Монгол Улсын нутаг дэвсгэрээс олдсон байж болзошгүй түүх, соёл, археологийн нэн эртний Хүннүгийн үед хамаарах “Шилэн гүц”, “Хаш тээг” зэрэг нэн эртний олдворыг хууль бусаар борлуулах гэж байсан бүлэг этгээдийг гуравдугаар сарын 25-ны өдөр Цагдаагийн ерөнхий газрын Эрүүгийн цагдаагийн албаны алба хаагчид илрүүлсэн байдаг.

            Тус олдворыг Археологич, доктор Д.Эрдэнэбаатарын дагавар хүү А гэгч бусадтай бүлэглэн хууль бусаар худалдах гэж байсан гэх мэдээлэл бий. Эл хэрэгтэй холбоотойгоор Археологич Д.Эрдэнэбаатарт яллах дүгнэлт үйлдэж, хууль хяналтын байгууллагаас шалгаж байгаа гэнэ.

Энэ талаар Археологич, доктор Д.Эрдэнэбаатараас тодруулахад “Намайг шалгаж байгаа эсэхийг хууль хяналтын байгууллагаас асуу. Худлаа мэдээлэл түгээхгүй байхыг хүсье. Намайг хуулийн байгууллагаас шалгаагүй. Би хүүдээ үнэт олдвор өгөөгүй” гэлээ.

Тус этгээдүүдийн хууль бусаар борлуулах гэж байсан түүхэн олдворуудтай ижил бүтээлүүдийг төрийн өмчит Улаанбаатар их сургуулийн багш, оюутны сургалт, эрдэм шинжилгээний ажлын хүрээнд 2001-2011 онд Архангай аймгийн Өндөр-Улаан сумын Хануй багийн нутаг Хануй голын хөндий дэх хүрэл зэвсгийн эрин үеийн хиргисүүр, буган чулуун хөшөө бүхий газар, Балгасан тал буюу Гол мод II хэмээх газар хүннүгийн хаад, язгууртны булш бүхий бүлэг дурсгалтай газраас олсон судалгааны бүтээлүүдтэй төстэй байж болзошгүй байгаа юм.