МҮОНРТ-ийн Ерөнхий захирал Л.Нинжжамц тэргүүтэй удирдлагуудыг цар тахлын үеэр ажилчдынхаа цалинг хасаж, өөрсдийгөө урамшуулж, зар сурталчилгааны орлого, татвар төлөгчдийн мөнгийг үргүй зарцуулсан хэмээн тус телевизийн сэтгүүлч, уран бүтээлч, ажилтнууд мэдэгдсэн билээ. Тэгвэл Ерөнхий захирал Л.Нинжжамц өөрийн хүсэлтээр өнөөдөр ажлаа хүлээлгэн өгөх гэж буй талаар зарим хэвлэл бичиж эхэллээ. Мөн МҮОНРТ-ийн дараагийн ерөнхий захирлаар Засгийн газрын Хэвлэл мэдээллийн албаны дарга, Үндэсний брэндийн бодлогын зөвлөлийн ажлын албаны дарга зэрэг албан тушаалыг хашиж байсан  Нинжийн Дэмбэрэлийг томилох болсон тухай мэдээлэл цацагдаж буй. Энэ талаар Н.Дэмбэрэлээс тодрууллаа.

-Таныг МҮОНРТ-ийн Ерөнхий захирал болох гэж байгаа гэсэн мэдэээлэл байна. Энэ үнэн үү?

-Одоогийн байдлаар надад мэдэгдсэн юм алга. МҮОНРТ-ийн захирлыг Үндэсний зөвлөл мэдэж, томилдог байлгүй дээ.

-Та өмнө нь би “МҮОНРТ-ийн захирал болохгүй” гэсэн мэдээлэл өгч байсан шүү дээ. Одоо ямар байр суурьтай байгаа юм бэ?

-Би “Болно, болохгүй” гэж хэнд ч мэдээлэл өгөөгүй. Нэгдүгээрт, одоогийн байгаа захирал нь ажлаа хийж байна. Хоёрдугаарт, Үндэсний зөвлөл захирлыг солих эсэхээ шийднэ. Гуравдугаарт, Үндэсний зөвлөл шинэ захирлаа хэрхэн томилох, уралдаант шалгаруулалт зарлах юм уу, шууд томилох уу гэдгээ шийдэх байлгүй дээ. Үүний дараа л энэ асуудлыг ярихгүй бол одоо цаг нь биш байх. Би энэ талаар ярих нь утгагүй байна.

-Таныг МҮОНРТ-ийн захирал болгоно гэвэл болох юм уу?

-Үндэсний зөвлөл нь тодорхой мэдээлэл гаргасны дараа шийднэ. Ямар зорилго тавьж байгаа гээд асуудал ургаж гарч ирнэ. Үндэсний зөвлөл чинь хуулиараа бодлогоо тодорхойлдог газар шүү дээ. Тэр байгууллага одоогийн байгаа захиралтайгаа хамтарч ажиллаж болно гэж үзэх юм уу, эсвэл шинэ захирал хэрэгтэй гэх юм уу, тэрийгээ тодорхой болгох хэрэгтэй. Энэ бүгдийг харж байгаад шийдэх нь зүйтэй.

-Одоогоор та ямар албан тушаал хашиж байна вэ?

-Үндэсний брэндийн бодлогын зөвлөлийн ажлын албаны даргаа өгчихсөн болохоор одоогоор ажилгүй байна. Үндэсний брэндийн зөвлөл үндсэндээ татан буугдсан гэж болно.