг гарсан.

          Байлдагч Х, М нарт холбогдох хэрэгт Говь-Алтай аймгийн прокурорын газраас Эрүүгийн хуулийн тусгай ангийн 10.1 дүгээр зүйлийн 2.4, 2.9, 2.11, 28.5 дугаар зүйлийн 1, 28.7 дугаар зүйлийн 2, 28.8 дугаар зүйлийн 1, 28.15 дугаар зүйлийн 1, 17.2 дугаар зүйлийн 3.2 дахь хэсэгт зааснаар яллах дүгнэлт үйлдэн тус аймаг дахь Эрүүгийн хэргийн анхан шатны шүүхэд шилжүүлэн шийдвэрлүүлсэн байдаг.

Шүүгдэгч М, Х нарт холбогдох хэргийн шүүх хуралдаан өнгөрсөн есдүгээр сарын 29-нд Говь-Алтай аймаг дахь сум дундын Эрүүгийн хэргийн анхан шатны шүүхэд болохоор товлогдсон ч хойшилсон юм. Учир нь, шүүгдэгч нарын өмгөөлөгч нь өвчтэй гэх шалтгаанаар шүүх хурлыг тодорхойгүй хугацаагаар хойшлуулах шийдвэр гаргасан билээ.

Бид Ховд аймгийн Чандмань сумаас цэргийн албанд татагдсан байлдагчийн аав О-оос хэргийн явцын талаар тодрууллаа.

Байлдагч Х-ийн аав О “Шүүх хурал болох үеэр хүүтэйгээ очиж уулзсан. Шилэн цонхны цаанаас хажуудаа хянагчтайгаар хэдхэн минут утсаар ярьсан. Учиргүй уйлаад л юу ч ярьж чадахгүй байна лээ. Хийсэн хэрэгтээ маш их гэмшиж, харамсаж байна гээд уйлаад л байдаг. Шүүх хурал тодорхойгүй хугацаагаар хойшилсон учраас хэзээ товлогдохыг нь мэдэхгүй. Утсаа чагнаад, шүүх хурлын тов хүлээгээд л сууж байна. Хүү минь хүн харахын аргагүй турж эцсэн байна лээ. Анх хорихдоо амиа хорлож болзошгүй гэх үүднээс гавтай байлгаж байсан. Харин одоо гавыг нь тайлсан байна лээ” гэв.