Говь-Алтай аймгийн Алтай сумын Хилийн цэргийн 0214 дүгээр ангийн Баянтоорой заставын хугацаат цэргийн алба хаагчид өнгөрсөн дөрөвдүгээр сарын 8-ны 18:00 цагийн үед харуулын даргаа хөнөөгөөд зугтсан хэрэг гарсан билээ. Байлдагч Х, М нар харуулын манаанд явж ирээд, харуулын дарга Г-ийн цээжин тус газарт гурван удаа буудаж, амийг нь хөнөөсөн гэдэг. Буу, сумтай уул руу зугтсан хоёр байлдагчийг дөрөвдүгээр сарын 11-нд баривчилж, Говь-Алтай аймагт цагдан хориод байсан юм. Тэгвэл байлдагч нарын хэргийг шалгаж дуусаад, шүүхэд шилжүүлжээ.

            Энэ талаар Ховд аймгийн Чандмань сумаас цэргийн албанд татагдсан байлдагч О.Х-ийн ааваас тодруулахад “Бид хэрэг гарснаас хойш хүүтэйгээ нэг л удаа уулзсан. Шилэн цонхны цаанаас уйлсаар байгаад л тарцгаасан. Тэрнээс хойш хүүтэйгээ уулзаж, холбоо барьж чадаагүй байна. Өмгөөлөгч маань хүүтэй уулзаж байгаа. Хүүгийн минь хэргийг шалгаад, шүүхэд шилжүүлсэн гэсэн. Гэхдээ шүүх хурлын тов гараагүй байгаа. Хүлээхээс өөр авч чадах арга хэмжээгүй л гэртээ байна даа. Хүүгийн минь биеийн байдал давгүй байгаа гэсэн. Биднийг очиход гавтай хорьж байсан. Харин одоо гавыг нь тайлсан юм шиг байна лээ. Хүүгээсээ холбоо тасарч, шүүх хурлын тов хэзээ товлогдохыг л хүлээж сууна даа” гэв.