"Токио-2020" зуны олимпын наадмаас монголын жүдо бөхийн гурван тамирчин нэг мөнгө, хоёр хүрэл медаль хүртэж, амжилтын буухиаг эхлүүлсэн. Монгол Улс олимпын наадамд оролцож эхэлснээс хойш жүдо бөхийн  төрлөөр хамгийн олон медаль хүртжээ. 1980 оны Москвагийн олимпоос 2020 оны Токиогийн олимп хүртэлх олимпоос Монголын жүдо бөхийн 10 тамирчин 11 медаль хүртсэн юм. Тэгвэл он оны олимпоос медаль хүртэж, олимпын тэнгэрт эх орныхоо далбааг мандуулсан монголын жүдо бөхийн тамирчдыг онцолж байна.

МОНГОЛ УЛСЫН ГАВЬЯАТ ТАМИРЧИН ЦЭНДИЙН ДАМДИН

                  Монгол Улсын Гавьяат тамирчин Ц.Дамдин нь 1980 оны Москвагийн олимпын жүдо бөхийн төрөлд монголоос анхны медалийг хүртсэн. Тэрбээр 1957 оны гуравдугаар сарын 31-нд Хэнтий аймгийн Баян-Адарга суманд мэндэлжээ.  Уул уурхайн инженер, биеийн тамирын багш, дасгалжуулагч мэргэжилтэй. Түүний хувьд 2000-2004 онд Монголын Үндэсний Олимпын Хорооны ерөнхий нарийн бичгийн дарга, 2004 оноос дэд ерөнхийлөгчийн албыг хашиж байсан.  Москвагийн олимпоос жүдо бөхийн төрлийн -65 кг-ийн жинд мөнгөн медаль хүртэж байсан билээ. Тэрбээр Монгол улсын Гавьяат тамирчин, Ардын Багш, Үндэсний бөхийн улсын начин,  Самбо бөхийн залуучуудын  дэлхийн аварга юм.

МОНГОЛ УЛСЫН ГАВЬЯАТ ТАМИРЧИН РАВДАНГИЙН ДАВААДАЛАЙ

         Равдангийн Даваадалай нь 1950 оны гуравдугаар сарын 20-нд Ховд аймгийн Дарви суманд мэндэлжээ. Тэрбээр Москвагийн олимпоос жүдо бөхийн -71 кг-ийн жинд хүрэл медаль хүртсэн. Монгол Улсын Гавъяат тамирчин, Үндэсний бөхийн Улсын начин цолтой. Самбо бөхийн дэлхийн аварга юм.

МОНГОЛ УЛСЫН ГАВЬЯАТ ТАМИРЧИН ДОРЖПАЛАМЫН НАРМАНДАХ

       1996 оны Атлантагийн олимпоос хүрэл медаль хүртсэн Доржпаламын Нармандах нь 1975 оны арван хоёрдугаар сарын 18-нд Дархан хотод мэндэлсэн. Тэрбээр Ази тивийн аварга, Монгол Улсын Гавъяат тамирчин. 1999 оны Дэлхийн аварга шалгаруулах тэмцээний тавдугаар байрын шагналт тамирчин.

МОНГОЛ УЛСЫН ГАВЬЯАТ ТАМИРЧИН, ХӨДӨЛМӨРИЙН БААТАР ХАШБААТАРЫН ЦАГААНБААТАР

     Хашбаатарын Цагаанбаатар нь 1984 оны гуравдугаар сарын 19-нд Увс аймгийн Баруунтуруун суманд мэндэлжээ. "Аварга" биеийн тамирын лээд сургуулийг төгссөн. 1995 оноос анх жүдо бөхөөр хичээллэж эхэлсэн. Тэрбээр 2004 оны Афины олимпоос -60кг-ийн жинд хүрэл медаль хүртсэн. Мөн 2009 оны дэлхийн аварга, 2010 оны дэлхийн аварга шалгаруулах тэмцээний хүрэл медаль хүртэж байсан. Монгол Улсын Гавьяат тамирчин, Хөдөлмөрийн баатар цолтой. түүнчлэн Азийн наадмын аварга, Азийн хошой аварга, самбо бөхийн дэлхийн хошой аварга. Монгол Улсын оны шилдэг тамирчны "Бөртэ чоно" цомыг гурван удаа (2004, 2006, 2009) хүртсэн.

МОНГОЛ УЛСЫН ГАВЬЯАТ ТАМИРЧИН, ХӨДӨЛМӨРИЙН БААТАР НАЙДАНГИЙН ТҮВШИНБАЯР

           Найдангийн Түвшинбаяр нь Монгол Улсын анхны олимпын аварга, анхны олимпын хос медальтан, жүдоч юм. Тэрбээр 1984 оны зургадугаар сарын 1-нд Булган аймгийн Сайхан суманд малчин монгол аав Т. Найдан, ээж Д. Цэнд-Аюуш нарын долоон хүүхдийн отгон хүү нь болон мэндэлжээ. Тэрбээр 2002 онд жүдо бөхийн өсвөр Улсын аварга шалгаруулах тэмцээнд түрүүлж, удалгүй Булган аймгийн наадамд түрүүлж Аймгийн арслан цолтой залуу хүчтэн болов. Булган аймгийн арван жилийн II дунд сургууль, "Авар­га" биеийн тамирын дээд сургуульд тус тус сурсан. Багш, дасгалжуулагч мэргэжилтэй. Аймагтаа Эрдэнэ-Очир баг­шийн удирдлага дор барилдаж байсан бол Улаанбаатар хотод ирээд Х.Болдбаатарын шавь болжээ. 2006 оноос улсын шигшээд багтаж, олон улсын тэмцээнд -100 кг жинд барилддаг болсон.

          2008 оны намар болсон Бээжингийн олимпын наадaмд таван учраагаа дийлж, Монгол Улсын түүхэнд анхны алтан медалийг авчирч байсан. 2012 оны Лондонгийн олимпод дөрөв ялж, Оросын Тагир Хайбулаевтай шигшээд шалгарч, сууж үүрүүлэх мэхээр хожигдож, мөнгөн медаль хүртсэн. Н.Түвшинбаяр нь Монгол Улсын анхны олимпын хос медальтан болжээ. 2017 онд төрийн тэргүүн зэргийн Чингис хааны одонгоор шагнагдсан. Мөн 2008 оны наймдугаар сарын 25-нд Монгол Улсын Ерөнхийлөгчийн зарлигаар Найдангийн Түвшинбаярт Монгол Улсын Хөдөлмөрийн баатар цол, Сүхбаатарын одон гардуулжээ.

МОНГОЛ УЛСЫН ГАВЬЯАТ ТАМИРЧИН, ХӨДӨЛМӨРИЙН БААТАР ДОРЖСҮРЭНГИЙН СУМЪЯА

            Доржсүрэнгийн Сумъяа нь 1991 онд Увс аймгийн Баруунтуруун суманд төрсөн. “Рио-2016” зуны олимпоос жүдо бөхийн төрөлд -57 кг жинд олимпын мөнгө, Дэлхийн аварга шалгаруулах тэмцээний алт, хошой хүрэл медаль, Азийн наадмын хошой хүрэл, Азийн аварга шалгаруулах тэмцээний алт, хошой хүрэл медаль хүртсэн, Монгол улсын эмэгтэй жүдоч. Тэрбээр жүдо бөхийн түүхэн дэх Монголын дөрөв дэх дэлхийн аварга юм. Мөн самбо бөхийн дэлхийн гурван удаагийн аварга. “Токио-2020” зуны олимпын наадамд эх орноо төлөөлөн оролцсон хэдий ч харамсалтайгаар ялагдал хүлээсэн. 2017 онд Монгол Улсын Ерөнхийлөгч Х.Баттулга зарлиг гаргаж, Үндэсний шигшээ багийн тамирчин Доржсүрэнгийн Сумъяад Монгол Улсын Хөдөлмөрийн баатар цол хүртээсэн. Түүний амьдралаас сэдэвлэн “Цагаан хадаг” киног бүтээсэн билээ.

МОНГОЛ УЛСЫН ГАВЬЯАТ ТАМИРЧИН МӨНХБАТЫН УРАНЦЭЦЭГ

           “Токио-2020” зуны олимпын наадмын жүдо бөхийн төрөлд хүрэл медаль хүртэж, медалийн буухиаг эхлүүлсэн М.Уранцэцэг нь Баянхонгор аймгийн Баян-Овоо суманд төрж, өсчээ. Түүний аав н.Мөнхбат нь сумандаа үндэсний бөхөөр барилдаж, түрүүлж байсан бөхийн удамтай. М.Уранцэцэг багаасаа барилдаж өсчээ. 2006 онд "Женко" клубын тамирчин болсон, энэ үеэр М.Уранцэцэг өсвөрийн шатны тэмцээнүүдэд ордог байв. 2008 онд жүдогийн насанд хүрэгчдийн улсын аваргад оролцож түрүүлээд алтан медаль авсан. 2009 онд үндэсний шигшээ багийн тамирчин болжээ. Тэрбээр 2013 оны жүдө бөхийн дэлхийн аварга. 2017 оны Дэлхийн аварга шалгаруулах тэмцээний мөнгө, хошой хүрэл, Ази тивийн аварга, Азийн аварга шалгаруулах тэмцээний хошой хүрэл медальт тамирчин юм.

ЦЭНД-ОЧИРЫН ЦОГТБААТАР

             “Токио-2020” зуны олимпын наадмын жүдо бөхийн -73 кг-ын жинд Олон улсын хэмжээний мастер Ц.Цогтбаатар зодоглож, хүрэл медаль хүртсэн. Тэрбээр 1996 оны гуравдугаар сарын 16-нд Улаанбаатар хотод төржээ. “Рио-2016” зуны олимпын наадамд өрсөлдсөн хэдий ч харамсалтайгаар ялагдал хүлээсэн билээ.

Өдгөө 29 настай тэрбээр 1992 оны нэгдүгээр сарын 5-нд Иран Улсад төрж өссөн бөгөөд 2019 онд унаган нутгаа орхин Герман руу дүрвэж, хожим нь Монгол Улсын иргэн болсныг хэн бүхэн мэдэх биз ээ.