Архангай аймгийн Өндөр-Улаан сумын Азрага багийн малчин Д-ийнд байсан 10 настай эрэгтэй хүүхэд бууны суманд өртөж, амиа алдсан харамсалтай хэрэг гарсан. Тодруулбал, энэ хэргийн тухай дуудлага аравдугаар сарын 13-ны 22:55 цагт цагдаагийн байгууллагад ирсэн байдаг. Дуудлагын дагуу  тус сумын хэсгийн төлөөлөгч хэргийн газарт ажиллаж, урьдчилсан байдлаар 10 настай эрэгтэй Х-г 38 настай эрэгтэй Д гэгч нь сум алдаж амийг нь хохироосон байж болзошгүй нөхцөл байдал тогтоогдоод байгаа. Сэжигтэн В.Д-г саатуулж, 10 настай хүүг санаатайгаар буудсан уу, санамсаргүй сум алдсан уу гэдгийг шалгаж байна.

Талийгаач хүү бүтэн өнчин байсан бөгөөд эмээтэйгээ амьдардаг байсан юм. Хүү сумынхаа бага сургуулийн тавдугаар ангид сурдаг байжээ. Хэрэг гарах үед хичээлдээ яваагүй бөгөөд цахимаар сурч байсан аж. 

Хэрэг гарах үед талийгаач хүү зурагт үзэж байсан хэмээн сэжигтэн Д-ийн аав В ярьсан. Тэрбээр "Сум талийгаачийн нүднийх нь доогуур орж, толгойгоор нь нэвт гарсан байна гэсэн. Эмнэлгийн тусламж авч чадалгүй газар дээрээ нас барсан. Үнэхээр харамсалтай хэрэг боллоо. Миний хүү талийгаач хоёр сайхан харилцаатай, ах, дүү байсан" гэсэн билээ. 

Шалгалтын ажиллагаагаар Д нь санамсар болгоомжгүйгээр хүний амь бүрэлгэсэн нь тогтоогдвол 1-5 жилийн хугацаанд зорчих эрхийг хязгаарлах, эсхүл 1-5 жилийн хорих ял оноох хуулийн заалттай.