Улсын өсөх идэр начин Э.Энхбат багын найз Н.Түвшинбаяртаа зодуулсны улмаас тархиндаа хүнд гэмтэл авч, ГССҮТ-ийн Эрчимт эмчилгээний тасагт олон хоног ухаангүй хэвтэж, улмаар БНСУ-д эмчлүүлэхээр явсан билээ. Одоогийн байдлаар Э.Энхбат начны биеийн байдал дээрдэж байгаа гэдгийг ар гэрийнхэн нь мэдэгдээд байгаа.

Харин Монгол Улсын Хөдөлмөрийн баатар, олимпын аварга Н.Түвшинбаярыг улсын начин Э.Энхбатын биед хүнд гэмтэл учруулсан гэх үндэслэлээр яллагдагчаар татан, шалгаж байгаа. Н.Түвшинбаярыг ШШГЕГ-ын харьяа Цагдан хорих 461 дүгээр ангид 30 хоног цагдан хорьсон байдаг. Улмаар өмгөөлөгчийнх нь хүсэлтийн дагуу өнгөрсөн тавдугаар сарын 20-нд батлан даалтад гаргасан билээ. Мөн түүнийг хилээр гарахыг хязгаарлаад байгаа.

Тэгвэл Н.Түвшинбаярт холбогдох хэрэг мөрдөн байцаах шатанд "гацсан" талаар эх сурвалж мэдээлэв. Учир нь, хэргийн хохирогч Э.Энхбат тайлбар мэдүүлэг өгөөгүй, өгөх боломжгүй байгаа тул  хэрэг шийдэгдэх болоогүй байгаа аж.

Энэ талаар Н.Түвшинбаяр аваргын өмгөөлөгчөөс тодрууллаа. Тэрбээр “Хэргийн талаар прокурорын байгууллагаас тодруулаарай. Тэндээс тодруулах нь зүйтэй. Мэдээлэл өгч болох эсэхийг прокурорын байгууллага мэднэ” гэлээ.