Баян-Өлгий аймгийн Буянт сумын хоёрдугаар багийн нутагт байрлах Холбоо нууранд хоёр хүн живж, амиа алдсан хэрэг долдугаар сарын 26-ны өдөр гарсан талаар бид мэдээлсэн билээ. Хэргийн талаар Буянт сумын Засаг дарга Н.Хибатайгаас тодрууллаа. Тэрбээр “Баян-Өлгий аймгийн иргэн 21 настай эрэгтэй Е гэгч нь Буянт суманд амьдардаг төрсөн ахындаа амрахаар ирээд, ахынхаа хүү 10 настай эрэгтэй Н-тэй хамт усанд живж амиа алдсан байна. 10 настай Н нь Буянт сумын ерөнхий боловсролын сургуулийн дунд ангийн сурагч байсан. Харин 21 настай Е аймгийн төвд эхнэр хүүхдийн хамт амьдардаг. Хүмүүсийн ярьж буйгаар Холбоо нуурын дунд том ургаа чулуу байдаг юм гэсэн. 10 настай Н нь тэр чулуун дээр гарч зургаа авахуулж байгаад халтираад нууранд унасан байгаа юм. Тэгээд ах нь аврахаар араас нь ороод харамсалтайгаар хоёулаа амиа алджээ. Цогцсыг найман метрийн гүнээс олсон. Холбоо нуур харахад жижиг боловч их гүнзгий. Доошоо бараг 30 метр гүн” гэлээ.