Япон Улсын эзэн хаан, эрхэм дээд хатны хамт энэ сарын 6-ны өдрөөс Монгол Улсад төрийн айлчлал хийхтэй холбогдуулан Токио хотод хэвлэлийн хурал хийжээ. Эзэн хаан төрийн хүндэтгэлийн арга хэмжээнээс гадна Монгол Улсад амьдралын сүүлийн жилүүдээ өнгөрүүлсэн Япон цэргүүдэд хүндэтгэл илэрхийлэн, Япон цэргийн дурсгалын цогцолборт очих хөтөлбөртэй тухайгаа мэдээлэв.

   Эзэн хаан хэвлэлийн хурлын үеэр 2007 онд Хунтайж байхдаа Монгол Улсад зочилж байсан тухайгаа дурсан “Энэ удаагийн айлчлал нь Япон, Монгол хоёр улсын эртнээс харилцаж ирсэн түүхэн үйл явдлууд дээр суурилсан, түүхийг эргэн харсан айлчлал болоосой гэж хүсэж байна” гэж онцлов.

   Мөн эрхэм дээд хатан хоёр улсын харилцааны түүхийг сэтгэлдээ чандлан, манай хоёр улсын харилцаа, нөхөрсөг дотно холбоогоор улам бэхжихийг хүсэж, Монголын их тал, түүх, соёлыг дэргэдээс нь мэдрэх болсондоо ихэд баяртай байгаагаа илэрхийлж, монголчуудтай уулзах өдрийг тэсэн ядан хүлээж байна хэмээжээ.

   Эзэн хаан яриандаа дэлхийн хоёрдугаар дайнд Япон Улс ялагдал хүлээсний дараа хуучнаар ЗХУ, Орос Улсад хоригдож байсан 14.000 гаруй Япон цэрэг Монгол Улсад цөллөгдсөн ба тэдний 1700 гаруй нь хүнд хүчир ажил хийж, хүйтэн ширүүн уур амьсгалд туйлдан ядарснаас болж Монголд нас барсан.

    “Монгол цөлөгдөн хоригдож байсан Япон цэргүүд, өнөөдрийн Монгол Улсын Засгийн газрын ордон, Улсын дуурь бүжгийн эрдмийн театр гэх мэт барилга байшин барих ажилд дайчлагдаж байсан ба тэдний амьдрах орчин маш хүнд, хүйтэн, эрс тэс уур амьсгалтай, хүнд нөхцөлд амьдарч байсан.  Гэсэн хэдий ч цэргүүд өөрсдийн хариуцсан ажилдаа бүх хүчээ дайчлан ажиллаж байсан нь монголын ард түмний хайр хүндлэлийг хүлээсэн гэж дуулсан” хэмээн түүхийн хуудас сөхөв.

    Энэ удаагийн төрийн айлчлалаар өнгөрсөнд болж өрнөсөн түүхэн үйл явдлыг сэтгэл зүрхэндээ тээн Япон цэргийн булшинд хүндэтгэл үзүүлнэ. Тэд эх орноо сэтгэлдээ тээсээр эргэж ирж чадалгүй, амиа алдсан ба тэднийг хүндэтгэн ёсолж, мэдэрсэн зовлон шаналалд толгой бөхийлгөхийг хүсэж байна” хэмээн хэвлэлийн хурлаар  мэдэгджээ.