Клеопатра хатны тухай өгүүлэх шинэ киноны төлөвлөгөө, зураг авалт эхлээгүй ч  кино сонирхогчдын дунд маргаан дэгдэв. Эртний Египетийн хатан, удирдагчийн дүрд Холливудын од, “Wonder Woman”-ий дүрээр олонд танигдсан жүжигчин Гал Гадот тоглохоор болсон талаар мэдээлжээ.

Энэхүү мэдэгдэл нь олон нийтийн сүлжээнд маргаан дэгдээж байгаа бөгөөд цагаан арьст жүжигчин өнгөт арьстны дүрийг бүтээж буй нь олны дургүйцлийг төрүүлээд буй. Үзэгчдийн олонх нь энэхүү дүрд араб эсвэл африк гаралтай жүжигчин тоглуулах нь зүйд нийцнэ гэж үзэж байгаа бол зарим нь Клеопатра араб, африк биш, грек эсвэл македон хүн байсан гэж маргаж байна.

Гадотын хувьд уг дүр дээр ажиллах сонирхолтой байгаагаа илэрхийлсэн бөгөөд кино багийнхан ч түүнтэй хамтран ажиллах болсондоо таатай байна хэмээн мэдэгдсэн. Гал Гадотын хэвлэлийн төлөөлөгч хэрүүл маргааны талаар тайлбар өгөхөөс татгалзаад байгаа юм.

Клеопатра нь эртний Грекийн удирдагчдын гэр бүл,  Птолемейн удмаас гаралтай. Тэрээр МЭӨ 69 онд Египетэд төрсөн бөгөөд Нил мөрний хаант улсыг Ромын харьяа байхад удирдаж байжээ. Эртний Нилийн хатан хааныг дүрслэн харуулахад илүү олон асуудал тулгардаг гэлцдэг.