Архангай аймгийн Өлзийт суманд өчигдөр болсон хурдан морины уралдааны үеэр зургаан настай хүүхэд мориноос унаж, амиа алдсан талаар бид мэдээлсэн билээ. Талийгаач хүү эмнэлгийн тусламж авч чадалгүй, газар дээрээ барсан юм.

      Албаны хүмүүсийн хэлж буйгаар “Хурдан морины уралдаанд 20 гаруй уяач, унаач хүүхэд оролцсон. Өлзийт сумын уяачдаас гадна Өгийнуур багийн 4-5 уяач морьтойгоо ирсэн. Амиа алдсан унаач хүүхэд нь Өгийнуур сумынх. Эрүүл мэндийн төвд “Хүүхэд мориноос уналаа” гэсэн дуудлага ирж, хоёр эмч очиход хүү газар дээрээ нас барсан байсан” гэсэн юм.

Мөн өөр эх сурвалжийн мэдээлж буйгаар “Өлзийт сумын Ямаат багийн эмч морины уралдаан болж байгааг мэдэж, сумын Эрүүл мэндийн төв мэдэгдсэн. Эрүүл мэндийн төвийнхөн сумын ЗДТГ болон цагдаагийн байгууллагад мэдэгдэж, морины уралдаан болж байгаа газарт очсон. Очиход их насны морь уралдааны замд гарсан байсан. ЗДТГ-ын машин ирж явааг харсан уяачид зугтааж, их насны морьдоо буцаасан юм билээ. Тэгээд хүүгийн морь бүдэрч, унасан” гэв.

Бид талийгаач хүүгийн ар гэрийнхэнтэй холбогдож, эмгэнэл илэрхийлэв. Хүүгийн эгч “Талийгаач хүү малчин айлын бага хүүхэд нь байсан. Ахынхаа морийг унахаар явсан. Одоогийн байдлаар бид ах, дүү нартайгаа уулзаж, юу болсон талаар тодорхой мэдээлэл аваагүй байна. Хүү мотоциклтэй хүнтэй мөргөлдөөгүй гэсэн.Тодорхой мэдээлэл өгөх боломжгүй байна. Аав, ээж нь мал маллаж амьдардаг” гэлээ.