“ДАШВААНЖИЛ” ХХК-ИЙН ЗАХИРАЛ Н.БААТАРЖАВ АГСНЫ ХЭРЭГ ХЭРХСЭН БЭ

       “Дүнжингарав”-ын уулзварт гааз тээвэрлэж явсан автомашин зам тээврийн осолд орж, дэлбэрэлт болсон. Үүний улмаас долоон хүн амиа алдсан харамсалтай хэрэг 2024 оны нэгдүгээр сард гарч байлаа. Дэлбэрэлт болоод хоёр жил болж байхад буруутай этгээд тогтоогдоогүй, иргэдийн хохирлыг барагдуулаагүй хэвээр байна. Уг хэрэгт холбогдон шалгагдаж байсан хүмүүсийн нэг нь “Дашваанжил” ХХК-ийн захирал Н.Баатаржав агсан байлаа. Харамсалтай нь тэрээр өнгөрсөн оны арваннэгдүгээр сард нас барсан. Ингэснээр түүний хэрэг прокурорт гацсан нөхцөл байдалтай байгаа гэх. Энэ хэрэг дээр 100 мөрдөгчийн бүрэлдэхүүнтэй баг ажиллаж байгаа гэх мэдээлэл гарч байсан. Гэсэн хэдий ч хохирол ихтэй хэрэг учраас шалгалтын ажиллагаа дуусаагүй байгаа юм. Өнгөрсөн нэгдүгээр сард хохиролд өртсөн хүмүүсийн ар гэрийнхэн хэвлэлийн хурал хийж, тус хэргийг төр захиргааныхан анхаарахаа больсон талаар мэдэгдэж байсан. 

 ДЭЛБЭРЭЛТЭД ӨРТӨЖ АМИА АЛДСАН ИРГЭНИЙ ЭХНЭР: УЛС БИДНЭЭС УУЧЛАЛТ Ч ГУЙСАНГҮЙ, ХҮЛЭЭН АВЧ УУЛЗАЖ, АНХААРАЛ Ч ХАНДУУЛСАНГҮЙ

      Энэ үеэр тус дэлбэрэлтэд өртөж амиа алдсан иргэний эхнэр Батчимэг "Миний хувьд энэ ослоор нөхрөө алдаж, 7-18 насны гурван хүүхэдтэй үлдсэн. Тухайн үед осол болсноос хойш 16 хоног нөхрөө сахисан. Нөхрөө алдсан эхний жил би сэтгэл санааны хямралаас болоод үнэхээр ажил хийх боломжгүй байсан. Сүүлийн нэг жил яваагүй газар алга. Хоёр жилийн хугацаанд би Ерөнхийлөгчтэй уулзах хүсэлт нэг удаа, Ерөнхий сайд Г.Занданшатар, С.Амарсайхантай уулзах хүсэлт тус бүр гурван удаа, Нийслэлийн Засаг даргад уулзах хүсэл тавьсан ч аль нь ч хүлээн авч уулзаагүй. Хамгийн сүүлд бид арваннэгдүгээр сарын 27-нд Ерөнхий сайд Г.Занданшатартай уулзах хүсэлт өгөөд, "Уулзах боломжгүй. Дараагийн шатны байгууллагад хүсэлтээ гаргана уу" гэсэн тайлбар бичиг авсан. Бид хань ижил, үр хүүхэд, аав, ээжээрээ хохирчихоод байхад улс биднээс уучлалт ч  гуйсангүй, ямар нэгэн байдлаар хүлээн авч уулзаж, бидний асуудалд анхаарал хандуулсангүй. Иймд бид хэвлэлийн хурал хийж байна. Өнөөдөр бид мөн 18:00 цагаас зул өргөх ёслол хийнэ. Эндээс гараад бид төрийн хоёр өндөрлөгт уулзах хүсэлтээ илгээж байгаа. Магадгүй хэвлэлийн хурлын дараа биднийг хүлээж авч, уулзах болов уу гэж бодож байна" гэв. 

ДҮНЖИНГАРАВЫН ОСЛЫН ХОХИРОЛ ХЭЗЭЭ БҮРЭН БАРАГДАЖ ДУУСАХ ВЭ    

      Хэргийн талаар эргэн сануулбал, ослын улмаас 23 том хүн, 17 хүүхдийг нүүлгэж шилжүүлж, зочид буудалд байрлуулж байв. Урьдчилсан байдлаар эхний өдөр онцгой байдлын албаны гурван албан хаагч нас барж,  Түлэнхийн төв, Цэргийн төв эмнэлэгт хүргэгдсэн 11 том хүн , гурван хүүхэд хүргэгдэж байсан. Галын шалтгааныг урьдчилсан байдлаар дүгнэж үзэхэд,  байгалийн шингэрүүлсэн хий ачиж авсан автомашин тойрог дээр хөдөлгөөн үйлдэхдээ зай анзаарахгүй, давхар хий эргэж, суудлын автомашинтай мөргөлдсөнөөс дэлбэрэлт үүссэн гэж дүгнэж байгаа. Дэлбэрэлтийн улмаас ОБЕГ-ын Баязүрх дүүргийн 63 дугаар ангийн гурван албан хаагч, энэ осолд өртөж, шидэгдсэн ёмкост өртөж, харамсалтайгаар амиа алдлаа. Гал түймрийн улмаас 30 автомашин шатаж, сүйдсэн хэмээн албаныхан мэдэгдэж байсан юм. 

      Харин тухайн байр орон сууцны ашиглалт, галын улмаас уян хатан чанар алдагдсан эсэх дээр Барилга хот байгуулалтын яамныхан мэргэжлийн хүмүүстэй хамтарч шалгалтаа хийж дууссан. ШУТИС-ийн лабораторит армартур, битоны болон бусад хийц бүтээцийн шинжилгээг хийж байна. Дэлбэрэлттэй холбоотой бүх дүгнэлт гарч дуусна. Засгийн газрар, нийслэлийн төсвөөс дэлбэрэлтэд өртсөн 63 айлын орон сууцыг засварлах хөрөнгийг гаргахаар болсон. Дүгнэлт гараад завсарлах боломжтой гэдгийг албаныхан онцолж байлаа. Гэтэл одоо болтол хохирогч нар хохирлоо бүрэн барагдуулж чадахгүй аргаа барахдаа хэвлэлийн хурал хийж байсан юм.