“Хэвлэлд ярилцлага өгөх юм бол ахиж барилдаж чадахгүй болгоно шүү. Хэний хүчинд гавьяат тамирчин болсон бэ гэдгээ санаарай” гэж хэлээд С.Батцэцэгийг олимпод явуулж байлаа

       Эх дэлхийн эв нэгдэл, олимпын наадам болоход сар гаруй хугацаа үлджээ. Орон, орны шигшээ багийн тамирчид олимпын тэнгэрт төрийн дууллаа эгшиглүүлэхээр шамдаж буй. Гэтэл манай улсын чөлөөт бөхийн шигшээ багийн удирдлагууд “Тамирчдын дунд сорил тэмцээн явуулж, “Токио-2020” олимпын наадамд оролцох эрхийг олгоно” хэмээн олон тамирчны сэтгэл зүй, бэлтгэлийг хангуулсан хэдий ч хэдхэн өдрийн өмнө “Сорил тэмцээн явуулахгүй, олимпын эрх авсан тамирчид шууд олимпод оролцоно” хэмээжээ. Энэ талаар МУГТ, чөлөөт бөхийн ОУХМ О.Насанбурмаатай ярилцлаа. 

-Сайн байна уу. Иван-Яригынагийн нэрэмжит тэмцээнд эх орноо төлөөлөн оролцож байгаа гэж дуулсан. Энэ тухай ярилцлагаа эхэлье?

    -Сайн байна уу. Ярилцлагад урьсанд баярлалаа. Би одоогоор ОХУ-ын Красноярск хотод уламжлал болгон зохиогддог Иван-Яригына нэрэмжит тэмцээнд оролцохоор ирсэн байна. Тэмцээн маргаашаас эхэлнэ.

-Та сүүлд нийгмийн сүлжээнд чөлөөт бөхийн холбоог шүүмжилж бичсэн. Энэ талаар дэлгэрэнгүй тайлбар өгч болох уу?

    -Дөрвөн жилд нэг удаа болдог олимпын наадам энэ жил тохиож байна. Чөлөөт бөхийн холбооны ахлах дасгалжуулагч Б.Баттулга багш “Сүүлийн хоёр жилийн хугацаанд тэмцээн, уралдаанд сайн оролцсон тамирчдын дунд сорил тэмцээн зохион байгуулж олимпод оролцох тамирчнаа сонгоно” гэж бүх тамирчдад хэлсэн. Тэгээд тамирчид “Сорил тэмцээн хэзээ болох юм бол эсвэл улсын аварга шалгаруулах тэмцээн болох юм болов уу” гэж их хүлээсэн. Гэтэл олимпын өмнө сорил тэмцээн явуулалгүйгээр “Олимпын эрх авсан тамирчин олимпод явна” гэж  зарласан нь олон тамирчны бухимдлыг төрүүлээд байна. Чөлөөт бөхийн холбоо, дасгалжуулагчийн зөвлөлөөс гаргасан шийдвэртээ үнэнч, бүх зүйл нь шударга, дүрэм журам нь ил тод байсан бол ямар ч тамирчин маргаан үүсгэхгүй байсан.

 -Өмнө нь бас ийм зүйл тохиолдож байсан гэсэн шүү дээ?

   -Би 2011 оны дэлхийн аваргаас хүрэл медаль авч, 2012 оны Лондонгийн олимпод оролцох эрхээ авсан. Гэтэл миний оронд С.Батцэцэг олимпод оролцож, хүрэл медаль хүртсэн. Тухайн үед ямар ч сорил тэмцээн хийлгүйгээр миний оронд С.Батцэцэгийг оролцуулсанд би их эмзэглэдэг. Ер нь үнэнийг хэлэхэд тэмцээн болгоны өмнө нэг дүрэм гаргадаг. Тэгээд тухайн дүрмээрээ яваад байна уу гэхээр үгүй шүү дээ. Үүнээс болж олон тамирчин тэмцээнд оролцож чаддаггүй. Дандаа урдуур нь танил талтай, нэр нөлөө бүхий хүмүүсийн танил тамирчид ордог. Энэ бүхэнд сэтгэл их гундуухан явдаг даа. 

-Олимп гэдэг тамирчдын чансааг харуулдаг хамгийн том тэмцээн шүү дээ. Гэтэл хоёр удаа олимпод оролцох эрхээ хасуулсан гэхээр таны хувьд маш харамсалтай?

     -Тэгэлгүй яах вэ. Монгол Улсын түүхэнд өөрийн хүчээр олимпын эрх авчихаад, олимпод оролцож чадаагүй цорын ганц тамирчин нь би болсон. Тухайн үед олимпод оролцоно гээд маш их баярлаж, бэлтгэлээ хийж байхад “Хэвлэлд ярилцлага өгөх юм бол ахиж барилдаж чадахааргүй болгоно шүү. Хэний хүчинд гавьяат тамирчин болсон бэ гэдгээ санаарай” гэж хэлээд С.Батцэцэгийг явуулж байсан.

-ЧӨЛӨӨТ БӨХИЙН ЭМЭГТЭЙ ШИГШЭЭ БАГТ 13 ТАМИРЧИН БАЙДАГ. ТЭР 13 ТАМИРЧНЫХАА БАРИЛДААНЫГ МЭДДЭГ ЮМ УУ ГЭЖ ГАЙХДАГ-

-Эмэгтэйчүүдийн хувьд бэлтгэл, сургуулилт эрчүүдээс мэдээж өөр байдаг болов уу. Тэр дундаа дасгалжуулагч эмэгтэй тамирчидтайгаа түлхүү тулж ажиллах хэрэгтэй байдаг байх?

      -Тийм ээ. Сүүлийн дөрвөн жил шигшээ багийн удирдлагууд солигдсон байгаа. Эмэгтэй тамирчин багш, дасгалжуулагчидтайгаа сайн ярилцаж, бэлтгэлээ хангах хэрэгтэй байдаг. Гэтэл сүүлийн дөрвөн жилд бэлтгэлийн үеэр манай шигшээ багтай нэг ч удаа уулзалт, яриа хийж үзээгүй. Чөлөөт бөхийн эмэгтэй шигшээ багт 13 тамирчин байдаг. Тэр 13 тамирчныхаа барилдааныг мэддэг юм уу гэж гайхдаг. Бидний барилдааныг мэддэггүй дасгалжуулагч гадна орны тамирчны барилдааныг яаж мэдэх вэ дээ.

Би 2018 оны дэлхийн аваргын финалд гараад, зооны аваргын төлөө Хятад Улсын тамирчинтай барилдахаар бие халааж байсан. Миний хажууд заавар, зөвлөгөө өгөх ёстой хүн бол шигшээ багийн ахлах болон дасгалжуулагч байдаг. Гэтэл тэр үед миний хажууд хэн нь ч байгаагүй. Манай бэлтгэлийн дүү н.Даваачимэг миний бие халаалтыг хийлгээд хамт байж байсан. Тэгээд “Дасгалжуулагч маань хаана байна” гээд хайхад тээр хойно гар утсаа үзээд сууж байсан. Зарим тамирчныг барилдахад хажууд нь заавар зөвлөгөө өгөөд, холдож чаддаггүй хэрнэ зарим тамирчныг тоохгүй орхидог нь үнэхээр эвгүй санагддаг. Энэ ганц надад тохиолдсон зүйл биш ээ. Мөн “Миний өөдөөс үг хэллээ” гээд бэлтгэл сургуулилтад оруулахгүй, тэмцээнд авч явахгүй хэд хэдэн тохиолдол гарсан.

 -Багш, удирдлагуудын харилцаа тамирчдад их нөлөөлдөг болов уу. Чөлөөт бөхийн эмэгтэй шигшээ багийнхан хоорондоо хэр харилцаатай вэ?

     -Тамирчин хүн тэр дундаа дасгалжуулагч хүн шударга байх ёстой. Тэгэхэд шигшээ багийн дасгалжуулагчид тийм биш байдаг. Өөрсдөдөө тал зассан тамирчдад илүү боломж олгоод, чимээгүй, дуугүй байдаг тамирчдаа хойш нь тавьдаг. Өмнөх найман жилийн хугацаанд манай шигшээ баг эв нэгдэлтэй, сайхан байсан. Түүний дараагаар багш нар нь хоорондоо хэдэн шавь нараа өрсөлдүүлж, хов хутгаж, эвдэж байна. Энэ нь тамирчин хүнд маш хүнд нөлөөлнө. Шигшээ багт ялгаварлан гадуурхалт гэдэг зүйл их болсон.

-Өчигдөр урлаг, спорт гээд салбарын манлайлал төрийн дээд одон медалиар шагнагдаж байна. Үүнд чөлөөт бөхийн тамирчин байхгүй байсан. Тамирчин хүний хувьд хэрхэн хүлээж авсан бэ?

     -Би бас үүнд сэтгэл их гонсгор байна. Өчигдөр спортын олон тамирчин хөдөлмөрөө үнэлүүлж байна. Тэр дунд чөлөөт бөхийн нэг ч тамирчин байхгүй байна. Чөлөөт бөхийн тамирчид бид нэгнээ  сайн дэмждэг. Хэн нэгнээ шагнал авахад, тэмцээнд түрүүлэхэд их баярлаж, урам авдаг юм. Гэтэл өнөөдөр (өчигдөр) чөлөөт бөхийн нэг ч тамирчин байхгүй байна гэхээр харамсмаар байна. Бидний гаргасан амжилтаар өөрсдийнх нь ажил үнэлэгддэг болов уу гэж боддог.

Миний сүүлийн дөрвөн жилд гаргасан амжилт чөлөөт бөхийн шигшээ багийн дасгалжуулагчийн ажлын үр дүн болоод л явсан байх. Гэтэл тэмцээнд оролцож байх үед минь дэвжээний хажууд ирээд, нэг ч мэх зааж өгөөгүй хүмүүс шүү дээ.              

-Монголчууд бөхөө дээдэлж, хүндэлдэг ард түмэн. Гэтэл биднийг нэгтгэж, омогшуулж чаддаг бөхийн спортод энэ мэтчилэн ёс зүйгүй асуудал үүссэн харамсалтай байна. Та үүн дээр бодлоо хэлэхгүй юу?

    -Би юу юунаас ч илүү спортын салбар шударга байх ёстой гэж үздэг. Энэ спортоор 18 жил хичээллэж байна. Энэ хугацаанд шударга бус үйл явдал олон тохиолдож, олон тамирчин хохирч буйд их эмзэглэж байна. Энэ сануулгыг яагаад хэлээд байгаа юм бэ гэхээр "Токио-2020" олимпод энэ багаараа явлаа гэхэд миний дараагийн үеийн дүү нар, залуу тамирчид минь ингэж хохирох вий гэж санаа зовж байна. Би өөрөө эмэгтэй шигшээ багийн ахлагч. Над шиг олон эмэгтэй тамирчин хохирч байгаа болохоор би олон нийтэд мэдээлж байна.

Спорт сонирхогч ард түмэн сайн мэдэж байгаа. Би нэг удаа хэл ам хийж байгаагүй, байнга л чимээгүй өнгөрч байсан. Одоо дуугай байж чадахгүй. Анхнаасаа “Олимпын эрх авсан тамирчид явна” гэж хэлсэн бол ийм маргаан үүсэхгүй шүү дээ.

 -Ярилцсанд баярлалаа.

     -Баярлалаа.