Өнгөрсөн аравдугаар сард НИТХ-ын сонгуульд Баянгол дүүрэгт МАН-аас нэр дэвшсэн Б.Сэнжидмаа, Г.Гангамөрөн нар үл мэдэгдэх нэгэн хүнтэй санал тоолох хар хашиныг хакердаж сонгуулийн саналыг өөрчлөх тухай ярилцаж буй бичлэг цацагдаж байлаа.

...“Программ чинь өөрөө бүх юмаа зохицуулаад, та хэдийн нэр жагсаалтаараа урьдчилаад гаргачихна. Хэрэв бидэнтэй хамтраад хийе гэвэл бидний зүгээс бүх ажиллагаанд бэлэн. Зөвхөн Баянгол гэх юм уу, нийслэл дээр гэх юм уу...” гэх яриа өнгөрсөн орон нутгийн сонгуулийн үеэр МАН-аас НИТХ-д нэр дэвшигч Г.Гангамөрөн, Б.Сэжидмаа нар болон “Х” гэх иргэн гурвын хооронд өрнөсөн нь олонд ил болсон билээ.

       Харин Ерөнхийлөгчийн сонгуулийн сурталчилгааны хугацаанд Г.Ган-Очир гэх залуу санал тоолох төхөөрөмж буюу хар машиныг хакердсан, сонгуулийн үр дүнд нөлөөлсөн хэмээн мэдэгдэж, үүнтэй холбоотой мэдээлэл хэвлэл мэдээллийн хэрэгслээр хөвөрч байгаа. Тэрбээр өгсөн ярилцлагадаа “Намайг анх энэ ажилд зуучилж, санал тавьсан хүн бол өдгөө Баянгол дүүргийн  ИТХ-ын даргаар ажиллаж байгаа Б.Сэмжидмаа. Явцын дунд өөрсдийгөө СЕХ-ны IT инженер гэдэг Мөөгий, Мөнхбат гэх хоёр залуу, мөн МАН-ын генсек Д.Амарбаясгалангийн туслах Доогий, одоо нийслэлийн ЖДҮ-ийн дарга хийж буй Г.Гангамөрөн, Нийслэлийн МАН-ын хорооны дэд дарга асан одоогийн Сонгинохайрхан дүүргийн Засаг дарга Н.Алтаншагай болон нийслэлийн Засаг дарга Д.Сумъяабазар, МАН-ын ерөнхий нарийн бичгийн дарга Д.Амарбаясгалан нартай танилцаж, нэг баг болж ажиллаж байгаагаа мэдсэн” хэмээсэн юм.

Тэгвэл өнгөрсөн аравдугаар сард болсон НИТХ-д нэр дэвшсэн Г.Гангамөрөн, Б.Сэмжидмаа нарт хар машиныг хакердах санал тавьж буй “Х хүн” гэгч нь Г.Ган-Очир гэх залуу юу гэх хардлага төрүүлж буй. Бид үүнтэй холбоотойгоор Г.Гангамөрөнтэй холбогдож тодрууллаа.

Тэрбээр “Би ямар ч хууль бус ажиллагаанд оролцоогүй. Г.Ган-Очир гэх залууг би огт танихгүй. Ганц ч удаа уулзаж байгаагүй, хараагүй залуу байна лээ. Би энэ залуутай ганц ч удаа уулзаж үзээгүй байхад ийм мэдээлэл өгсөнд гайхаж байна. Намайг хуулийн байгууллагаас ганц удаа шалгаж байгаагүй. Би ч хуулийн байгууллагад өргөдөл, гомдол гаргаж байгаагүй. Би хар машиныг хакердах гэсэн хууль бус үйл ажиллагаанд оролцоогүй, мэдэхгүй” гэлээ.