Баян-Өлгий аймгийн Толбо сумын гуравдугаар багт байрлах Хар нууранд арванхоёрдугаар ангийн зургаан эрэгтэй хүүхэд автомашинтайгаа живж, амиа алджээ.

Энэ талаар Толбо сумын Засаг даргын Тамгын газрын даргаас тодруулахад “Талийгаач хөвгүүд зургадугаар сарын 10-нд Хар нуурын эрэгт очсон байна лээ. Осол 00:00 цагийн үед болсон гэсэн. Сурагчид "УАЗ-469" автомашинтай явсан бөгөөд жолооч нь хөдөөний айлын хүүхэд байсан юм билээ. Тэр хүү сумын төв рүү орж, найзуудыгаа аваад Хар нуур руу зугаалахаар явсан байгаа юм. Зургуулаа нуурын эрэгт сууж байгаад нэг найзыгаа авахаар хөдлөх гэж байгаад осолджээ. Машинаа нуурын эрэгт тулгаж тавьснаа мэдэхгүй ухарч, живсэн байна. Тэр хэсэг нь маш гүнзгий. Энэ тухай дуудлага цагдаагийн байгууллагад өглөө нь ирсэн. Аймгийн төвөөс аврагчид ирж, автомашин, жолооч хүүг гаргаж авсан. Мөн удалгүй талийгаач нарын цогцсыг гаргаж авлаа. Одоогийн байдлаар задлан шинжилгээ хийж байна. Хөвгүүд загас барьсан, агнасан ул мөр илрээгүй. Идэж байсан загасны бүтээгдэхүүн, ус, ундаа машин дотроос нь гарч ирсэн. Сурагчид нэг ангийнх байсан.Цагдаагийн байгууллагад хэн дуудлага өгснийг нь мэдэхгүй. Хар нуураас 2-3 километрийн зайтай айлууд нутагладаг” гэв.

Талийгаачдын ар гэр, төрөл төрөгсдөд гүн эмгэнэл илэрхийлье.