Архангай аймгийн Өлзийт суманд өчигдөр болсон хурдан морины уралдааны үеэр зургаан настай хүүхэд мориноос унаж, амиа алдсан талаар бид мэдээлсэн билээ. Талийгаач хүү эмнэлгийн тусламж авч чадалгүй, газар дээрээ барсан аж.  

Энэ талаар Өлзийт сумын Засаг даргаас тодруулахад “Манай сум Бүх нийтийн бэлэн байдлын зэрэгт шилжиж хөл хорио тогтоосон байсан. Засаг даргын А/76 тоот захирамж гарч, захирамжийн 10 дахь хэсэгт хурдан морины уралдаан, үсэргээн зохион байгуулахыг хориглож, багийн дарга нар, сумын Уяачдын холбооны удирдлагад үүрэг болгосон байсан. Гэтэл сумын Уяачдын холбооны төлөөлөл болон Ямаат багийн дарга хамтарч, нууцаар хурдан морины уралдаан зохион байгуулсан байна. Бид хурдан морины унаач хүүхдийг эндсэний дараа мэдсэн.

Хурдан морины уралдаанд 20 гаруй уяач, унаач хүүхэд оролцсон байна лээ. Манай сумаас гадна Өгийнуур багийн 4-5 уяач морьтойгоо ирсэн байсан. Хариуцлага алдаж, сумын Засаг даргын шийдвэрийг эсэргүүцсэн хүмүүст хариуцлага тооцно. Амиа алдсан хүүхэд нь манай сумынх биш. Эмнэлгийн түргэн тусламж очиход нас барсан байсан гэсэн. Хүү их насны морь унаж явсан юм билээ” гэв.