Сураггүй болсон иргэдийн цогцсыг Эгийн голын гүүрний далангаас олжээ. Тодруулбал, Булган аймгийн Тэшиг сумын харьяат 52 настай М, 40 настай Н нар есдүгээр сарын 3-нд гэрээсээ гарч, сураггүй алга болсон байдаг. Алга болсон иргэдийн нэг нь гэрт нь ирсэн зочдоо гаргаж өгөхөөр яваад сураггүй болжээ. Харин нөгөө нь сумын төв орж, хоол, хүнсний бүтээгдэхүүн авахаар яваад алга болсон гэнэ. Алга болсон иргэдийн унаж явсан мотоциклыг нь энэ сарын 6-ны өдөр Эгийн голын бетон гүүрний дэргэдээс олж, эрлийн ажиллагааг тэр хэсэгт эхлүүлсэн юм. Тэгвэл иргэдийн цогцсыг Эгийн голын гүүрний далангаас олж, ар гэрийнхэнд нь хүлээлгэн өгчээ.

             Энэ талаар тус сумын Засаг даргаас тодрууллаа. Тэрбээр “Эгийн голд нас барсан иргэд эхнэр, хүүхдийн хамт Тэшиг суманд мал маллаж амьдардаг байсан. Иргэд юунаас болж осолдсон гэдгийг цагдаагийн байгууллага шалгаж байна. Амиа алдсан иргэд хэрэг гарахад согтуу байсан эсэхийг хуулийн байгууллагаас тогтоох байх. Тухайн үед нас барсан хоёр иргэний нэг нь гэрт нь ирсэн хүмүүсийг гаргаж өгөхөөр Эгийн голын гүүрийн ойролцоо айлд очсон юм билээ. Тэрээр ингэхдээ хамт явсан хүмүүсийнхээ машин дээр өөрийнхөө мотоциклийг ачиж явсан гэсэн. Харин нөгөө нь сумын төв орох гэж яваад тэдэнтэй таарсан байгаа юм. Ингээд ачиж явсан мотоциклийг нь машинаас буулгаж, очсон айлд нь орхиод, “Та Эгийн голын гүүрэн дээр намайг хүлээж байгаарай. Би таныг сумын төв орчихоод ирж авна” гээд сумын төв рүү явсан байгаа юм. Хүмүүсээ гаргаж өгөөд байж байхад нь сумын төв орсон хүн нь гүүрэн дээр ирсэн гэсэн. Тэгээд гол гатлах гэж байгаад амиа алдсан бололтой. Тухайн үед гүүр сэтэрч, машин, мотоцикл өөр газраар гол гаталж байсан  юм” гэв.