Баянзүрх дүүрэгт байрлах “Энэрэл” эмнэлгийн гадаа долдугаар сарын 3-нд коронавирусийн халдвартай иргэн анхан шатны тусламж авч чадалгүй амиа алдсан хэрэг гарсан. Тодруулбал, 35 настай, эрэгтэй Р нь шинжилгээний хариу нь эерэг гарч, гэртээ тусгаарлагдаж байгаад бие нь муудаж, эмнэлгийн тусламж авахаар очоод гадаа нь нас барсан юм.

Эмнэлгийн үүдэнд хүн нас барсантай холбоотойгоор Нийслэлийн эрүүл мэндийн газраас мэдээлэл хийж, эмгэнэл илэрхийлж байлаа. Тодруулбал, НЭМГ-ын дарга Б.Бямбадорж “Хэсгийн ахлагчийн өрхийн эмчид өгсөн мэдээллээр бол талийгаач алтны дархан хийж ажиллангаа амьдардаг. Амьдардаг өрөөний нөхцөл тааруу. Орон сууцны зоорийн давхарт амьдардаг. Сүүлийн арван хоног архи согтууруулах ундаа байнга хэрэглэсэн гэх өгүүлэмжийг хэсгийн ахлагч өгсөн байна. Хариуцлага алдсан дарга нарыг ажлаас нь чөлөөлж байна” гэх мэдээллийг өгсөн юм. 

Харин эл мэдэгдлийг талийгаачийн ар гэрийнхэн үгүйсгэж, гомдолтой байгаагаа мэдэгдээд байгаа билээ. 

            Бид талийгаачийн дүүтэй холбогдож, шүүх шинжилгээний дүгнэлт гарсан эсэх талаар тодрууллаа. Тэрбээр “Шүүх шинжилгээний дүгнэлт гарсан гэж мэдэгдээгүй байна. Бид ахыгаа хөдөөлүүлж, нутаг руугаа явчихаад ирлээ. Одоогийн байдлаар бидэнтэй уулзаж, уучлалт гуйсан нэг ч хүн байхгүй. Цагдаагийн байгууллагаас дуудаж тайлбар, мэдүүлэг аваагүй байна. Хэрэг нь шалгагдаж байгаа байх л гэж бодож сууна” гэлээ.