“Унагалдайн мухлаг” нэвтрүүлгийн хөтлөгч, сэтгүүлч Б.Амаржаргалыг жилийн турш ЦЕГ-аас эрэн сурвалжилж байгаа аж. Анх 2020 оны гуравдугаар сарын 24-ний өдрийн 181/шш2020/00702 дугаартай шийдвэрийн дагуу эрэн сурвалжилж байжээ. Харин энэ сарын 11-ний өдөр Сонгинохайрхан дүүргийн Цагдаагийн нэгдүгээр хэлтсээс дахин түүнийг эрэн сурвалжлахаар зарласан байна. Бүтэн жилийн турш ЦЕГ-аас өөрийг нь ямар үндэслэлээр эрэн сурвалжилж байгаа талаар Б.Амаржаргалаас тодрууллаа.

     Тэрбээр “ЦЕГ  бүтэн жилийн турш намайг эрэн сурвалжилж байгаад гайхаж байна. Би ЦЕГ-ын Хэвлэл мэдээллийн төвийн дарга, дэд хурандаа Б.Баатархүүтэй ярьж, ямар цагдаа, ямар хэргээр  намайг эрэн сурвалжилж байгаа талаар асуусан. Эргээд надад хариу хэлнэ гэсэн. Би өнгөрсөн жилийн хугацаанд оршин суугаа хаягаа сольсон. Тийм болохоор намайг хайгаад байгаа юм уу, мэдэхгүй. Маргааш Сонгинохайрхан дүүргийн Цагдаагийн нэгдүгээр хэлтэс дээр очиж, уулзана. Намайг эрэн сурвалжилж байгаа цагдааг би хайгаад, сууж байна. Намайг телевизийн нэвтрүүлэгт орж байхад хүртэл хайгаад олчихмоор юм даа. Яг үнэндээ намайг ямар үндэслэлээр эрэн сурвалжилж байгааг мэдэхгүй байна" гэлээ.