Налайх дүүргийн зургадугаар хорооны нутаг дэвсгэрт байрлах "Тэнгэрийн энерги" бясалгалын төвөөс өнгөрсөн 2020 оны долоодугаар сарын 31-ний 22:35 цагийн орчим сураггүй алга болсон 25 настай эмэгтэй О-ийн цогцсыг нүхэн жорлонгоос олсон талаар бид өмнө нь мэдээлсэн.

        Тодруулбал, бясалгал хийхээр гэрээсээ гараад ор сураггүй алга болсон эмэгтэйг ар гэрийнхэн болон Онцгой байдлын алба хаагчид хамтран эрэн хайх ажиллагаа явуулсан боловч үр дүнд хүрээгүй тул түр хугацаанд зогсоогоод байсан юм. Тэгвэл өчигдөр 16:36 цагт цагдаагийн байгууллагад “Налайх дүүргийн зургадугаар хороонд хүний цогцос байна” гэх дуудлагын дуудлага ирсэн аж. Дуудлагын дагуу Налайх дүүргийн Эрэн хайх, аврах бүлгийн алба хаагчид 30 км замыг туулан 17:36 цагт очиж, дөрвөн метрийн гүнтэй нүхэнд байсан цогцсыг есөн минут ажиллаж гарган тус дүүргийн цагдаагийн хэлтэст хүлээлгэн өгсөн байна.

Энэ талаар Цагдаагийн ерөнхий газрын Хэвлэл мэдээллийн төвийн мэргэжилтнээс тодруулахад “Одоогоор шалгалтын ажиллагаа үргэлжилж байгаа тул дэлгэрэнгүй мэдээлэл өгөх боломжгүй" гэсэн билээ.

      Харин бид талийгаачийн ээжтэй холбогдож, хэргийн талаар тодрууллаа. Тэрбээр “Охины минь алга болоод жил гаруй хугацаа өнгөрч байна. Энэ хугацаанд хайгаагүй нэг ч өдөр байхгүй. Одоогийн байдлаар миний охины цогцос олдсон гэж хэн ч бидэнд хэлээгүй байна. Ар гэрийнхэнд нь мэдэгдээгүй хэрнэ олон нийтийн сүлжээгээр ийм мэдээлэл явж байгаад гайхаж байна. Миний охин олдоогүй. Цогцсыг нь ч хараагүй байна” гэв.