Ерөнхийлөгч Х.Баттулгын бүрэн эрхийн хугацаа өнгөрсөн баасан гаригт дуусгавар болсон билээ. Тэрбээр суудлаасаа буухаасаа өмнө зарлиг буулгаж, хорих ял эдэлж буй 13 хүнд өршөөл үзүүлсэн. Тодруулбал, ТЕГ-ын дарга асан Б.Хурц, УИХ-ын гишүүн асан Д.Дамба-Очир нарын 13 хүнд өршөөл үзүүлж, суллахаар болсон юм.

Тэгвэл уг 13 хүний дунд хүн амины хэрэгт ял эдэлж буй Б.Махбал багтсан талаар зарим хэвлэл мэдээллийн хэрэгсэл болон цахим орчинд бичигдээд байна.

Бид үүнтэй холбоотойгоор ялтан Б.Махбалын өмгөөлөгчтэй холбогдож, тодрууллаа. Тэрбээр “Миний үйлчлүүлэгчид өршөөл үзүүлж, сулласан гэдэг нь худал мэдээлэл. Цахим орчин болон зарим сайт ор үндэслэлгүй худал мэдээлэл тарааж байна. Б.Махбалын хувьд хорих ангидаа ялаа эдэлж байгаа” гэлээ.

Хэргийг эргэн сануулбал, 2018 оны наймдугаар сарын 9-нд ЗТХЯ-ны өмнө талбайд тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэн бусдын гарт амиа алдсан юм. Эл хэрэгт ЗТХЯ-ны Төрийн захиргаа удирдлагын газрын дарга асан Б.Махбалыг саатуулан шалгаж, түүнийг талийгаачийн аминд хүрсэн болохыг тогтоосон юм. Тус хэргийн шүүх хурал өнгөрсөн оны тавдугаар сард болж, шүүхээс Б.Махбалд 13 жилийн хорих ял оноосон билээ.