Говьсүмбэр аймгийн Шивээговь суманд мөндөр орж, айлуудын цонх, машины шил хагарч, цахилгаангүй болжээ.

Энэ талаар тус сумын Засаг дарга П.Ганчимэгээс тодрууллаа.

       Тэрбээр “Өнөөдөр 12:00 цагийн үед манай суманд теннисний бөмбөгний хэмжээтэй мөндөр хүчтэй орлоо. Таван давхар орон сууцнуудын гадна талын пасад чулуу шидсэн юм шиг цөмөрч, цоорсон. Мөн тус байранд амьдардаг айлуудын цонх, тактны шил хагарсан. Иргэдийн машины шил хагарч, хонхойсон гээд их хэмжээний хохирол учирлаа. Мөн үүнээс гадна албан байгууллагуудын цонх, шил хагарсан. Байгалийн гамшигт үзэгдэл 7-8 минутын хугацаатай үргэлжилсэн. Азаар хүний амь эрсдээгүй, гэмтэж бэртсэн дуудлага ирээгүй. Мөн мөндөрийн улмаас манай суманд цахилгаан, утасны сүлжээ тасарлаа. Сумын гудамж талбайн гэрэлтүүлгийн шон хазайж, унасан. Сумын Онцгой комиссоос ажлын хэсэг томилж, айлуудын хохирлыг тогтоохоор ажиллаж байна. Одоогийн байдлаар хэдэн машины цонх хагарч, эвдэрсэн гэдгийг тогтоож амжаагүй байна.Иргэдээс хохиролтой холбоотой дуудлага тасралтгүй ирж байна. Иргэдээс ирж байгаа дуудлагын олонх нь гэрийнх нь цонх, машины шил хагарсан гэж байна. Нэг айлын гэр нурсан. Бид энэ талаар аймгийн Онцгой комисст мэдэгдэж, дуудлага өгсөн байгаа. Аймгаас ажлын хэсэг томилогдож, манай суманд ажиллахаар болсон” гэлээ.