Хроматофор хэмээх эс нь загасанд янз бүрийн өнгийг үүсгэдэг. Энэхүү өнгөний хувирлын эс нь дотроо хар, шар, улаан, зэрэг олон пигменттэй. Загасны өнгө гадаад, дотоод хүчин зүйлсийн нөлөөгөөр өөрчлөгддөг. Усны температур, загасны нас, хүйс, усны бүтэц, үржлийн үе, бүр өлсгөлөн байх үедээ ч өнгөө өөрчилдөг байна. Тухайлбал,

- Яргай загасны жараахай хөндлөн цоохор судалтай байх бөгөөд бие гүйцэх үедээ судал нь арилж мөнгөлөг өнгөтэй болдог.

- Цулбуурт, сахалт эрээлж, гутаарь зэрэг загасны биеийн өнгө ёроолын хурдсаа дагаж зохицдог.

- Могой загасны авгалдай хэдэн жил усны гүнд амьдрах үедээ өнгөгүй байж байгаад бие гүйцсэн хойноо нуруу нь ёроолын хурдасны өнгөтэй адилхан бараан болж хувирдаг аж.

      Нэг ёсондоо загасны өнгө нь хамгаалах үүрэгтэй. Амьд үлдэхийн төлөө сайн нуугдаж чаддаг байх хэрэгтэй. Тиймээс биеийн өнгө нь махчин амьтдаас хамгаалахаас гадна олзоо барихад тусалдаг. Энэхүү хамгаалах өнгө нь загасны хувьд байгалийн шалгарлын үйл явцад тасралтгүй үүсч өөрчлөгдсөөр байдаг аж.

     Ер нь халуун бүсийн загаснууд илүү тод өнгөтэй байдаг. Учир нь халуун бүсд нарны гэрлийн тусгал ихтэй, орчиндоо тод өнгө ихээр үүсгэдэгтэй холбоотой. Гүн усны загас гэхэд ихэнхдээ улаавтар өнгөтэй байна. Гүний улаан өнгө хар өнгөнөөс ялгарахгүй харагддаг учир өөрийгөө нуун далдлах боломжтой болгодог байна.