Цагдаагийн алба хаагч эрүүлжүүлэх байранд саатуулагдсан иргэний биед халдаж, амийг нь хөнөөсөн талаарх дүрс бичлэг цахим орчинд тархаад байна. Мөн үүнээс гадна цагдаагийн алба хаагчдтай холбоотой хэд хэдэн бичлэг олон нийтэд ил болж, албан шалгалт явагдаж байна.

Цагдаад зодуулсны улмаас эрүүлжүүлэх байранд амиа алдсан иргэний хэргийн талаар ЦЕГ-ны Хэвлэл, мэдээллийн төвийн дарга, хурандаа Б.Баатархүү дараах тайлбарыг өгөв.

Тэрбээр  “Уг хэрэг нь 2019 оны өвөл Нийслэлийн цагдаагийн удирдах газрын харьяа Албадан саатуулах, баривчлах төвийн байранд болсон. Тухайн өдөр тус төвийн байранд үүрэг гүйцэтгэж байсан жижүүрийн цагдаа, цагдаагийн дэд ахлагч Г.Ууганбаяр нь иргэний биед халдсанаас болж хохирогч амиа алдсан нь тогтоогдсон. Алба хаагчийн гэм буруутай үйлдлийг  нь шүүхээр тогтоож,  ял шийтгэл эдэлж байгаа” гэлээ.