Технологийн зуунд интернэт хэрэглээ өргөжин тэлсээр, соёл урлагийн төрлүүд ч идэвхтэй цахимд шилжиж байна. Эргэлт.мн мэдээллийн сайт сүүлийн жилүүдэд дэлхий дахинд танигдаад буй хамгийн залуу урлагийн төрлүүдийн нэг болох дижитал уран бүтээлээр туурвидаг, бүтээлч болох хүсэл, мөрөөдөлтэй залуу дижитал уран бүтээлчдийн төлөөлөл болох Н.Ариунжаргал, Ө.Эрдэмдэлгэрэх, А.Хүслэн, Э.Тэргэл, Б.Энхжин нартай цөөн хором ярилцлаа.

Өөрийн мөрөөдлөө биелүүлэхээр дижитал бүтээл хийж байгаа тэднийг уншигч танд танилцуулъя.

Н.АРИУНЖАРГАЛ (apple_ejuice)

/Дүрслэх урлагийн академийн II курсийн оюутан/

       Бага ангийн сурагч байхдаа л хичээлийнхээ дэвтэр дээр зураг зураад сууж байдаг байлаа. Харин одоо дижитал зураг зурж эхлээд хоёр жил болж байна. Wlop, Guweiz, Kushinov Ilya зэрэг өөр өөрийн гэсэн онцлогтой гаднын зураачдаас үлгэр дууриал авдаг.

    Миний бодлоор дижитал уран бүтээлчид хүний биеийн анатомыг сайн судалж, ойлгох хэрэгтэй гэж боддог. Би нэг гаргасан алдаагаа дахиж гаргахгүй байхыг хичээдэг. Хувь хүнийхээ хувьд хичээл зүтгэлтэй, тууштай байвал чи хурдан сайжирна.

   Дижитал зураг дэлхийн өнцөг булан бүрд хурдан хүрдгээрээ давуу талтай. Гэр бүлийнхэн маань ч миний дижитал уран бүтээлийг их дэмждэг. Их сургуулиа төгсөхөөрөө дижитал зургаараа дагнан уран бүтээл туурвих мөрөөдөлтэй.

Ө.ЭРДЭМДЭЛГЭРЭХ (motoisugly)

/”Монгени” цогцолбор сургуулийн сурагч/

        Анх гуравдугаар ангид байхад ээж минь намайг дүрслэх урлагийн дугуйланд элсүүлсэн. Дүрслэх урлагийн дугуйланд элсмэгцээ зурагт дуртай болж , тэмцээн, уралдаануудад идэвхтэй оролцох болсон.

       Идэвхтэй зураг зурж эхлээд долоон жил, харин дижитал зургаар зураад гурван жил болж байна. Надад үлгэр дууриалал өгдөг монгол дижитал зураачид олон бий. @rainbowwang, @shun_ffu, @monhshur_r, @chinzoo_artist зэрэг уран бүтээлчдээс эхлүүлээд Монголд дижитал урлаг маш сайн хөгжиж байгаа гэж боддог. Дижитал зураачдад “Youtube” хуудас маш сайн багш болдог гэж боддог.

            Хүмүүст зураг, бүтээлээ үзүүлсэн ч, дараа нь дахин засварлан шинэ хувилбараар хүргэж болох нь дижитал зургийн онцлог. Бусдыг дуурайх бус өөрийнхөө хүссэнээрээ зурах нь энэ төрлийн эрх чөлөө.

А.ХҮСЛЭН (a_khuslenart)

/Нийслэлийн 84 дүгээр сургуулийн сурагч/

        Таван настайгаасаа хойш дүрслэх урлагийг сонирхож, дуртай болсон. Анх юуг, яаж зурахаа мэддэггүй, харагдсан бүхнээ зурдаг байлаа. Нэг удаа анимэ үзэж, түүндээ дуртай болоод дүрүүдийг нь дуурайлгаж зурах болсон. Харин сүүлд нь манга уншдаг болоод өөрийн юу зурмаар байгаа тэр чиглэлээ олсон.

     Сүүлийн хоёр жилийн хугацаанд дижитал зураг зурж байгаа. Цаашдаа ч комик чиглэлээр зурж, бүтээх мөрөөдөл тээж байна. Энэ цагт дижиталаар зурах нь уламжлалт зургаас илүү олон давуу талтай юм шиг санагддаг. Би дотоодын болон гаднын олон дижитал уран бүтээлчээс үлгэр дууриалал авдаг. Монголоос дижитал зураач Санни,мөн Shirow Miwa-гийн бүтээлүүдэд дуртай.

     Харин миний дижитал зураг зурж эхэлсэн шалтгаан гэвэл өөрийн зургаараа хүмүүст гайхалтай мэдрэмжүүдийг өгөхийг хүссэн. Миний зургаас амьдралд олон байдаг ч, бидний тэр бүр анзаардаггүй сайхан мэдрэмжүүдээ олж аваасай гэж би боддог.

Э.ТЭРГЭЛ (kena.jpg)

/Нийслэлийн 77 дугаар сургуулийн сурагч/

      Би дижитал зургийг сүүлийн хоёр жилийн хугацаанд сонирхож, зурж байна. Уламжлалт зургаас илүү дижитал нь олон сонголттой өнгө, будгаар будаж, “амь оруулж” болдогт нь дуртай.

Би Rinotuna, 2krll_6,  yorkily_ tofuneers,  mememeii, tuvshintyy, fatmeat_art,  tarakashslsht, Tomato_fishball зэрэг олон дижитал уран бүтээлчийн бүтээлүүдэд хайртай, тэднээс үлгэр дууриалал их авдаг.

    Би дижитал уран бүтээл дотроосоо өөрийгөө гаргаж ирэхийг хүсдэг. Тиймээс дижитал зураг зурахаасаа өмнө үргэлж үзгээр зурж, өөрийгөө сайжруулдаг. Нэг л алдаа гаргавал засаж болохгүй гэж боддог учир энэ нь өөрийгөө хурцлах хамгийн сайн “үзэг” болдог.

Б.ЭНХЖИН (Сrysnow)

/Орхон аймгийн лаборатори сургуулийн сурагч/

       Би багадаа “Steven Universe” хүүхэлдэйн кинонд их дуртай байсан. Тэгэхдээ хүүхэлдэйн киноных нь зохиогч, зураач, анимэтор Rebecca Sugar-тай адилхан болохыг хүсдэг байв. Хүүхэлдэйн зохиогчийг нь харж өссөн болохоор хүүхэлдэйн киноны зураач болохыг хүсдэг.

      Монголын Shushush, funaruyu, mary_felizola, moto зэрэг дижитал уран бүтээлчдийн зургуудад дуртай болж, өөрийн гэсэн дижитал зургаа зурж эхлээд дөрөв дэх жилдээ зурж байна. Өөрөөсөө гайхалтай, сайн зурдаг хүмүүсийн зургийг харж, анзаарч чадвал шинэ санаа, гарц олж, өөрийгөө илүү сайн хурцалж, сайжирдаг шүү.

Ярилцлага өгсөн зураач нартаа баярлалаа цаашдын уран бүтээлд нь амжилт хүсье.