-ӨМНӨГОВЬ АЙМГИЙН АРДЧИЛСАН  НАМЫНХНААС НАМАЙГ АЖЛАА ХАЯЖ ЯВСАН ЭСЭХИЙГ АСУУГААРАЙ-

Өмнөговь аймгийн Бүсийн оношилгоо, эмчилгээний төвд ХӨСҮТ-ээс томилогдсон Ажлын хэсгийнхэн хяналт, шалгалт хийжээ.

      Эх сурвалжийн мэдээлснээр “ХӨСҮТ-ийн гурван эмчтэй мэргэжлийн баг Өмнөговь аймагт 10 хоног ажилласан. Хоёр эмч нь хэд хоногийн өмнө, үлдсэн нэг нь өнөөдөр Улаанбаатар хот руу буцлаа. Хөнгөн болоод хүндэвтэр өвчтнөө аймгийн Нэгдсэн эмнэлэгт эмчлэх чиглэлээр сургалт зохион байгуулсан гэсэн. Мөн Гашуунсухайт боомтод халдвартай иргэний тоо эрчимтэй нэмэгдэж байгаа учраас вирус шинжлэх лабораторийн үйл ажиллагааг жигдрүүлж, хил гаалиар гарч байгаа жолооч нарын шинжилгээг эрчимжүүлж, ногоон бүс болгохоор зорин ажилласан гэсэн. Өмнөговь аймгийн Бүсийн оношилгооны төвийн үйл ажиллагааг шалгаж, оношилгоо, эмчилгээг сайжруулах чиглэл өгсөн юм билээ. Гэтэл тус төвийн дарга Я.Болдбаатар шүүмжлэлийг хүлээж авалгүй, ажлаа орхиж явсан гэсэн” гэв.

           Бид энэ талаар Өмнөговь аймгийн Бүсийн оношилгооны төвийн дарга Я.Болдбаатараас тодруулахад “Би ажлаа хаяж яваагүй, өрөөндөө сууж байна. Би ажлаа орхиод хаашаа явах билээ. Намайг ажлаа орхиж явсан гэх яриаг хэн, ямар учраас гаргасны учрыг Өмнөговь аймгийн Ардчилсан намынхнаас асуу. ХӨСҮТ-ийн мэргэжлийн баг манай эмнэлэгт ажилласан эсэхийг би мэдэхгүй. Өөрсдөөс нь асуу. Манай эмнэлгийн нөхцөл байдал ямар байгаа талаар мэдээлэл өгмөөргүй байна. Хэвийн ажлаа хийж байгаа” гэлээ.