• Өнөөдөр 2022-05-19

Эрдэнэбүрэнгийн усан цахилгаан станцыг экологид ээлтэй болгоё

2021-02-09,   1191

      БНХАУ-ын Засгийн газраас Монгол Улсын Засгийн газарт олгох нэг тэрбум ам.долларын хөнгөлөлттэй зээлийн хүрээнд Ховд гол дээр 90 МВт-ын хүчин чадалтай усан цахилгаан станц барих болоод байгаа билээ. Станцыг Ховд аймгийн Эрдэнэбүрэн сумын нутаг дахь Шижигтийн хавцалд барих бөгөөд гэрээ хэлэлцээрүүд нь хийгдчихсэн, энэ зунаас бүтээн байгуулалт эхэлнэ. Баруун бүсийн эрчим хүчний хангалтад ихээхэн ач холбогдолтой тус станцыг барихдаа шийдвэр гаргагчид байгаль орчны тал дээр зайлшгүй анхаарах ёстой хэд хэдэн чухал зүйл байна.

МОНГОЛ ХАДРАН ЗАГАС ШИЖИГТИЙН ХАВЦЛААР ДЭЭШ ӨГСӨЖ ТҮРСЭЭ ШАХДАГ

         Монголын загас судлаачид монгол хадран загасанд уян тэмдэглэгээ тавьж шилжилт хөдөлгөөн, үржлийн нүүдлийг нь судалжээ. Тэдний судалгаагаар монгол хадран загас Ховд аймгийн Эрдэнэбүрэн сумын нутаг дахь Шижигтийн хавцлаар дээш Ховд голоо өгсөж түрсээ шахдаг нь батлагдсан байна. Тодруулбал, 2019 оны дөрөвдүгээр сард Шижигтийн хавцал орчмоос барьж уян тэмдэглэгээ зүүсэн загаснуудаас гурав нь Баян-Өлгий аймгийн Баяннуур сумын нутаг дахь Ховд голоос баригджээ. Зүүлт нь загасандаа ямар ч хор хөнөөл учруулахгүй, уян пластик юм.

      Судалгааны энэ үр дүн монгол хадран загасны хамгаалалд их ач холбогдолтой. Учир нь, Шижигтийн хавцалд монгол хадран загас түрсээ шахдаг гол цэг байдаг бөгөөд усан цахилгаан станцын бүтээн байгуулалт үржилд нь сөргөөр нөлөөлөх магадлалтайг эрдэмтэн судлаачид анхааруулсаар байгаа. Харин албаны зарим хүмүүс “усан цахилгаан станц барих газар нь монгол хадран загасны үржлийн цэгээс дээш байгаа тул ямар ч асуудалгүй” хэмээн тайлбарладаг. Өмнө нь тодорхой судалгаа байгаагүй бөгөөд судлаачид ч энэ загас Шижигтийн хавцалд ирж түрсээ шахчихаад буцдаг гэсэн ойлголттой байв. Тэгвэл монгол хадран загас үржлийнхээ үед Шижигтийн хавцлаар дээш өгсдөг нь ийнхүү тодорхой болсон учир тэнд усан цахилгаан станц барихдаа загас дамжин өнгөрүүлэх суваг байгуулах шаардлагатай болж байна.

        Өмнө нь Дөргөний усан цахилгаан станцыг байгуулахдаа загас дамжин өнгөрүүлэх байгууламж хийсэн боловч тэр нь яг л төөрдөг байшин хэлбэртэй, стандартын шаардлага хангаагүйгээс загас дамжин гарч чадаагүй юм. Одоо ашиглагддаггүй, харин ч эсрэгээрээ монгол хадран загасны генетикийн нэгдмэл популяцийг баруун, зүүн гэсэн тусгаарлагдмал хэсэгт хуваасан хэмээн судлаачид харамсангуй ярьдаг. Хэрвээ энэ алдааг Эрдэнэбүрэнгийн усан цахилгаан станцад давтах юм бол Монгол орны унаган загас болох хадран цөөрч, улмаар устах эрсдэлтэй юм.

      Магад загас дамжин өнгөрүүлэх суваг байгуулах байгуулах шаардлагагүй гэвэл станцын дэргэд  загас үржүүлгийн төв байгуулж болох. Гаднын томоохон усан цахилгаан станцуудын дэргэд ийм төв байдаг шүү дээ. Тэнд зориудын аргаар үржүүлэн бие даан амьдрах чадвартай жараахайг усан сангаас дээш, доош тавин загасжуулсан амжилттай жишээ цөөнгүй бий.  Тиймээс байгаль орчны нөлөөллийн нарийвчилсан үнэлгээ хийхдээ үүнд онцгой анхаарал хандуулж ирээдүйд гарч болох эрсдэлээс урьдчилан сэргийлэх хэрэгтэй болжээ. Ялангуяа үнэлгээ хийж байгаа багийнхан энэ асуудлыг тооцож, ганцхан Монголд байдаг нутгийн унаган зүйл болох монгол хадран загасаа хамгаалж хувь нэмрээ оруулахад мэргэжлийн талаасаа ч, ёс зүйн талаасаа ч  болохгүй гэх зүйлгүй.

Томоохон станцын хувьд дэргэдээ загас үржүүлгийн төв байгуулахад санхүүгийн хувьд ямар ч дарамт болохгүй нь ойлгомжтой. Ядаж л станцын нэр хүндэд сайн, байгаль экологид ээлтэй төсөл болж олны талархлыг хүлээх нь дамжиггүй юм.

ТАЙШИР, ДӨРГӨНИЙ АЛДААГ ДАВТАЖ БОЛОХГҮЙ

          Шинээр усан цахилгаан станц барихдаа алдааг нь давтаж болохгүйг сануулдаг тод жишээ нь Тайшир, Дөргөний усан цахилгаан станцууд юм. Баригдсан даруйдаа байгаль, экологид хамгийн их сөрөг нөлөө үзүүлсэн нь Тайширын усан цахилгаан станц. Завхан голын усыг боосноос энэ гол тасарч Увс аймгийн Завхан сумын малчид уух ус, малаа тэжээх бэлчээргүй болж олон арваараа нутгаа орхин нүүж байсан цаг саяхан. Завхан голын ус татарснаас болж Их нууруудын хотгорын усны эко системд онцгой үүрэгтэй Хяргас нуурын усны төвшин жил ирэх тусам багасч, эргийн бүс дотогшилсоор байгааг судлаачид онцлох болсон.

         Нөгөө талаар Тайшир, Дөргөний усан цахилгаан станцаас болж байгаль, экологид хэр хэмжээний хохирол учирсныг тодорхойлсон судалгаа өдийг хүртэл алга. Хяргас нуурын усны төвшин хэр буурсан, Завхан голын урсац станц барихаас өмнөхтэй адил хэмжээтэй байж чадаж байна уу гэдгийг судалж тогтоосноор маргаантай олон асуултад хариулт өгөх учиртай. Дөргөн, Тайширын усан цахилгаан станцын хам нөлөө Хяргас, Дөргөн нууранд тусдаг. Алтайгаас ирж байгаа ус Ховд, Буянт голоор, Хангайгаас ирж байгаа ус Хүнгүй, Завхан голоор дамжин Хяргас, Дөргөн нуурт цутгадаг. Гэтэл Хангайгаас ирж байгаа Завхан голын усыг Тайширт, Алтайгаас ирж байгаа Ховд, Буянт голын усыг Дөргөний станцын далангаар хаачихсан. Их нууруудын нэг хэсэг болох Хяргас нуурын хотгор нь хуурайшилт ихтэй, гадагш урсгалгүй бүс нутаг юм.

Шинээр усан цахилгаан станц барихдаа алдааг нь давтаж болохгүйг сануулдаг тод жишээ нь Тайшир, Дөргөний усан цахилгаан станцууд юм

       Одоо станц барих Ховд гол нь олон төрөл, зүйлийн усны шувуу цуглардаг Хар-Ус нуурт цутгаж гол тэжээл нь болдог. Энэ нуур Рамсарын конвенцид бүртгэлтэй, олон улсын хамгаалалтад орсон. Хар-Ус бол Монголын дөрвөн том нуурын нэг мөртлөө гүехэн, гүн хэсэгтээ л 3-4 метр хүрнэ. Гол тэжээл нь болсон Ховд голын ус татарвал хуурайшилт ихтэй энэ цаг үед нуурын усны төвшин багасах эрсдэлтэй гэж усны мэргэжилтнүүд анхааруулж байна. Мөн Баян-Өлгий, Увс, Ховд аймгийн 20 гаруй сумын 80 гаруй мянган хүн, хоёр сая гаруй мал сүрэг Ховд голоос ундаалдаг. Тиймээс л энэ төсөлд эхнээс нь болгоомжтой хандаж тооцооллоо маш сайн хийх шаардлагатай болоод байгаа юм. Ялангуяа байгаль орчинд нөлөөлөх байдлын үнэлгээг хийхдээ усны алдагдлыг нарийн тооцох хэрэгтэй байна.

         Мэдээж зээл өгч байгаа Хятадын тал ч энэ асуудалд онцгой анхаарч таарна. Тэд өөрсдийнх нь санхүүжүүлсэн төсөл олон улсын хамгаалалтад орсон Хар-Ус нуур болон Их нууруудын хотгорын экосистемд сөргөөр нөлөөллөө хэмээх шүүмжлэлд өртөхийг хүсэхгүй нь лавтай. Хятадууд аливаа бүтээн байгуулалт хийхдээ байгаль, экологид сөргөөр нөлөөлөхгүй байхад онцгой анхаардаг болчихсон, холбогдох хууль журмандаа ч бодлогын өөрчлөлт оруулж дэлхийн чиг хандлагатай хөл нийлүүлэн алхаж байгаа. Хятадын дарга Ши Жинпин 2018 оны тавдугаар сарын сарын 18-19-нд Бээжин хотод болсон Бүх Хятадын экологи хамгааллын хуралд оролцохдоо” Ногоон хөгжлийг бүх талаар ахиулах ёстой. Экологийн эрсдэлээс хамгаалж, бүх явцын олон давхаргын экологи хамгааллын системийг байгуулах хэрэгтэй” хэмээн онцолсон билээ. Мөн тэрээр 2019 оны гуравдугаар сард Өвөр Монголын төлөөлөгчдийн хянан зөвлөлдөх хуралд оролцохдоо “Эдийн засгийн хөгжил хүндрэлтэй болох үед төсөл хэрэгжүүлж, байгаль орчныг хохироож эдийн засгаа нэмэгдүүлэх үзэл бодолтой байж болохгүй. Экологи хамгааллын улаан шугамыг эвдэж болохгүй” гэж сануулж байсан юм.

          Улс орны хөгжил, иргэдийн амьдралд эрчим хүч хэрэгтэй нь үнэн. Тэр тусмаа эрчим хүчнийхээ хэрэгцээгээ бүрэн хангаж чадаагүй, бусдаас хамааралтай манай улсын хувьд бүр ч чухал. Хамгийн гол нь, өмнөх алдаагаа давтахгүйгээр экологид ээлтэй бүтээн байгуулалт хийх нь энэ төслийг хариуцагчдын заавал анхаарах ёстой асуудал юм. Түүнчлэн цаашид бүтээн байгуулалт хийхдээ заавал ус гэхгүйгээр нар, салхины сэргээгдэх эрчим хүчээр асуудлыг давхар шийдэх олон сонголт гарч ирээд байна. Технологийн дэвшлээс шалтгаалж үнэ цэн нь ч өдрөөс өдөрт хямдарч байгааг анхаарах хэрэгтэйг мэргэжилтнүүд сануулж байгаа билээ.

 Шижигтийн хавцалд монгол хадран загас түрсээ шахдаг гол цэг байдаг бөгөөд усан цахилгаан станцын бүтээн байгуулалт үржилд нь сөргөөр нөлөөлөх магадлалтайг эрдэмтэн, судлаачид анхааруулсаар байгаа

 


Эрдэнэбүрэнгийн усан цахилгаан станцыг экологид ээлтэй болгоё
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 6
  • Сэтгэгдэл үлдээсэн: 2021-02-22 15:15:02
    Сосор: 34 сая мал хорогдсныг алдаж бичив
  • Сэтгэгдэл үлдээсэн: 2021-02-22 15:11:00
    Ц.Сосорбарам: ЭНЭХҮҮ БИЧВЭР УНШИЖ АВАХ ГЭЭХ УХААНААР ХАНДАХ НЬ ЗҮЙТЭЙ ГЭЖ ҮЗЛЭЭ. 1.Монгол хадран загасны гүйдлийг загас судлаачид 2 хуваагдан үзэж бсн. А. Сүжигтийн хавцлын шахагдсан огтлолын кинетик энерги ихтэй хэсгээр загас үсрэн гарч оддогийн боомтын хөндлөвчийг давж чадахгүй,популяц үүгээр хуваагдана гэж Б. Энэ нийтлэлд бичснээр уян тэмдэглэгээ хийсэн загас давж Ховд гол өгсөн түрсээ хаясан гэх. Хариулт: Төслийн шийдлээр Дөргөн,Тайширын станцаас зарчмын өөр байдлаар шийдсэн. Дөргөнд перепад хэлбэрийн загас өнгөрөөх байгууламж хийсэн боловч ашиглагдаагүй байгаа нь үнэн. Гэлээ ч ммьдрал дээр тэнд загасны популяц маш сайжирч,үржсэн байгаа. Энэхүү төслөөр Ховд голын Сүжигтын хавцлын хэсгийн экологийн урсгалыг хангах зорилгоор боомтоор өнгөрөх усхаюурын 2 байгууламж хийж өгсөн ба 8 м өргөн фронтоор 1300 куб.м.сек ус өнгөрч байхаар.Энэ нь Туулын хамгийн үертэй тэнцүү. Хадран Сүжигтийн боргиог өнгөрч түрс хаядаг бол энэ байгууламжаар бүр чөлөөтэй хөвөн дээд нуурт түрсээ хаях ба амьдарч үржих нөхцөл нь илүү сайн нууранд болохоор төсөллөгдсөн. Боомтын усан цахилгаан станцруу хаях өндөр энергитэй усыг зориуудаар хажуу уулаар 7 км урт 7 өндөр туннель ухаж,дөхүүлэх хоолойгоор станцийн барилгад трубинлуу очихоор ангилсан. Ингэж Ховд голын Сүжигтын хавцлын усны эко орчныг хамгаалсанаар хуурай жилүүдэд загас түүний тэжээлийн орчин зоопланктон,питопланктон зэргийг хамгаалж үлдэх,үерийн усанд цэг тавих зорилготой төсөллөсөн болно. НИЙЛЭЛТ ШҮҮМЖТЭЙ ХАНДАХ НЬ: 1.Шүүмжлэхийн төлөө юмуу, 1000 шалтгаанаас нэгийг барьж авч дөвийлгөх нь манай өнөөгийн гажиг болсон. Тайшир экологит муугаар нөлөөлсөн гэж одоо яривал Говь-Алтайнханд зодуулна. Тэд хямд эрчим хүчтэй болсон, усгүй говьдоо том усан толио Гэгээн нууртай болсон, загасны популыци гайхалтай сайжирсан. Монголд 1997-2008 он хүртэл 11 жилийн хур бороо татарсан гантай жилийн цикль таарч 5000 орчим булаг шанд,нуур,тойром ширгэж834 сая мал хорогдож,40К айл ядуурч УБ бараадсан яг тэр үед усан сангийн дүүргэлт давхцан тооцоогоор 3 жил бсн нь 5 жилд дүүрч одоо бялгаж байгаа. Эрдэнэсантын УЦС -д завхан шиг 80% хур бороо царайчилсан Завхан биш Хотон Хурган нуур,Потанины мөсөн голоос эх авсан гол дээр баригдах тул усан сан дүүргэлт экосистем,түүний биогеоценозд нөлөө үзүүлэх нөлөө маш бага. Нөлөөллийн хүрээний хувьд хадран загаснаас үнэтэй 400 мянган монголчуудын эрчим хүч,орон нутгийн хөгжил, уул уурхай,хөнгөн үйлдвэр,эрчимтэй мал аж ахуй,усалгаатай газар тариалан,ажлын байранд нийгэм эдийн засгийн эерэг нөлөө үзүүлнэ. Одоо ОХУ-аас 1квт6цаг энэргийг тэнд 180 төгрөгөөр худалдаж авдаг бол ,энэ станцийн асинхрон генератороос 30 төгрөгөөр тог гарна. Энэ бол хөгжлийн төлөөх үндэсний том үйлдвэрлэл бөгөөд шахаж хавчдаг ОХУ ба Хятад улсын бодлогоос хамаарахгүй ганц дотоод урсгалт хамгийн их энергитэй гол билээ.
  • Сэтгэгдэл үлдээсэн: 2021-02-22 13:11:24
    Ц.Сосорбарам: ЭНЭ АСУУЛТААРАА НАДААС ИРЖ ХАРИУЛТ АВ. ЗАЙНААС ТААВРААР,МЭРГЭЖЛИЙН БУС ЗҮЙЛ БИЧИЖ,ҮНДЭСНИЙ ҮЙЛДВЭРЛЭЛИЙН МЕГАТӨСӨЛ бүү ЭСЭРГҮҮЦ. БОННҮ-Г БИ ХИЙЖ БАЙГАА. ФБ ХАЯГ Tseden Sosorbaram. Загас судлалын тэр судалгааныхаа тайлан үзүүлж тус болно, төсөлд тусгая.Яаралтай
  • Сэтгэгдэл үлдээсэн: 2021-02-18 18:29:04
    Засгийн газар: Энэ хэдэн усан цахилгаан станцаа ашиглалтад оруулах бол оруулаад болих бол больчихож болдоггүй юм байх даа. Хэчнээн жил ард түмний сэтгэл зүйгээр тоглож, барина, болино гэж явах гэсэн юм бол
  • Сэтгэгдэл үлдээсэн: 2021-02-10 00:36:20
    dd: өөр бас асуудлууд байх шиг байгаамдаа
  • Сэтгэгдэл үлдээсэн: 2021-02-09 09:55:00
    jagaa: darga nar anhaarasaai bilee. Mainahan ch hetsuu shyy dee. Bugd odoo l duugarah heregtei
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188