Цагдаагийн алба хаагчид иргэдийн биед халдаж байгаа бичлэг олон нийтийн сүлжээнд цацагдаад байна. Тодруулбал, цагдаагийн алба хаагчид хоёр иргэнийг гавлаж, энэ үедээ цохих, өшиглөх зэргээр зүй бус харьцаж байгаа үйлдэл хяналтын камерт бичигдэн үлджээ. Хохирогчийн мэдээлж буйгаар эл үйлдэл 60 минут үргэлжилсэн гэнэ.

Олон нийтийн сүлжээнд цацагдсан бичлэгтэй холбоотойгоор Ерөнхий сайд Л.Оюун-Эрдэнэ Хууль зүй, дотоод хэргийн сайд Х.Нямбаатарт “Цагдаагийн алба хаагчид иргэдийг танхайрсан хэргийг яаралтай шалгаж, хуулийн хариуцлага тооц” гэх үүрэг, чиглэл өгчээ.

Харин Цагдаагийн ерөнхий газраас дотоод хяналт, шалгалт хийж эхэлсэн байна. Энэ тухай ЦЕГ-аас "Цагдаагийн алба хаагчид иргэдийн эрх чөлөөнд халдаж байгаа бичлэгтэй холбогдуулан албаны шалгалт явуулж байна" хэмээн мэдэгдэл гаргасан байна.