-Сургуулиа төгсөөд, хоёр кинонд тоглосныхоо дараа БНСУ руу явсан. Тэнд очиж яг гурван сар ажиллаж, 15 сая төгрөг цуглуулж ирээд машин авч байлаа-

        Өнөөдөр Олон Улсын инээдмийн баярын өдөр. Анх Григорийн он тооллын дараахнаас туйлдаж, ядарч, зовсон ард түмнийг хөгжөөх зорилгоор инээдмийн баярыг тэмдэглэж ирсэн гэдэг. Энэ өдрийг тохиолдуулан Эргэлт.мн мэдээллийн сайт “ТҮҮЧЭЭ” булангийнхаа энэ удаагийн зочноор жүжигчин Р.Сүхболдыг урьлаа. Тэрбээр “МААЗ” хамтлагийн дуучин төдийгүй “Улаанбаатар би чамд хайртай”, “Эможи”, “Би дурламаар байна”, “Хамгийн азтай үе”, “Нийслэл хүүхэн” зэрэг уран сайхны кинонд гол болон туслах дүрийг чадварлаг амилуулсан авьяаслаг, олны хайртай залуу жүжигчин юм.

-Сайн байна уу. Таны сүүлийн үеийн уран бүтээлийн сонин сайхнаас ярилцлагаа эхэлье?

           -Сайн байна уу. Сүүлийн үеийн уран бүтээл гэвэл би өнгөрсөн нэгдүгээр сард “Нөхөрт гарсны маргааш” гэдэг IP контентод жүжигчин З.Номуунтай хос болж тоглосон. Түүнээс хойш уран бүтээлд тоглоогүй байна.

-Таны тоглосон “Нийслэл хүүхэн” олон ангит уран сайхны кино үзэгчдээс өндөр үнэлгээ авсан.  Мөн үзэгчид таныг дүрээ маш сайн амилуулсан гэж үнэлж байна лээ. Энэ киноныхоо тухай яривал?

          -Өнгөрсөн зун “Тэрэлж” голын эрэгт ажиллангаа амарч, амрангаа ажиллаж, “Нийслэл хүүхэн” киноны зургийг 50 хоног авсан. Хүмүүс Сүхээгийн зургийг “Танай хүн ингэж байна, манай хүн ингэж байна” гэж хошин маягаар над руу явуулдаг. Тэгэхээр Сүхээгийн дүр үзэгчдэд хүрсэн юм болов уу гэж би их баярлаж байгаа. 

Би Тагтаа гэдэг хочиндоо хайртай. Яагаад гэвэл тагтаа чинь өөрөө энхтайвны бэлгэдэл шүү дээ

  -Хүмүүс таныг Р.Сүхболд гэхээс илүүтэй “МААЗ” хамтлагийн Тагтаа гэдгээр нь илүүтэй танидаг байсан шүү дээ. Одоо харин “Нийслэл хүүхэн” киноны Сүхээ гэдэг нэрээр нь илүү ярьдаг болсон санагдсан. Тагтаа гэдэг нэрийг анх хэрхэн авч байв?

       -“Хэцүү анги” киноны зураг авалтад орж байх үед манай хамтлагийн дуучин, жүжигчин Г.Жанчив намайг “Чи тагтаатай их адилхан юм. чамд Тагтаа гэдэг нэр өглөө” л гэсэн. Тэгээд л ийм хочтой болчихсон\инээв\. Энэ хочиндоо их дуртай. Яагаад гэвэл тагтаа чинь өөрөө энхтайвны бэлгэдэл шувуу шүү дээ. Тэр утгаар нь би энэ нэрэндээ хайртай.

- “Хэцүү анги” киноны дурсамжийг ярьж эхэлсэн болохоор энэ киноны тухай асуухгүй өнгөрч болохгүй байх. Анх яаж энэ кинонд тоглох боломж олдож байв?

         -Яг арван жилээ төгсдөг жил манай хамтлагийн И.Төмөрхуяг “Киноны проб авч байна. Очиж бүртгүүлье” гээд залгаж байсан. Тухайн үед хаврын хавсарганд миний нүүр тас хар болчихсон байсан. Тийм байж яаж кинонд тоглох вэ гээд их санаа зовж байлаа. Харин надад аз таарч, кино зохиол дээр нь “Таван харын фракц” гэдэг дүр бичигдсэн байсан. Бор, хар царайтай таван хүүхэд тоглуулахаар хайж байсан юм билээ. Түүний нэгээр нь сонгогдоод “Хэцүү анги” кинонд тоглож байлаа.

-Тэгвэл бор болсон арьс тань анх уран бүтээл рүү хөтөлж оруулж байжээ?

      -Тиймээ, хар байсан болохоор тухайн кинонд тоглох боломж нээгдсэн \инээв\. Кино дуусмагц жүжигчин болмоор санагдаад СУИС-д шалгалт өгсөн ч тэнцээгүй. Гэсэн ч СУИС-ийнхаа менежментийн ангид орсон. Гэхдээ тэр мэргэжилд сонирхолгүй байсан болохоор удалгүй сургуулиасаа гарч, “Нарантуул” зах дээр ээжийнхээ ажилд туслаж, зургаан сар худалдагч хийсэн. Дараа жил нь ахиж шалгалт өгөөд, тэнцээд СУИС-ийн босгыг дахин алхаж байлаа. СУИС-д сурч байхад манай “Guys” хамтлагийн А.Төгсбаяр ах залгаад "Та хэдийг нэгтгээд хамтлаг байгуулбал ямар вэ" гэсэн санал тавьж, “МААЗ” хамтлагаа байгуулж байсан.

Манай хамтлагийн анхны “Би дурламаар байна” гэдэг дуу тухайн үед нэлээн хит болсон. Хэдэн долоо хоног чартыг тэргүүлж, бид баярын шоконд орж байлаа. Автобусанд, микронд явж байхад ФМ-ээр манай хамтлагийн дуу явахаар хүмүүст "Би дуулсан шүү дээ” гэж хэлмээр санагдаад л, клипийг нь үзсэн хүмүүс намайг таниад эргэж харахаар нь “Тиймээ, би мөн байна” гэж хэлмээр санагддаг байлаа. /Инээв/

-Эргээд дурсахад хамгийн сайхан дурсамж оюутан насанд үлдсэн байдаг. Тэр дундаа СУИС-ийн оюутнууд бусдаас илүү дурсамжтай байдаг юм шиг ээ?

      -Тэгэлгүй яах вэ, хамгийн сайхан дурсамжууд минь СУИС-аас V сургууль орох хүртэл байдаг Анкарагийн гудамжинд өнгөрсөн. Манай СУИС-ийнхан ойр хавийн цайны газарт өргүй байна гэж байдаггүй. Бүгдэнд нь сайхан өр тавьж “дампууруулдаг” байсан. “Кульна” гэж цайны газрыг СУИС-ийнхан “дампууруулсан” гэж болно. Би бүр 140 мянган төгрөг болтол нь хоол зээлээд идчихсэн байсан.

-140 мянган төгрөг болтол нь танд итгэжээ?

      -Тийм шүү. Тэр үед манай ах тэр цайны газарт мах нийлүүлдэг байсан юм билээ. Нэг өдөр манай ах над руу залгаад “Хүүш ээ, чи энэ “Кульнар”-т хэдэн төгрөгийн өр тавьсан юм бэ” гэж асууж байна. “Хэд байна” гэсэн чинь “140 мянган төгрөг гэж байна. Би өрөнд чинь нэг хонины гулууз мах өглөө шүү” гэсэн. Тэгээд л ахаараа гулууз махаар өрөө даруулж байлаа. Сүүлд нөгөө цайны газрыг ажиллуулдаг байсан эгч талбай дээр таараад “Сайн уу, миний дүү нар. Эгч нь нарийн боовны цех нээсэн” гээд ярьж байсан. Одоо тэнд очих юм бол тэр нь дампуурна. Зүгээр холбоогүй байсан нь дээр. /инээв/

-Жүжигчин мэргэжлээр сурч буй хүүхдүүд киноны арын албанд их ажилладаг. Түүндээ ч их дуртай байдаг юм шиг. Магад найруулагч, жүжигчдийн хэрхэн дүрээ амилуулж буйг харж, судалдаг байх тийм үү?

     -Миний хувьд “Guys” хамтлагийн А.Төгсбаяр ахын “Ах дүүс” кинонд жинхэнэ туслахын үүргийг гүйцэтгэсэн. Хоолыг нь хүртэл хийдэг байлаа. “Кино групп ямар хоол идмээр байна” гэж асууна. “Цуйван” гэнгүүт нь 20 гаруй хүний цуйван хийгээд л. Тэр киног дуусах хүртэл бараг сар гаруй Төмөр замд “амьдарсан”. Оюутан насаа эргээд дурсахад кинонд явсан үе л хамгийн гоё дурсамж байдаг. Царай, жүжиглэлтдээ бардаад киноны туслахаар явахгүй гэдэг оюутнууд байдаг л даа. Миний хувьд бол юмыг багаас нь эхлээд одоо ингээд олон ангит киноны гол дүрийн санал авч буйдаа баярлаж байна.

-Өнөөгийн нийгэмд жүжигчин мэргэжлээр ажиллаад, амьдралаа авч явах боломж хэр байдаг вэ. Санхүүгийн асуудал хэр тулгардаг вэ?

     -Жүжигчин мэргэжлээр төгсөөд шантарсан хүн олон байдаг. Шантрахаас ч өөр аргагүй. Жүжигчнээр төгсчихөөд “Би жүжигчин” гээд зүгээр яваад байлтай биш. Ард нь амьдрал байгаа. Амьдралаа босгохын тулд мөнгөний ажил хийх болно. Тэгээд мөнгөний ажлаа хийгээд явахаар өөр мэргэжилтэй болчихно. Миний хувьд сургуулиа төгсөөд хоёр кинонд тоглосныхоо дараа БНСУ руу явж байсан. Тухайн үед машин тэрэггүй, мөнгө санхүүгийн хэрэг гараад тэнд очиж яг гурван сар ажил хийсэн. Тэгээд 15 сая төгрөг цуглуулж ирээд машин авч байлаа.

-Жүжигчин хүн бүрт мөрөөдлийн дүр гэж байдаг. Та ямар дүр амилуулахыг хүсдэг вэ?

       -Би түүхэн дүр, баатрын дүр бүтээе гэж боддоггүй. “Би чамд хайртай” киноны Баяраа шиг хүмүүсийн сэтгэл, зүрхэнд үлдсэн гоё дүр бүтээхийг хүсдэг.

-Таны хувьд аав болоод удаагүй, шинэхэн аав шүү дээ. Аав болохоос өмнөх Р.Сүхболд, аав болсны дараах Р.Сүхболд хоёрын дунд хэр их өөрчлөлт гарсан бэ?

      -Маш их өөрчлөлт гарсан. Аав болохоос өмнө их завтай, ганц бие тагтаа байсан. Гэр бүлтэй болсны дараа тагтаагийн хажууд жижигхэн дэгдээхэй гараад ирсэн. Миний бүх үйлдлийг харж байгаа учраас би хаашаа ч юм дураараа нисээд байж болохгүй.  Иймээс чадлынхаа хэрээр маш сайн халамжлаад, хөөрхөн, жаргалтай эмэгтэй тагтаа болж өсөж, торнихыг нь харахыг хүсч байна. 

-Ярилцсанд баярлалаа. Уран бүтээлийн өндөр амжилт хүсье.

       -Баярлалаа.