Цахим орчинд "Таван богд" компанийн логотой хүргэлтийн автомашины жолоочийг зодож байгаа бичлэг ил болоод байна. Тодруулбал, 1965 ОРО улсын дугаартай “Приус-30” маркийн автомашины жолооч замын голд хүргэлтийн машины жолоочийг зодож, хувцсыг нь урсан юм.

Энэ талаар ЦЕГ-ын Хэвлэл мэдээллийн төвийн ахлах мэргэжилтэн, цагдаагийн хошууч О.Эрдэнэхишигээс тодруулахад “Зургадугаар сарын 15-ны 18:00 цагийн орчимд “Таван богд” ХХК-ны борлуулалтын ажилтан Ц, жолооч Б нар нь ХУД-ийн гуравдугаар хорооны нутаг дэвсгэрт  зам тээврийн хөдөлгөөнд оролцож байхад 19-65 ОРО улсын дугаартай “Приус-30” автомашины эзэмшигч 31 настай эрэгтэй С нь машинаараа ус цацсан, шахсан гэх шалтгаанаар жолоочтой маргалдсан. Жолооч С нь түгээгчийн сууж явсан хэсгийн хаалгыг хаахдаа гарыг нь хавчих үед маргалдаж, үүнээс үүдэн С нь түгээгчийн биед халдсан асуудал болсон байна. Уг хэргийг Хан-Уул дүүрэг дэх цагдаагийн газрын Нэгдүгээр хэлтэст материалжуулан холбогдох шалгалтын ажиллагааг явуулж байна” гэв.